ဇြပ်ဗု ၊ နိုဝမ်ပါ ၁၇
ပ္ဍဲကဵုတွဵုရးမန် သ္ကုတ်သၠုၚ်ကျာ ဒၞာဲဂကောံဇြဟတ်ပၠန်ဂတးဂမၠိုၚ် ထိၚ်လဝ်ဇြဟတ်ခိုဟ်ဟ်မာန် ဂၠံၚ်ဇၞော်ကၟိန်ဍုၚ် စၟတ် ၈ သ္ကုတ်ဂၠံၚ် ရေဝ်-ဇြပ်ဗုဂှ် သွက်ပရေၚ်ဂီုဂၠီုပေါဲရုဲမာဲဏံ ဒပ်ပၞာန်ဗမာဂစာန်ကၠုၚ်မံၚ်ရ။
စနူကဵု ဂိတုအံက်တဝ်ပါတေံမံက်ဂှ် ဒပ်ပၞာန်ဗပေၚ်လဝ်ဇြဟတ် ပ္ဍဲကဵုရေဝ်သၟဝ်ကျာတုဲ ထပက်မံၚ်ပၞာန် သ္ကုတ်ဂၠံၚ်ရေဝ်-ဇြပ်ဗု ရဂှ် ဂကောံသုတေသန ရာမညအေန်သတဳကျု RICE ပတိတ်လဝ် လိက်ဒုၚ်စဳရေၚ် ပ္ဍဲကဵုနဝ်ဝမ်ပါ ၁၄ ဂှ်ရ။
အခိၚ်သီအဝဵုတဲ ဗွဲကြဴဏံ စနူသၞာံ ၂၀၂၂ တေံရ ဒပ်ပၠန်ဂတးမန်ကဵု ဒပ်ကရေၚ်ပံၚ်တောဲတံ ထိၚ်ချုက်ချဳဒရာၚ်မံၚ် ပ္ဍဲကဵုသ္ကုတ်ဂၠံၚ်ရေဝ်-ဇြပ်ဗုဂှ်တှ်ေ ဒပ်ပၞာန်ဗမာ ဒးသ္ပလဝ်ပဓါန် ဂၠံၚ်ဍာ်အဓိကဒှ်ကၠုၚ်လဝ် ဗၞတ်ကဵုသၞာံရ။
ဒၟာနူဒပ်ပၞာန် ဒးဗလးလဝ်တဲပ္ဍဲကဵုဒေသဏံဂှ်တှ်ေ အခိၚ်လၟုဟ်သွက်ဂွံကလေၚ်ထိၚ်ချုက် သ္ကုတ်ဂၠံၚ်ဍာံတံဏံ ပၟိက်ဇၞော်ကၠုၚ်ဂှ်ကီု ကလေၚ်ထိင်ချုက်သ္ကုတ်ဂၠံၚ်ဏံဂွံမှလေဝ် သွက်ပရေၚ်ဂီုကၠီုပေါဲရုဲမာဲသ္ကုတ် ၂ ပ္ဍဲကဵုပွိုၚ်ဍုၚ်ဇြပ်ဗုကဵုရေဝ်တံဂှ် ဒုၚ်ကဵုလျိုၚ် မာန်ရောၚ် RICE သ္ၚဳဂၠိပ်လဝ်ရ။
ပေါဲရုဲမာဲညံၚ်ဟွံဂွံဒှ် စကာအာဂၠံၚ်ဍာန်အန္တရာဲညးဍုၚ်ကွာန်တံ ညံၚ်ဂွံအောန်ဂှ်တုဲတဝ်စၞေဟ်ဗ္တိုက်အာ ဒပ်ပၞာန်ဗမာရောၚ် သ္ကိုပ်ဌာနပရေၚ်စဵုဒၞာ ကံၚ်သဳဖိတ်ဒရေဝ်ဍုၚ်မန် MSFC နာဲတလနာဲ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ပေါဲရုဲမာဲညံၚ်ဟွံဂွံဒှ် နဲလဲပိုဲစဵုဒၞာအာရောဟီုတှ်ေ မုက်ဂၞန် ၁ ပေါဲရုဲမာဲအလီ ကံၚ်သဳပၞာန်ကၠောန်ဏံ ညးဍုၚ်ကွာန်တံ ညံၚ်ဟွံဂွံပါလုပ်အာ နဲကဲစုၚ်င် ပိုဲစန်ဒက်ကဵုအာပညာ ညးဍုၚ်ကွာန်တံ ကိစ္စဗီုတံဏံ ပိုဲတံကၠောန်အာဏောၚ်။ မွဲပၠန် ပေါဲရုဲမာဲညံၚ်ဂွံဒှ် ကံၚ်သဳပၞာန်ဂစာန်ကၠောန်တွဵုဏောင်တှ်ေ ပိုဲခါရ ဗတိုက်အာကံၚ်သဳပၞာန်တှ်ေ ဂၠံၚ်ဍာန်ဒှ်အန္တရာဲအောန်အိုတ် ပိုဲကၠောန်အာတုဲ ပေါဲရုဲမာဲညံၚ်ဟွံဂွံဒှ် အတိုၚ်ကံၚ်သဳဖိတ်ဒရေဝ်ဍုၚ်မန်ဖျေံလဝ်လစွံစိုတ်ဂှ် ပိုဲရေၚ်တၠုၚ်အာဏောင်” သာ်ဝွံ သ္ဂးရ။
