လံၚ်လုၚ်၊ နိုဝမ်ပါ ၁၈
ပ္ဍဲရးတနၚ်သဳ ပွိုၚ်ဍုၚ်လံၚ်လုၚ် ပ္ဍဲကဵုကွာန်ညှေင်မဝ် ကရောၚ်ပၞာန်ကဝ်မယှေန်ပၞာန် ထပက်လုပ်ကၠုၚ်တုဲ ရပ်ဂွံဏာ ကောန်သ္ဂံၚ် PDF ၂ တၠကဵု ကောန်ကွာန် ၂ တၠတုဲ ဂစိုတ်ထောံရဂှ် ဂွံတီနူဒပ်ပၠန်ဂတးတံရ။
ရုပ်ဇွ ကောန်သ္ဂံၚ် PDF ၂ တၠကဵု ကောန်ကွာန် ၁ တၠ ဒးဒုင်ဂစိုတ်တပ်စွံလဝ် ပ္ဍဲလက်ကရဴသ္ၚိဒၟံၚ်မၞိဟ်တံဂှ် ပ္ဍဲနဝ်ဝမ်ပါ ၁၅ ဂှ် ကလေၚ်ဆဵုတုဲ ဇွကောန်ကွာန်မွဲပၠန်ဂှ် ကလေၚ်ဆဵုပ္ဍဲနိုဝမ်ပါ ၁၆ မဒှ်ရ။
ရံၚ်ကေတ်ဗီုပြင် ဂွံဆဵုရုပ်ဇွးညးတံဒးလဝ်ဝပ်မ္ဂး ညး ၄ တၠဏံ ဒးဒုၚ်ပျဲပျာံတုဲမှဂစိုတ်လဝ်ရောၚ် ညးတာလျိုၚ် ဒပ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုင်ရ။
ကောန်သ္ဂံၚ် PDF ၂ တၠဂှ် သၟတ်အယုက် ၂၀ ပြၚ် နူဂကောံဒပ်စဵုဒၞာ ညးဍုၚ်ကွာန် ပွိုၚ်ဍုၚ်လံၚ်လုၚ်မဒှ်တုဲ ကောန်ကွာန် ၂ တၠဂှ်တှ်ေ ရဲကွာန်ညှေင်မဝ် အယုက် ၅၀ ပြင် ဥူဝေန်နိုင် ကဵုဥူတိင်အံၚ်တံ မဒှ်ရ။
အခိၚ်ကရောၚ်ပၞာန် စလုပ်ကၠုၚ်ကွာန်ညှေင်မဝ် နိုဝမ်ပါ ၁၀ ဂှ် ကောန်သ္ဂံၚ် PDF ၂ တၠ ဒးဒုၚ်ရပ်အပ္ဍဲကွာန်တုဲ ကောန်ကွာန် ၂ တၠ ဂှ်တှ်ေ ဗွဲကြဴမွဲတ္ၚဲဂှ်ဒးဒုၚ်ရပ်ဏာပၠန်ရ။
ကရောၚ်ပၞာန်ကဝ်မယှေန်ပၞာန် တိတ်အာ နူကွာန်ညှေင်မဝ် နိုဝမ်ပါ ၁၅ ကီုလေဝ် ပ္ဍဲနိုဝမ်ပါ ၁၇ ဂှ် ကရောၚ်ပၞာန် ကလေၚ်ထပ်ထပက် လုပ်ကၠုၚ်ကွာန်ပၠန်ဂှ် အကြာဒပ်ၜါလပါ်တံအကာဲအရာပၞာန် ကြံၚ်မ္ၚိုဟ်မံၚ်ရ။
ဟိုတ်နူကရောၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ်ကီု ပေါဲဗတိုက်အကြာဒပ်ၜါလပါ်တံဂှ် ညးဒေသ နူကဵုကွာန်ညှေင်မဝ်၊ လေဝ်တောန်ခါန်၊ သာတ်ပျေဝ်၊ ဂအ်အေန်တံ လၟိဟ်ကဵုလ္ၚီ ဒးဂြိပ်ပါဲမံၚ်တုဲ အကြာပေါဲဗတိုက် ဟိုတ်နူလွဟ်ဇၞော်ဖတုံခတိုဟ်အာဂှ် ညးဍုၚ်ကွာန် ၂ တၠဒးလဝ်ဝပ်နွံရ။
ပရိုၚ်-သြင်လောန်တိုၚ်မ်
Photo – Social Media