ဗြဝတီ၊ နိုဝမ်ပါ ၁၅
တွဵုရးကရေၚ် ပွိုၚ်ဍုၚ်ဗြဝတဳ အပ္ဍဲကဵုရုၚ်ကျာဖျ နွံကွာန်ဖလူ ဒၞာဲဒပ်ပၞာန်ကရေၚ်ပတုဲဖဵု ဒဳမဝ်ကရေသဳ DKBA ထိၚ်ချုက်လဝ်ဂှ် နူကဵုဒပ်ပၞာန်ဗမာပန်ဏာလွဟ်ဇၞော်တုဲ ပိတၠချိုတ်အာဂှ်တှ်ေ ကောန်ဍုၚ်ကြုက် ပါမံၚ်မွဲတၠရောၚ် ဂွံတီနူညးဒေသတံရ။
ပ္ဍဲဂိတုနိုဝမ်ပါ ၁၂ အခိၚ်ဗ္တံဂှ် ဒပ်ကဝ်မယှေန်ပၞာန် နူကဵုဍုၚ်လေဝ်ကေကဝ်ကဵု ကွာန်ထီုဣသိ ပတဝ်ဏာကဵုကွာန်ဖလူ နွံမံၚ်သၠုၚ်ကျာဗြဝတဳတပ်ပ် ကရောၚ်ပၞာန်ထပက်ကၠုၚ်ဂှ်ကဵု ဂကောံဇြဟတ်ပၠန်ဂတးတံ ဒှ်ပေါဲဗတိုက်တုဲ နူကဵုဒပ်ကဝ်မယှေန်ပၞာန် ဖျေံလဝ်ဒပ်ပ္ဍဲကုန်ဒဵုဗလံက် လေဝ်ကေကဝ် ပန်ရီုဏာမံၚ်ကဵုလွဟ်ဇၞော်ရ။
ဒဵုကဵုဂိတုနိုဝမ်ပါ ၁၃ အခိၚ်နူဂယးအကြာဒပ်ကဝ်မယှေန်ပၞာန်ကဵု ဂကောံဇြဟတ်ပၠန်ဂတးတံၜါလပါ် ပေါဲဗတိုက်ဆက်ဒှ်မံၚ်ဂှ် နူကဵုကုန်ဒဵုဗလံက် ဒပ်ကဝ်မယှေန်ပၞာန် ထပ်ပန်ကဵုလွဟ်ဇၞော်တုဲ လ္တူကၟဳရုၚ်ကျာဖျ နွံမၚ်ကွာန်ဖလူ DKBA ထိၚ်ချုက်လဝ်ဂှ် မကမ်ဒတုံစှ်ေအာတဝ်ဝ် မဒှ်ရ။
ဟိုတ်နူဒးမကမ်လွဟ်ဇၞော် ခရိုဟ်အာဂှ် ကောန်ဍုၚ်ကြုက်မွဲတၠ၊ ကောန်သ္ဂံၚ် DKBA မွဲတၠကဵု ကောန်အရာပ်မွဲတၠ အပံၚ်ဖအိုတ် ၃ တၠ ချိုတ်တုဲ ၁၀ တၠ ဒးဝပ် နွံမံၚ်ရ အပ္ဍဲဏံ မၞိဟ်ဒးဝပ်ဂိဂၠိုၚ်တံဂှ် ပလံၚ်ဏာလပါ်ရုၚ်ဂဥုဲဍုၚ်သေံနွံမံၚ်ရောၚ်ဂှ် ညးဒေသတံ ဟီုရ။
ဒၞာဲမကမ်လွဟ်ဇၞော် ဒတုံပြဟ်စှ်ေလဝ်ဂှ် အခိၚ်ကၠာတေံကေၚ်ဒှ်လဝ် ဒၞာဲတိဍာ်ပေါဲဗတိုက်ကီု ဗွဲကြဴဏံ နူကဵုဒပ် DKBA ပံက်လဝ် စမြိၚ်ရုၚ်ကျာဖျ ရဂှ် ဂွံတီနူ ညးဒေသတံရ။
ဒပ်ကဝ်မယှေန်ပၞာန် သီကေတ်ဍုၚ်တၟိလေဝ်ကေကဝ်တုဲ မွဲဒမြိပ်ကွာန်ဗ္ဒာဲ ဂၠံၚ်ကွဳစက် ဗြဝတဳ-ဝဝ်လေဝ်ဂှ်လေဝ် ကရောၚ်ပၞာန် ထပက်မံၚ် ဒၞာဲ DKBA ထိၚ်ချုက်လဝ် ကွာန်မေန်လက်ပါန်၊ ဖလူတံလေဝ် ပါလုပ်ကီုရ။
ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA ထပက်လဝ် လိက်ကသုက်ပရေၚ်ဒေါအ်ပန်ပှော်အလုံဍုၚ် NCA ဂှ် ထံက်မံၚ်ဂလာန်ကဵု ပေါဲရုဲမာဲကဝ်မယှေန်ပၞာန်တုဲကဵုအာအရီုဗၚ်ဏောၚ်ဂှ် ပတိတ်လိက်ပံၚ်တောဲကု ဒပ် BGF, KNU/KNLA PC တံတုဲ လလောၚ်တြးလဝ်ရ။
တုဲပၠန် ပြဟ်ဟ်ဏံ စပ်ကဵုပရေၚ်ကျာဖျဂှ် နူကဵုအမေရိကာန် ကေတ်လဝ်အရေဝ် ကၠောန်ပရေၚ်မာတ်ဆိုအ်ကု ဒပ် DKBA ကေုာံ သ္ကိုပ်က္ဍိုက်ပ်ပၞာန် သ္ကိုပ်ပၞာန်ဇၞော် သဝ်စတဳလ်ပါလုပ် ညးတာလျိုၚ်အဆံၚ်သၠုၚ် ၄ တံကီု၊ ပြဟ်ဟ်ဏံ ပ္ဍဲကဵုဒေသကျာ်ပိကဵု ကျံက်ခက်တံ DKBA ပံက်လဝ်ရုၚ်ကျာဖျတုဲ ကမၠောန်ဆက်ဂေတ်မံၚ်ဖိုအ်ရ။
ပရိုၚ်-သြၚ်လောန်တိုၚ်မ်
Photo – CJ