ပ္ဍဲကဵုတွဵုရးမန်နွံမံၚ် ၁၀ ပွိုၚ်ဍုၚ်ဂှ် ပ္ဍဲကဵုသၞာံဏံအိုတ်ကဵု သၞာံဂတတေံမံက်မ္ဂး ကဝ်မယှေန်ပၞာန်ပါ်လဝ်သ္ကုတ် ၁ ကဵု ၂ တုဲ မွဲဝါတှ်ေ ၅ ပွိုၚ်ဍုၚ် သွက်ဂွံကၠောန်အာနွံမံၚ်ရ။
သ္ကုတ် ၁ မ္ဂး ပွိုၚ်ဍုၚ်ကျာ်ထဝ်၊ သဓီု၊ မတ်မလီု၊ ၜါသွာၚ်ကဵု ကျာ်မြဟ်တံပါတုဲ ပ္ဍဲကဵု သ္ကုတ် ၂ ဂှ်တှ်ေ ၜဳလေၚ်၊ ပံၚ်၊ မုဟ်ဍုၚ်၊ ဇြပ်ဗုကဵု ပွိုၚ်ဍုၚ်ရေဝ်တံပါလုပ်မံၚ်ရောၚ် ဂွံတီကေတ်နူကဵု ကဝ်မယှေန်ပေါဲရုဲမာဲကၟိန်ဍုၚ်ရ။
ဟိုတ်ဂှ်ရ ပေါဲရုဲမာဲသ္ကုတ် ၂ သွက်ဂွံကၠောန်အာ ပ္ဍဲကဵုဂျာန်နဝါရဳ ၁၁ မဒှ်တုဲ သွက်ဂွံကလေၚ်ထိၚ်ချုက်အာ သ္ကုတ်ဂၠံၚ်ရေဝ်-ဇြပ်ဗုတံမာန်ဂှ် သှ်ေမံၚ် ၅၀ တ္ၚဲပြင်ညိရ။
ပြဟ်ဟ်ဏံ ပ္ဍဲကဵုသ္ကုတ်ဂၠံၚ်ရေဝ်-ဇြပ်ဗုဂှ် အကာဲအရာမုက်ပၞာန်ၜါ လပါ်ဆေင်လဝ်မုက်ဒှ်မံၚ်တုဲ သွက်ဒှ်ပၞာန်မ္ဂး နကဵုပရေၚ်ဍုၚ်ကွာန်၊ ပရေၚ်ပၞာန်၊ ပရေၚ်ပိုန်ဒြပ်တံမ္ဂး ဒှ်အရာပရေၚ်ကိစ္စဇၞော်ကီု လပါ်ဂကောံဇြဟတ်ပၠန်ဂတးတံပၠန် ပရေၚ်ပၞာန်သၟးဟွံက သွက်သိက္ခာလေဝ် ဒှ်အရာကိစ္စဇၞော်ကီုရောၚ် RICE သ္ဂးလဝ်ရ။
ပ္ဍဲကဵုပွိုၚ်ဍုၚ် သွက်ဂွံကၠောန်အာပေါဲရုဲမာဲဏံ အကြာဂိတုတံဏံမ္ဂး ဒပ်ပၞာန်သွက်ဂွံထပက်ကရောၚ်ပၞာန် ဇြဟတ်ဇၞော်ဇၞော် ပလေဝ်ပလေဝ်စမံၚ်ရောၚ်ဂှ် ဂွံလဝ်ပရိုၚ်တုဲ အကြာၜါ်လပါ်ပေါဲဗတိုက်ဒှ်ကၠုၚ်မာန်ရောၚ် နာဲတလနာဲ ဟီုရ။
