မတ်မလီု၊ နိုဝမ်ပါ ၁၈
ဂကောံကောန်ဍုၚ်အရၚ်ရပ်လွဟ် ကေတ်လဝ်ပရေၚ်ၜိုဟ်လလမ် တံဂှ်ပရေၚ်မၚ်မွဲဓရ်သစ္စ လ္တူကၟိန်ဍုၚ်ဟၟဲတုဲ သွက်ဂုဏ်ဖဵု ပရေၚ်ပိုန်ဒြပ်ညးတံ ပ္ဍဲကဵုပရေၚ်ကူသာန်ဟွံလုပ်ဗဗွဲသၞောဝ်တံဂှ် ပါလုပ်ဆက်စပ်မံၚ်ရောၚ် က္ဍိုပ်သ္ကိုပ်ပၞာန်ဟီုရ။
ပ္ဍဲကဵုနဝ်ဝမ်ပါ ၁၆ ဒၞာဲၝောံခန်တွဵုရးမန် ဍုၚ်မတ်မလီု အဃောဆဵုဂဗ ကဵုညးတာလျိုၚ်ဌာနဆေင်စပ်နာနာ၊ တၠပရေၚ်ပိုန်ဒြပ်ဂမၠိုၚ်၊ ညးဍုၚ်ကွာန်လ္ၚဵုတံဂှ် က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ဟီုလဝ်ရ။
ပ္ဍဲကဵုဒေသပယျဵုတံ ဟိုတ်နူပရေၚ်ညိၚ်ဝပ် အောန်ကၠုၚ်မံၚ်ဂှ်ရ သၞေဟ်ကၚ်ပယျဵုဒၞာဲလ္ၚဵု ဒးမာတ်လဝ်တုဲ ပရေၚ်ကူသာန်သွံရာန်ဗၞိက် ဟွံလုပ်သၞောဝ်တံပဵုတုဲဂၠိုၚ်တိုန်မံၚ် သ္ဂးရ။
ဟိုတ်နူကဵု ပရေၚ်ကူသာန်သွံရာန်ဗၞိက် ဗဗွဲသၞောဝ်ဟွံသေၚ်ဂှ်ရ သွက်ဂကောံရပ်လွဟ် နွံမံၚ်ဒေသပယျဵုတံ ဖဵုအာယုက်ပရေအ်ဂွံဂၠိုၚ်အာတုဲ အကံက်အခေါန်ထေက်ကဵုဒးဂွံတံ ဒၟာနူဟွံဂွံဂှ်သွက်ကၟိန်ဍုၚ် ပရေၚ်ယုက်ဒေက်ဒှ်အာလဝ်ရဂှ် က္ဍိုပ်သ္ကိုပ်ပၞာန်ဟီုရ။
တုဲပၠန် ပ္ဍဲကဵုဒၞာဲဒေသပယျဵုတံမ္ဂး ညးကၠောန် ပရေၚ်လီဠာန်အန်လိုင် ကဵုဝေင်ဇျှၚ်လံၚ်သြန်အန်လိုင်တံ ညံၚ်ဟွံဂွံတန်တဴမံၚ်စံၚ် ကၠောန်ၜိုဟ်ဂှ် စွံပရေၚ်ဇြိုဟ်နက်ထမံက်မံၚ်ရုပ်ရဴတုဲ ဒၞာဲသ္ဇိုၚ်ဒၟံၚ် စမြိုၚ်တံဂှ် ပသောၚ်သ္အးကၠေံထောံပိုတ်တ်ရောၚ် ဟီုလဝ်ရ။
ဒၟာနူတရဴ က္ဍိုပ်သ္ကိုပ်ပၞာန် ကၠုၚ်စိုပ်လဝ်ဍုၚ်ဘာအၚ် တွဵုရးကရေၚ် ပ္ဍဲကဵုနဝ်ဝမ်ပါ ၁၅ ဂှ် ဒပ်မၚ်ပယျဵုကရေၚ် BGF ကီု ကံၚ်သဳၜိုဟ်လလမ်ကရေၚ် KNU/KNLA PC ကဵု ဒပ် DKBA တံကီု ဟွံဂွံလုပ်အပ္ဍဲဍုၚ် မာတ်ထောံအခေါၚ်ရဂှ် ညးဒေသတံ ဟီုတုဲဂွံတီရ။
ပရိုၚ်-သြင်လောန်တိုၚ်မ်
Photo – MOI