ကွာလာလာန်ပူ၊ နိုဝမ်ပါ ၁၅
အကြာသေံကဵုခမေန် ဆေင်စပ်ကဵုပရေၚ်ဒေသပယျဵု အသိၚ် ကလေၚ်သၠုၚ်တိုန်ပၠန်တုဲ ပွမသဳကၠဳ ပရေၚ်ၜိုဟ်လလမ် အကြာၜါဍုၚ်ဏံ ဒုၚ်တဲကၠောန်ကဵုရောၚ် ပ္ဍဲမလေဝ်ယှာ ဟီုဘိက်လဝ်ဂှ် သွက်ဂွံသောၚ်ကလးအာ နနဲၜိုဟ်ဟ်သြိုဟ်ဟ်ရောၚ် က္ဍိုပ်သ္ကိုပ်ၜါဍုၚ်တံ ကဵုလဝ်ကတိပါင်ရ။
သ္ကိုပ်ဝန်ဇၞော် မလေဝ်ယှာ အန်ဝါ အေဗရာဟေန်ကဵု ဝန်ဇၞော်ပရေၚ်ဍုၚ်သ္အာၚ် မိုဟာမက် ဟာသေန်တံ ဟီုဘိက်လဝ် ပ္ဍဲကဵုနိုဝမ်ပါ ၁၃ မဒှ်ရ။
အခေါင်ညးလဵုမွဲဟွံဒးကေတ်မွဲသာ် စွံဇြိုဟ်နက်ကဵုပရေၚ်ဂုဏ်ဖဵု နိဂီုဍုၚ်သေံတုဲ အလဵုအသဳပိုဲတံ ရေၚ်တၠုၚ်အာရေၚ် သ္ကိုပ်ဝန်ဇၞော်သေံ အနုတေန် ဟီုဂးလဝ်ရ။
အပ္ဍဲသတ္တဟလၟုဟ် ဟိုတ်နူဒှ်လဝ်ပေါဲဗတိုက် ပ္ဍဲကဵုဒေသပယျဵုဂှ်တုဲ အကြာသေံကဵုခမေန် မွဲလပါ်ကဵုမွဲလပါ် တၚ်မံၚ်ဒုဟ်ညးသ္ကံရ။
ပ္ဍဲကရပ်ပယျဵုခမေန် ဟိုတ်နူမာၚ်တပ်တိ ခတိုဟ်လဝ်ဂှ် ကောန်ပၞာန်သေံတံ ဒးအာဝပ်တုဲ ပရေၚ်ထမံက်မံၚ်ရုပ်ရဴ ပရေၚ်ၜိုဟ်လလမ်တံဂှ် သေံဗဒေါအ်ထောံလဝ် ညံၚ်ဂွံကလေၚ်ဒုၚ်ဂုဏ် သေံအာတ်မိက်လဝ်ရ။
ဟိုတ်နူပရေၚ်ပန်ပှော်အကြာၜါဍုၚ် ကောန်ကွာန်ချိုတ်မွဲတၠတုဲ ပ္ဍဲနဝ်ဝမ်ပါ ၁၃ ဂှ် ကောန်ကွာန်ခမေန်ဒေသပယျဵု မွဲကွာန်ဂှ် ဒးပြံၚ်ဆုဲတိတ်အာ ဒၞာဲဗၠးဘဲအန္တရာဲတံရ။
ဒဒှ်ရ ညးတေံကေတ်အဆက်ဟီုဂးလဝ်ဖုၚ်ကု သ္ကိုပ်ဝန်ဇၞော်သေံ၊ သ္ကိုပ်ဝန်ဇၞော်သေံတံကီု သ္ကိုပ်ဝန်ဇၞော် မလေဝ်ယှာ ချူလဝ်လ္တူ Facebook ညးတေံ ပ္ဍဲနဝ်ဝမ်ပါ ၁၃ ရ။
သွက်ဂွံသောၚ်ကလးအာပြဿနာ အကြညးတံၜါဍုၚ် နနဲၜိုဟ်သြိုဟ်ဂှ် က္ဍိုပ်သ္ကိုပ်သေံကီု ခမေန်ကီု သီုၜါတၠ ကဵုလဝ်ကတိဖိုအ်ရောၚ် သ္ကိုပ်ဝန်ဇၞော်မလေဝ်ယှာ အာန်ဝါ ဟီုရ။
ပ္ဍဲကဵုပေါဲဗတိုက်အကြာၜါဍုၚ် ဒှ်လဝ်ဂိတုဂျူလိုင်တေံ မၞိဟ် ၄၃ တၠချိုတ်လဝ်တုဲ မၞိဟ် ၃ ကိုတ်ပြၚ် ဒးပါဲဒဴလဝ်ဘဲပၞာန်ရ။
ဗွဲကြဴ နကဵုပရေၚ်ပညဳပညပ် မလေဝ်ယှာ၊ အမေရိကာန်တံဂှ် ထပက်လဝ်စၟတ်တဲ တၚ်တုပ်စိုတ်ပရေၚ်ၜိုဟ်လလမ်ရ။
အခိၚ်ထမံက်မံၚ်ရုပ်ရဴ တင်တုပ်စိုတ်ဏံဂှ် ပ္ဍဲကရပ်ဒေသပယျဵု ဟိုတ်နူမါၚ်ခတိုဟ်အာတုဲ ကောန်ပၞာန်သေံတံ ဒးအာဝပ်ဂှ် အကြာၜါဍုၚ်ဏံ ကလေၚ်ကြံၚ်မ္ၚိုဟ်တိုန် မဒှ်ရ။
Ref:Agencies