နေပျဳတဝ် ၊ နိုဝမ်ပါ ၁၅
ပ္ဍဲကဵုဝင်ပေါဲရုဲမာဲ ဍုၚ်ဗမာဏံ အလန်ကၠာအိုတ် စသုၚ်စောဲစကာအာစက်ကဵုမာဲ သွက်ပေါဲရုဲမာဲသ္ကုတ်ကဵုသ္ကုတ် တံမ္ဂး အကြာပေါဲရုဲမာဲသ္ကုတ်မွဲတုဲမွဲ နကဵုကိုန်အစဳဇန် သၞောတ်စှ်ေစှ်ေဗီုပြၚ်ပြံၚ်ပဆုဲစက်ကဵုမာဲတံဂှ် ညံၚ်ဂွံရေၚ်တၠုၚ်အာ ကဝ်မယှေန်ပေါဲရုဲမာဲကၟိန်ဍုၚ် ကဵုနၚ်လဝ်စၞောန်ပ္ညုၚ်ရ။
ကဝ်မယှေန်ပၞာန်ခါန်ကၞက်လဝ် ပေါဲရုဲမာဲကဝ်မယှေန်ပၞာန်ကၟိန်ဍုၚ်ဝွံ စပ်ကဵုလၟေၚ်ပရေၚ်ကမၠောန်ပေါဲရုဲမာဲ ပ္ဍဲနဝ်ဝမ် ၁၃ ဂှ် ကၠောန်လဝ် ကောံဓရီုပညဳပညပ်တုဲ ဥက္ကဌကဝ်မယှေန်ကီု သီုညးပါလုပ်ဂကောံတံကီု ဝန်ဇၞော်တွဵုရး ညးစၞးဂကောံအလဵုအသဳရးဒေသဇၞော် ကဵု တွဵုရးတံတိုန်စိုပ်လဝ်ရ။
စက်ကဵုမာဲသွက်ပေါဲရုဲမာဲ အတိုၚ်လၟိဟ်နွံပၟိက်တံဂှ် တြးပလံၚ်ဗစိုပ်ကဵုလဝ် ဇရေၚ်ရးကေုာံတွဵုရးဆေင်စပ်တံတုဲ စက်ကဵုမာဲတံဏံ ညံၚ်ဟွံဂိ ညံၚ်ဟွံလီုလာ်အာ ဗီုပြၚ်သၞောတ်စှ်ေစှ်ေ သွက်ဂွံဂိုၚ်ဒေပ်စွံလဝ်ချိုတ်တ်ပၠိုတ်တ်ညိဂှ် ဥက္ကဌကဝ်မယှေန် ဥူတာန်သိုဝ် ဟီုဏာပ္ဍဲကောံဓရီုဏံရ။
အကြာပေါဲရုဲမာဲ မွဲသ္ကုတ်ကဵုမွဲသ္ကုတ် ကာလပြံၚ်ပဆုဲမ္ဂး ကိုန်အစဳဇန်ပဆုဲပြံၚ်ကီု အစဳဇန်ပါ်ပရအ်တြးကီု စပ်ကဵုပရေၚ်စက်ကဵုမာဲတုဲ အစဳဇန် ဗီုပြံင်ပဆုဲဏာတံဂှ် နူကဵုဂကောံအထံက်အရီုနဲကဲပညာတံ သွက်ဂွံပတိုန်ထ္ၜးအစဳဇန် မဒှ်ရ။
တုဲပၠန် သွက်ဂွံပြံၚ်ပဆုဲစက်ကဵုမာဲတံဂှ် ကာလစကာသုၚ်စောဲ စရိတ်သြန်ဂအုံမ္ဂး ညံၚ်ဟွံဂွံထောၚ်ပြိုဟ် စၟဳစၟတ်ကၠောန်အာ ချိုတ်တ်ပၠိုတ်တ် သၞောတ်စှ်ေစှ်ေညိဂှ် ဥက္ကဌကဝ်မယှေန် စၞောန်ပညုၚ်လဝ်ရ။
ပေါဲရုဲမာဲ ဒးကၠောန်ဗ္ဒျ် ပ္ဍဲကဵုပွိုၚ်မွဲတ္ၚဲဓဝ်ဟေၚ် ချူခၞံလဝ်ဟၟဲ စကာအာသ္ဇိုၚ်သၞောဝ်ဥပဒေ ၂၀၀၈ တုဲ သွက်ဂွံကၠောန်အာ ပေါဲရုဲမာဲသ္ကုတ်ပိသ္ကုတ်ဂှ် ကဝ်မယှေန်ပၞာန်စဳဇန်လဝ်မဒှ်ရ။
ဗီုပြၚ်ကဵုမာဲပၠန် ကၠောန်ပရေၚ်လီဠာန်ဟွံဂွံ ထ္ၜးလဝ်ဟိုတ်တုဲ စကာအာစက်ကဵုမာဲသၞောတ်အဳလက်ထရဝ်နေတ် ဒးကဵုမာဲကု အလံၚ်ညးစၞးအမာတ်တံရောၚ်။ လ္တူဏံနဲကဲဟွံယဵုလ္ဂူ နူကဵုဗဟဵုထိၚ်ချုက်တံဒှ်ကၠုၚ်မာန်ရောၚ် ညးလ္ၚတ်တံ ပါ်ပါဲလဝ်ရ။
