မတ်မလီု ၊ နိုဝမ်ပါ ၁၇
ပ္ဍဲကဵုတွဵုရးမန် သွက်ဂွံတိုန်ဘာ အရာယိုက်ဂၠေၚ်ဝန်ပၞာန် လၟေၚ် ၁၉ ဂှ် သၟတ် ၂၀၀ ပြၚ် နဒဒှ်ကောန်ပၞာန်တၟိ ဒးဒုၚ်ပကောံလဝ်ရဂှ် ဂွံတီနူ တင်လလောၚ်တြး ကဝ်မယှေန်ပၞာန်တံရ။
ဂကောံအလဵုအသဳတွဵုရးမန် ကဝ်မယှေန်ပၞာန်ခါန်ကၞက်လဝ်တံ ပ္ဍဲနဝ်ဝမ်ပါ ၁၄ ဂှ် အာဆဵုဂဗလဝ်ကုသၟတ်ဂမၠိုၚ် ဒးဒုၚ်ပကောံလဝ် သွက်ဂွံယိုက်ဂၠေၚ်ဝန်ပၞာန် ပ္ဍဲကဵုဘာပၞာန် သၟဝ်တဲဌာန်ဂအုပ်ပၞာန်ရးအဂၞဲရ။
ပ္ဍဲပေါဲဆဵုဂဗဏံဝွံ သွက်ရဲတိုန်ဘာပၞာန်တံဂှ် ကဵုဏာလဝ်အထံက်ပၚ် ကယျိုၚ်တုပ်သၟဟ်တံကဵု သြန်အထံက်ပၚ်နွံမံၚ်ရောၚ် လပါ်ကဝ်မယှေန်ပၞာန် ပတိတ်လဝ်ပရိုၚ်ရ။
ပ္ဍဲကဵုရဲဒးဒုၚ်ပကောံဏာ နဒဒှ်ကောန်ပၞာန်တၟိတံဏံမ္ဂး ရဲလိၚ်ထပက်လဝ်အဇာတံကီု၊ ရဲဒးဒုၚ်သွံစလဝ်၊ ရဲဒးဒုၚ်ရပ်ဏာ အတေၚ်အဓ္ဓမ၊ သွက်ယိုက်ဝန်ပၞာန် ရဲဒးဒုၚ်ကော်လဝ်တံကဵု ရဲဒးဒုၚ်တံၚ်ပဝ်တာတံ ပါလုပ်မံၚ်ဂၠိုၚ်အိုတ်ရောၚ်။
အတိုၚ်သြၚ်လောန်တိုၚ်မ် ကံက်ဂွံလဝ်တၚ်နၚ်တံမ္ဂး ပ္ဍဲတွဵုရးမန် စနူကဵုဘာတန်ဗတောန်ကွတ် ယိုက်ဝန်ပၞာန် နူလၟေၚ် (၁) ဒဵုကဵုလၟေၚ် ၁၈ ဂှ် သ္ဂံၚ်ယိုက်ဂၠေၚ်ဝန်ပၞာန် ဟွံအောန်နူကဵု ၃၃၀၀ ဒးဒုၚ်ပကောံလဝ် ကောန်ပၞာန်တၟိရ။
ရဲဒးဒုၚ်ပကောံလဝ်ကောန်ပၞာန်တၟိ သၟတ်တံဏံဂှ်တှ်ေ စှ်ေဘာပၞာန်ဗက်ဟွံဂတာပ် မွဲအလန်ဓဝ် ဒးဒုၚ်ပလံၚ်ဗစိုပ်ဏာ မုက်ပၞာန်တေံဂှ်တှ်ေ ဒးဝပ်ချိုတ်ဂၠိုၚ်မံၚ်ရောၚ် ဂွံလဝ်ပရိုၚ် နူရိုဟ်ကၞက်အပ္ဍဲဒပ်ပၞာန်တံရ။
မွဲပလပါ်တေံပၠန် သွက်ဂွံပံက်အာဘာပၞာန် ဇၟာပ်ပ်ဂိတုတံမာန်ဂှ် ကဝ်မယှေန်ပၞာန်တွဵုရး ကဵုဇြဟတ်ဟရိုဟ်ဘပဠလဝ် သ္ကိုပ်အုပ်ဓုပ်ကွာန်/အရာပ် လ္တူဍုၚ်တံနွံတုဲ သ္ကိုပ်ပရေၚ်အုပ်ဓုပ် ပလံၚ်နၚ် ကောန်ပၞာန်တၟိဟွံမာန်တံဂှ် ဒးပလှ်ပတိတ်ထောံ နူကဵုတာလျိုၚ် ရ။
အတိုၚ်တၚ်နင် ကဝ်မယှေန်ပၞာန်ကဵုလဝ်ဂှ်မ္ဂး အလုံဍုၚ်မွဲ စနူကဵုဘာတန်ဗတောန်ယိုက်ဝန်ပၞာန် လၟေၚ် ၁ ဒဵုစိုပ်လၟေၚ် ၁၈ ဂှ် ညးဒးပကောံလဝ် ကောန်ပၞာန်တၟိယိုက်ဝန်ပၞာန် ကြပ်နွံ ၇၀,၀၀၀ ဒှ်ကၠုၚ်ရ။
ပရိုၚ်-သြၚ်လောန်တိုင်မ်
ဗီုရုပ် – MOI