မတ်မလီု ၊ နိုဝမ်ပါ ၁၅
ကဝ်မယှေန်ပၞာန်သီလဝ်အဝဵု ကၠောန်အာပေါဲရုဲမာဲ ပ္ဍဲကဵုတွဵုရးမန်ဂှ် အလံၚ်အမာတ် သွက်ဂွံလုပ်ပြိုၚ်စၞးဗော်နာနာတံဗွဲမဂၠိုၚ် ဟွံဂံၚ်စှ်ေစန်ဒက်မာဲပ္ဍဲကဵုဗလးတိရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်ရ။
သွက်အလံၚ်အမာတ်ဂမၠိုၚ် ညးလုပ်ပြိုၚ်တံ ဂွံစန်ဒက်အာမာဲဂှ် စၟတ်လဝ်ကဵု အခိၚ်ကာလစန်ဒက်မာဲ စနူကဵု ဂိတုအံက်တဝ်ပါ ၂၈ ဒဵုကဵုဒဳဇြမ်ပါ ၂၆ ပွိုၚ်ကာလတံၚ်ဂြဲမာဲ ၆၀ တ္ၚဲရ။
ပရေၚ်စန်ဒက်မာဲ သွက်အလံၚ်အမာတ်တံ ပွိုၚ်ကာလတံၚ်ဂြဲမာဲ ၆၀ တ္ၚဲ ကဵုလဝ်အခေါင်ကီုလေဝ် ဗော်ပရေၚ်ဍုၚ်ကွာန် ဗွဲမဂၠိုၚ်တံဂှ်တှ်ေ ချဳဒရာၚ် စှ်ေစန်ဒက်တံၚ်ဂြဲမာဲ ပ္ဍဲအရာပ်လ္တူဍုၚ်တံဂှ်လေဝ် ဟွံဂွံဆဵုညာတ်ဏီရ။
ဗော်လုပ်ပြိုၚ်မာဲတံဂှ် လ္တူဍုၚ်လေဝ်ဟွံချဳဒရာၚ် ပ္ဍဲကွာန်အရာပ်တံလေဝ် ပရေၚ်ချဳဒရာၚ်စန်ဒက်မာဲ ညိလေဝ်ဟွံဆဵုဏီတုဲ အလံၚ်ညးစၞးလဵုလုပ်ပြိုၚ်မာဲဂှ်ဟွံဂွံတီဏီ ညးဒေသၜဳလေၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်ရ။
“ရမျှာၚ်ဗော်ပရေၚ်ဍုၚ်ကွာန်တံ ချဳဒရာၚ်လ္တူဍုၚ် ဟွံဂွံမိၚ်ပုဟ်။ ပ္ဍဲကွာန်တံလေဝ် ပရေၚ်ချဳဒရာၚ် ဟၟဲပုဟ်။ ယၟုအလံၚ်အမာတ်ညးစၞးတံလေဝ် ပိုဲဟွံဂွံတီပုဟ်။ နူဗော်လဵုညးလဵုညးလဵု ပိုဲဟွံဂွံတီပုဟ်။ ဥပမာ အလံၚ်အမာတ် စၠတ်ထဝ်ကောန်ဂကူ ညးလဵု၊ အလံၚ်အမာတ် စၠတ်ထဝ်ညးဍုၚ်ကွာန် ညးဂှ် အလံၚ်အမာတ် ရးဒေသဇၞော် ညးလဵု ပိုဲမုလေဝ် ဟွံဂွံတီဏီပုဟ်” သာ်ဝွံ သ္ဂးရ။
အလံၚ်အမာတ်ညးစၞး ဗော်ပရေၚ်ဍုၚ်ကွာန်ဗွဲမဂၠိုၚ် ပရေၚ်စှ်ေ ချဳဒရာၚ်စန်ဒက်မာဲဟၟဲ ဒှ်မံၚ်ဂှ်တှ်ေ ဟိုတ်နူကဝ်မယှေန်ပၞာန် ကေတ်ကဵုတာလျိုၚ် ပရေၚ်ဂီုကၠီုဟွံမာန်ဒှ်မာန်ဂှ်ကီု ဂကောံဇြဟတ်ပၠန်ဂတးတံ ဇြဟတ်ခိုဟ်မံၚ်လေဝ် ဒှ်မာန်ရောၚ် ညးဆက်ဟီုရ။
