မတ်မလီု ၊ နိုဝမ်ပါ ၁၈
ပ္ဍဲကဵုတွဵုရးမန် သွက်ဂွံတဵုလွဳအာ ကဝ်ဖဳကဵု မြေက်ဟမှေက်ဂှ် က္ဍိုပ်သ္ကိုပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ကဵုလဝ်စၞောန်ပညုၚ်နွံရဂှ် လိက်ပရိုၚ်တြးဝါဒ ကဝ်မယှေန်ပၞာန် ချူလဝ်ရ။
ဒၞာဲၝောံခန်တွဵုရးမန် ဍုၚ်မတ်မလီု ပ္ဍဲကဵုနဝ်ဝမ်ပါ ၁၆ အဃောကၠောန်လဝ် ပေါဲဆဵုဂဗကဵု ညးတာလျိုၚ်ဌာနဆေင်စပ်နာနာ အဆံၚ်တွဵုရး၊ ခရိုၚ်၊ ပွိုၚ်ဍုၚ်တံ သၟးဟွံက ညးဇၞော် မိမဍုၚ်ကွာန်တံဂှ် က္ဍိုပ်သ္ကိုပ်ပၞာန် စၞောန်ပညုၚ်လဝ်မဒှ်ရ။
တုဲပၠန် အခိၚ်ကၠောန်မံၚ် ပရေၚ်တဵုလွဳတံမ္ဂး အပ္ဍဲကဵုတွဵုရးမန် ယဝ်ရတဵုလွဳကဝ်ဖဳကဵု မြေက်ဟမှေက်တံ ကၠောန်အံၚ်ဇၞးအာမ္ဂး ပရေၚ်ပိုန်ဒြပ်သွက်ဒေသကီု သွက်ကၟိန်ဍုၚ်ကီု ပဵုတုဲတိုန်တဴတက်ကၠုၚ်မာန်ရေၚ် သ္ဂးလဝ်ရ။
ပ္ဍဲကဵုတွဵုရးမန် အကြာတဵုလဝ် တၞံရာဘာ၊ မင်ဂုတ်၊ ဒူရေၚ် စ ဍာ် သၞာံဇမၠိၚ်တံဂှ် တဵုကရေပ်စုတ် တၞံကဝ်ဖဝ် ဒၞာဲတိသဝ်မ္ဂး သြန်လုပ်ဂၠိုၚ်တိုန်မာန်ရောၚ် က္ဍိုပ်သ္ကိုပ်ပၞာန်သ္ဂးလဝ်ရ။
စနူကဵု လက်ထက်အလဵုအသဳပၞာန်ကၠာတေံရ တွဵုရးမန်ဂှ် ဒးဒှ်ၝောံဍုၚ် မြေက်ဟမှေက်ရောၚ် ဟီုလဝ်ကီုလေဝ် ဒဵုအခိၚ်လၟုဟ် ဒှ်ကၠုၚ်ဟွံမာန်ဏီ၊ အကြာတၞံဇၞော်ဇၞော်တံ တဵုပြိုက်စုတ်ကဝ်ဖဳမ္ဂး ဇြဟတ်အောန်တုဲ တၞံဇၞော်တိုန်ဟွံမာန် ဂွံဆဵုလဝ်ရဂှ် ညးတၠကမၠောန်တဵုလွဳမွဲတၠ ဟီုကဵုဌာန်ပရိုၚ်သြၚ်လောန်တိုင်ရ။
“နူကဵုအခိၚ်လက်ထက်တၠအဝဵုပၞာန် ကၠာကၠာတေံရ တွဵုရးမန်ဂှ် ဒးဒှ်ၝောံဍုၚ်မြေက်ဟမှေက်ရောၚ် ဟီုလဝ်ရ ဒဵုကဵုတ္ၚဲဏံ ဟွံဒှ်ကၠုၚ်ပုဟ်။ အကြာတၞံရာဘာဇၞော်ဇၞော် ယဝ်ရတဵုစုတ်ကဝ်ဖဳတှ်ေ ရိုဟ်ရာဘာတိတ်ဂၠိုၚ်တုဲ မုဒှ်ဟလဵုဟွံတီပုဟ် တၞံကဝ်ဖဳဇၞော်ဟွံမာန်။ ဆဂး အကြာကၠအ်အဲတဵုလဝ်တံဂှ် ဗက်အာလ္ၚတ်ရံၚ်တှ်ေ တၞံတဵုစုတ် အကြာတၞံဇၞော်ဇၞော်တံဂှ် ဇၞော်တိုန်ဟွံမာန် အဲဂွံဆဵုလဝ်” သာ်ဝွံ သ္ဂးရ။
တုဲပၠန် က္ဍိုပ်သ္ကိုပ်ပၞာန် ကဵုတဵုမံၚ် မြေက်ဟမှေက်ကဵုကဝ်ဖဳကီုလေဝ် ပ္ဍဲတွဵုရးမန်ဂှ် သွက်ကဝ်ဖဳကဵု မြောက်ဟမှေက် ဗွဝ်ဖျာတၞဟ်ခြာဟၟဲတုဲ ညးရာန်နွံဍာံမှ ပရေၚ်တဵုလွဳဏံဒှ်ဂုဏ်ဖဵုမာန်ရောၚ် ညးဆက်ဟီုရ။
မွဲလပါ်ပၠန် တၞံညးကဵုတဵုဏံ ယဝ်ရတဵုလွဳအာမ္ဂး သွက်ညံၚ်သ္ဂောံဂွံ ဍာ် ရုံရုံဂပ်ဂပ်မာန်ဂှ် ကၠောန်အာကဵုကိုန်အစဳဇန် ပၠုပ်ပတိုန်ဍာ်ကြုၚ်တံရောၚ် က္ဍိုပ်သ္ကိုပ်ကဝ်မယှေန်ပၞာန် သ္ဂးလဝ်ရ။
ပ္ဍဲကဵုဒေသ သွက်ဂွံတဵုလွဳအာ တၞံမြေက်ဟမှေက်ကဵုကဝ်ဖဳတံမ္ဂး ပရေၚ်ကိတ်ညဳမံၚ်ကဵု တိဍာ်ဒေသတံဂှ် ဒးစမ်ၜတ်အာကၠာ မဒှ်တုဲ ဟွံစမ်ၜတ်မွဲသာ် ကၠောန်ပရေၚ်ပိုန်ဒြပ်တဵုလွဳမ္ဂး ကျဟောံအာမာန်ရောၚ် ညးတၠကမၠောန်ပရေၚ်တဵုလွဳတံ ဟီုဂးမံၚ်အိုတ်ရ။
ပရေၚ်ပတိတ် ရာဘာကဵု သွံသ္ၚုတံဂှ် ပ္ဍဲကဵုတွဵုရးမန် စွံလဝ်အဓိကတုဲ တၞံဒူရေၚ်၊ သဳလဴ၊ ဗဗုၚ်၊ မၚ်ဂုတ်တံကီု ခၞေဝ်ကေဝ်နာနာတံလေဝ် ၜိုတ်သ္ပမာန်သၞောတ်ထ္ၜတ်ညးကဵုညး တွဵုလွဳမံၚ်ကီုရ။
ပရိုၚ်-သြင်လောန်တိုၚ်မ်
Photo – MOI