“အတိုၚ်ကံၚ်သဳပၞာန် လလောၚ်တြးလဝ် ပွိုၚ်ဍုၚ်ကၠောန်အာပေါဲရုဲမာဲဏံဂှ်တှ်ေ ဍေံတံသွက်ဂွံကၠောန်အာပေါဲရုဲမာဲဂှ် ဒှ်ချိုတ်ပၠိုတ်ရ ပ္ဍဲအကြာဂိတုဂတး ပ္ဍဲဒေသတံဏံ ဍေံတံပလေဝ်ပလေတ်စလဝ် သွက်ဂွံထပက်ကရောၚ်ပၞာန်ဇၞော်ကဵုဇြဟတ်နွံ နူလပါ်ပိုဲဏံ ဂွံလဝ်ပရိုၚ်။ ဟီုဟဂှ်တှ်ေ ပ္ဍဲကဵုပွိုၚ်ဍုၚ်ကၠောန်ပေါဲရုဲမာဲတံ ကရောၚ်ပၞာန် ကံၚ်သဳပၞာန် သွက်ဂွံထပက်ကၠုၚ်ဇြဟတ်ဇၞော်ဇၞော်ဂှ် ချိုတ်ပၠိုတ်မံၚ်တုဲ ဒှ်ပေါဲဗတိုက်ကဵုပိုဲမာန် ချိုတ်ပၠိုတ်” သာ်ဝွံ သ္ဂးရ။
ပ္ဍဲပွိုၚ်ဍုၚ်ရေဝ်သၟဝ်ကျာ ကရောၚ်ပၞာန်ထပက်ကၠုၚ် ကရပ်ကွာန်ကၞေၚ်တၟံဂှ် ၜါအလန် ဒှ်ကၠုၚ်ပေါဲဗတိုက်ကဵု ဒပ်ပံၚ်တောဲဂကောံမဟာမိတ်ပၠန်ဂတး ကံၚ်သဳဖိတ်ဒရေဝ်ဍုၚ်မန် MSFC၊ သၟဝ်တဲပရေၚ်ကောပ်ကာဲ ဌာနပရေၚ်စဵုဒၞာ MSRF, YPDF တံ ပ္ဍဲနဝ်ဝမ်ပါ ၁၁ တေံရ။
တုဲပၠန် ဒပ်ပံၚ်တောဲပၠန်ဂတးတံထိၚ်လဝ် ဗ္ဒိုပ်ဗၠာဲသၟိၚ် နှေဟ်ခြေၚ်ကဵုပ္ဍဲပွဳပွူကွာန်တံဂှ် ဒပ်ပၞာန် သွက်ဂွံကလေၚ်ဖျေံသ္ဇိုၚ် ထိၚ်ချုက်အာမာန် နကဵုသ္ကိုပ်ဒပ်ဗၠာဲသၟိၚ် ပါမံၚ်ကရောံကရောၚ်ပၞာန်တုဲ စိုပ်မံၚ် ပ္ဍဲကဵုတမ်ဒပ် ခလရ ၁၀၆ ရောၚ်ဂှ် ဂွံတီလဝ်နူ MSFC ရ။
“ယဝ်ရကရောၚ်ပၞာန် ဍေံတံ(ဒပ်ပၞာန်) တိုန်ကၠုၚ်တှ်ေ ပိုဲပတိုက်အာကဵု ပၞာန်ဒုၚ်ဏောၚ်။ မွဲပၠန် နကဵုပၞာန်ဒမၠုက် ကုတ်ထပိုတ်ဍေံတံတုဲ ဘိုအ်ဂွံဗတိုက်အာ ဖျေံလဝ်ဗီုနွံ” က္ဍိုပ်သ္ကိုပ် ဒပ်စဵုဒၞာရေဝ် YPDF ဗိုလ်ယာန်နိုင် ဟီုရ။
နူကဵုကွာန်အာရုတံၚ်-တၟံကၞေင် ဒဵုစိုပ်ပါၚ်ဂၠံၚ်ကွာန်နှေဟ်ခြေင်-ကွာန်အံၚ်သာယာ ပါလုပ်မံၚ်ပ္ဍဲကဵုရေဝ်သၟဝ်ကျာ မဒှ်တုဲ တမ်ဒမ် ခမရ ပိ တမ်ဒပ်၊ တမ်ဒပ် ခလရ မွဲတမ်ဒပ်ကဵု တမ်ဒပ် ဗလံက် ၃၁၇ မွဲဒပ် ဖျေံလဝ်သ္ဇိုၚ် ပ္ဍဲကဵုတိဍာ်ဏံရ။
ပြဟ်ဟ်ဏံ သွက်ဂွံထပေၚ်မၞိဟ်၊ ဇွောံမတံဂှ် ဒပ်ပၞာန်ဗမာစကာမံၚ် သၞေဟ်ပါန်ဒါ ကွာန်အစေင် မဒှ်တုဲ ပ္ဍဲကဵုသၞေဟ်ကွာန်တံင်ပြၚ်၊ ကံဍောတ်ကဵု နှေဟ်ခြေင်တံဂှ်လေဝ် လဆောဝ်လဆောဝ် စကာသုင်စောဲမံၚ်ကီုဏောၚ် ညးဒေသတံဟီုလဝ်ဂှ် RICE ချူပတိတ်လဝ်ရ။
ပရိုၚ်-သြၚ်လောန်တိုင်မ်
Photo – PDF