ပ္ဍဲကဵု စက်ကဵုမာဲသၞောတ်အဳလက်ထရဝ်နေတ်မ္ဂး စက်ထိၚ်ချုက်၊ စက်ပ္တန်ဆန္ဒ၊ စက်ထ္ၜးပ္တန်လဝ်ဆန္ဒ ဍာံဟွံဍာံ၊ ကဠာမာဲ ကေုာံဘက္ထရဳဆးဓါတ် ဗီုပြၚ်ကၠောန်ဗ္ဒျ် ဗဂပ်လဝ်စက်တံဂှ် နူကဵုဂကောံ ကဝ်မယှေန်ပေါဲရုဲမာဲကၟိန်ဍုၚ်တံ သောၚ်ကလးကဵုလဝ်တုဲတုဲ မဒှ်ရ။
စကာစက်တုဲကဵုအာမာဲမ္ဂး အခိၚ်အောန်န် သောၚ်င်လောဲလောဲ ကဵုမာဲမာန်သၟးဟွံက မာဲလီုလေဝ်ဟၟဲတုဲ မမာဲဒှ်အာသၟးသၟးဟွံမာန်ဂှ် ဒှ်ဂုဏ်ဖဵုတၟာဂမၠိုၚ်ရောၚ် ဥက္ကဌကဝ်မယှေန် သ္ဂးရ။
ပရောပရာစက်ကဵုမာဲဂှ် တၠဆန္ဒမာဲညးဍုၚ်ကွာန်တံဂွံတီအာကီု စကာစက်ကဵုမာဲတုဲ ညံၚ်ဂွံကဵုမာဲလေပ် ဒဵုစိုပ်အဆံၚ်ကွာန်အရာပ် ဇၟာပ်ရးကဵုတွဵုရးတံဂှ် သောၚ်ကလးလဝ်တုဲ ဗီုကဵုမာဲနတဲဂှ်လေဝ် ထ္ၜးကဵုလဝ်နွံရောၚ် ညးဆက်ဟီုရ။
တုဲပၠန် ညးရပ်စက်ကဵုမာဲတံ သွက်ဂွံရပ်စပ်စက်ကဵုမာဲလေပ် စီုသကီုချိုတ်တ်ပၠိုတ်တ်ကီု ကဵုလဝ်တန်ဗတောန်တံနွံတုဲ ပ္ဍဲတ္ၚဲကဵုမာဲမ္ဂးစက်ကဵုမာဲတံကဵု ဒၞာဲရုၚ်မာဲဆေင်စပ်တံ ညးဍုၚ်ကွာန်ဂမၠိုၚ် ညံၚ်ဂွံကဵုအာမာဲ ပြေပြေပြံၚ်ပြံၚ်မာန် ဒးကၠောန်အာရောၚ် ကဵုလဝ်စၞောန်ပ္ညုၚ်ရ။
ပေါဲရုဲမာဲကဝ်မယှေန်ပၞာန် သ္ကိုပ်သ္ကကၠောန်အာဏံ မၞုံကဵုဗဗွဲဓရ်ဍာံပြ သၠးပွးဟွံသေၚ်ကီု ဂလာန်ပတေဟ်လဝ်ဟၟဲတုဲ အာကဵုမာဲဟွံသေၚ်ပုဟ် ညးဍုၚ်ကွာန်တံဟီုပတိတ်မံၚ်ရ။
သၟဝ်သ္ဇိုၚ်သၞောဝ် ၂၀၀၈ ဏံ ကၠောန်ဗ္ဒျ်အာပေါဲရုဲမာဲဂှ် သွက်အယုက်သၞောတ်တၠအဝဵုပၞာန်ဂွံဂၠိၚ် ဖန်ကၠောန်မံၚ် ပေါဲရုဲမာဲအလီရောၚ် ဂကောံဇြဟတ်ပၠန်ဂတး ဒစဵုဒစးမံၚ်သၞောတ်တၠအဝဵုပၞာန်တံ စၟတ်သမ္တီလဝ်ရ။
ပေါဲရုဲမာဲအလီဏံ ညံၚ်ဂွံအံၚ်ဇၞးအာ နနဲမွဲမွဲဗီု ပါလုပ် ကဵုအရီုဗၚ်ထံက်ပၚ်မံၚ်တံဂှ် ညံၚ်ဟွံဂွံကၠောန်ဒးအာ၊ ယဝ်ရကၠောန်မ္ဂး ကေတ်အရေဝ်ဏောၚ် ကံၚ်သဳဖိတ်ဒရေဝ်ဍုၚ်မန် MSFC ကဵုလဝ်သတိရ။
လောန်ကၠုၚ်ဂိတုအဝ်ဂါတ် ၁၄ တေံ အစာၝောံ Non CDM ၄ တၠ အာတိုန်တန်ဗတောန်ပေါဲရုဲမာဲဂှ် ပ္ဍဲကဵုသ္ကုတ်ဂၠံၚ် ရေဝ်-ဇြပ်ဗု ဂကောံပၠန်ဂတး ၂ ဂကောံရပ်ထိၚ်စွံလဝ် ပွိုၚ်မွဲတ္ၚဲတုဲ ကလေၚ်ဗလးလဝ်ကဵု နကဵု တင်ဒုၚ်ဝန်ကတိပါၚ်တံနွံရ။
ပရိုၚ်-သြၚ်လောန်တိုၚ်မ်
Photo – CJ