ဒၞာဲလ္တူဍုၚ်ကဝ်မယှေန်ပၞာန် ထိၚ်ချုက်ဂွံလဝ်ပေၚ်ၚ်လ္တူဍုၚ်ဂှ်လေဝ် ဟွံဂွံဆဵုပရေၚ်ဗော်တံ စန်ဒက်ချဳဒရာၚ်ကီုတုဲ ကောန်ဗော် ညးတံကဵုညးတံ ဆၜိုတ်ကောံဓရီု ဆဵုဂ္ဗညးသ္ကံရ ဂွံဆဵုကေတ်မံၚ်ရဂှ် ညးဒေသမတ်မလီုမွဲတၠ ဟီုကဵုဌာန်ပရိုၚ်သြၚ်လောန်တိုၚ်ရ။
“ပြဟ်ဟ်ဏံ ဗော်ချဳဒရာၚ် ဟွံဂွံဆဵုပုဟ်။ ကောန်ဗော်ညးတံကဵုညးတံ ကောံတုဲကောံဓရီု ဆဵုဂဗ ချဳဒရာၚ်မံၚ်ဂှ် ဂွံဆဵု။ စှ်ေအာသ္ၚိတုဲ ဗက်စန်ဒက်မာဲ ကၠောန်ပရေၚ်စန်ဒက်တံ ကၠောန်ပေါဲဟီုတွံတံ ဟၟဲဏီ” သာ်ဝွံ သ္ဂးရ။
ဗော်အပ္ဍဲဒေသ လုပ်ပြိုၚ်မာဲ ဗွဲမဂၠိုၚ်ဂှ်တှ်ေ ဗီုအခိၚ်ကၠာတေံ အလံၚ်အမာတ်ဗော်ညးတံ ဟွံဂံၚ်စှ်ေစန်ဒက်မာဲ ပ္ဍဲကဵုဗလးတိတုဲ အဓိကစကာမံၚ်အန်လိုၚ် စက်ဒက်မာဲတံဂှ် ဂွံဆဵုမံၚ် ရ။
ဗော်လုပ်ပြိုၚ်မာဲတံ စှ်ေမံၚ်ပရေၚ်စန်ဒက်ကီု ချဳဒရာၚ်ကီုဂှ် ဒဵုကဵုကြပ်တိုန်အခိၚ်ရုဲမာဲ ပြဟ်ဟ်ဏံ မုလေဝ်ဟၟဲဏီပုဟ်ဂှ် ညးဒေသမုဟ်ဍုၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်ရ။
“ပြဟ်ဟ်ဏံ လပါ်ပိုဲ ဗော်တံ ဟွံစချဳဒရာၚ်ဏီ။ ပြဟ်ဟ်ဏံ ဗက်စန်ဒက်မံၚ်တံ မုတံဟၟဲဏီ။ စှ်ေပရေၚ်စန်ဒက်မုလေဝ်ဟၟဲဏီ။ ဟွံတၟေၚ်ပုဟ်။ ဟွံဂွံဆဵုပုဟ်။ ဗော်တံပရေၚ်ချဳဒရာၚ်ဟၟဲလေဝ် မၞိဟ်တံကၠုၚ်ကဵုစရၚ်စုတ်မာဲ ကၠုၚ်ရံၚ်စရၚ်မာဲ ပ္ဍဲကဵုရုၚ်အုပ်ဓုပ်ညိဂှ် ဆဝ်ဗ္ၚုဟ်မံၚ်။ ဗော်တံ မုတံ ချဳဒရာၚ်ဂှ် မုဟွံဆဵုဏီ” သာ်ဝွံ သ္ဂးရ။
မွဲလပါ်ပၠန်ဂှ်လေဝ် အလံၚ်အမာတ်တံ ဂွံစှ်ေစန်ဒက်မာဲမာန်ဂးတုဲ နူကဵုကဝ်မယှေန်ပၞာန် သၠုၚ်လဝ်ပရေၚ်ဂီုကၠီု ပ္ဍဲဒေသဇၟာပ်ပ်တ္ၚဲတုဲ ပရေၚ်မာတ်ဆိုအ်ဂၠိုက်ဂၠာဲ ရပ်ထိၚ်မံၚ်တံဂှ် ကၠောန်မံၚ်အရိုဟ်တ္ၚဲရ။
ပေါဲရုဲမာဲကဝ်မယှေန်ပၞာန်ကၠောန်အာ ပ္ဍဲကဵုတွဵုရးမန်ဏံဂှ် အလံၚ်အမာတ်ပုဂ္ဂလမွဲတၠကီု နူဗော်ပရေၚ်ဍုၚ်ကွာန် ၉ ဗော် သီုကဵုအလံၚ်အမာတ်ညးစၞး သီုဖအိုတ် ၂၅၀ တၠပြၚ် သွက်ဂွံလုပ်ပြိုၚ်အာပတိုန်လဝ်စရၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media