မတ်မလီု ၊ နိုဝမ်ပါ ၁၇
ဟိုတ်နူလၟေၚ်တရဴ က္ဍိုပ်သ္ကိုပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ကၠုၚ်စိုပ်တွဵုရးမန် ဍုၚ်မတ်မလီုနွံတုဲ ဝိုၚ်ဝေင်ကၠောန်ဗ္ဒျ်မံၚ် အပ္ဍဲဍုၚ်တံဂှ် ကဵုမာတ်စွံလဝ်ဗွဲယာယဳမွဲချိုန်ခဏရောၚ် သ္ကိုပ်ပရေၚ်အုပ်ဓုပ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
အတိုၚ်သ္ကိုပ်ဝန်ဇၞော် တွဵုရးမန်ဥူအံၚ်ကျဳတိၚ် ကဵုလဝ်အခေါၚ်ဂှ် ညံၚ်ရဴလုပ်မံၚ်ဗဗွဲသၞောဝ် ပ္ဍဲကဵုကၠောန်ဗ္ဒျ်သဘၚ်ပေါဲ သဘၚ်ကျာ်၊ လံၚ်ဗဗေၚ်ဇၞော်ကဵု ပရေၚ်တၞဟ်ဟ်တံမ္ဂး ပၠုပ်ပေါဲဇာတ်တုဲ ကဵုလဝ်အခေါင် ကၠောန်ဗ္ဒျ်ဝိုင်ဝေင်တံရ။
အခိၚ်ကာလ က္ဍိုပ်သ္ကိုပ်ပၞာန် စိုပ်မံၚ်မတ်မလီုမ္ဂး ဒဵုကဵုအခိၚ် နူကၠာညးဟွံကလေၚ်စဴ ညံၚ်ဂွံမာတ်လဝ်ဝိုၚ်ဝေၚ်တံဂှ်ကဵုလဝ်စၞောန်နွံ သ္ကိုပ်ပရေၚ်အုပ်ဓုပ် နူလ္တူဍုၚ်မတ်မလီုမွဲတၠ ဟီုရ။
“ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ်စိုပ်မတ်မလီုတှ်ေ နကဵုပရေၚ်ဂီုကၠီု ညံၚ်ဂွံဒေါအ်ဇူလဝ် ပရေၚ်ပေါဲသဘၚ်တံညိ။ တရဴညးဇၞော်တံ အာကၠုၚ်နွံတုဲ ဝိုင်ဝေင်တံသီုဖအိုတ် ညံၚ်ဂွံဇူထောံ စၞောန်လဝ်နွံ။ ခါရညးကလေၚ်စဴအာမ္ဂး ကလေၚ်ကဵုအခေါင်ကၠောန်ဗီုကၠာတေံပၠန်ဏောၚ် ဟီုလဝ်” သာ်ဝွံသ္ဂးရ။
သွက်လၟေၚ်တရဴ က္ဍိုပ်သ္ကိုပ်ပၞာန် ကၠုၚ်စိုပ်မတ်မလီုဂှ် သၠုၚ်ပတိုန်လဝ်ပရေၚ်ဂီုကၠီုတုဲ ဂေတ်ဂေၚ်ထ္ၜးမံၚ်ဇြဟတ်ကီု ပ္ဍဲကဵုဂၠံၚ်ပန်သွာၚ်၊ ဂၠံၚ်ပါ်တံမ္ဂး ကောန်ပၞာန်သၟးဟွံက သီုကဵုဒပ်ဗၠာဲသၟိၚ်တံကီု ဖျေံစွံလဝ်ကၚ်ဒမၠုက်နွံရ။
တုဲပၠန် ပ္ဍဲရုၚ်ဌာနဆေင်စပ် သၟဝ်တဲကဝ်မယှေန်ပၞာန်တံပၠန် လံက်ဍာ်ဂဥုဲ ဖျောန်အရံၚ်၊ ပသောၚ်သ္အးၚးတံချောဲ၊ ဂၠံၚ်အဓိက ညးကၠုၚ်စိုပ်မာန်တံဂှ် နူကဵုဂကောံဌာနဗဂဵုလဟဵုဍုၚ်ဂှ် ဗက်ပသောၚ်ဟမိက်ကီု၊ ၚးအုပ်သၟးဟွံက ဖျာဇိုၚ်ဂၠံၚ်တံကၟဳပဵုၜက်မံၚ်ညိညနွံမ္ဂး တၞုၚ်ကၟဳဂှ်လေဝ်ကဵုပလီုထောံရ။
က္ဍိုပ်သ္ကိုပ်ပၞာန်သီအဝဵု စိုပ်ကၠုၚ်တွဵုရးကရေၚ် ဍုၚ်ဘာအၚ် ပ္ဍဲနဝ်ဝမ်ပါ ၁၅ တုဲ ဟိုတ်နူလၟေၚ်တရဴ က္ဍိုပ်သ္ကိုပ်ပၞာန်ဏံဝွံ ပတေၚ်သၠုၚ်လဝ်ပရေၚ်ဂီုကၠီုအိုတ်စောန်တုဲ ဒပ်မၚ်ပယျဵုကရေၚ်BGF, ကံၚ်သဳ ပရေၚ်ၜိုဟ်လလမ်ကရေၚ် KNU/KNLA PC ကဵု ဒပ် DKBA တံဂှ် ဒပ်ကဝ်မယှေန်ပၞာန် ဟွံကဵုအခေါၚ် လုပ်ဍုၚ်ဘာအၚ်ဂှ် ဂွံတီနူညးဒေသတံရ။
ပရိုၚ်-သြၚ်လောန်တိုင်မ်
Photo – CJ