မတ်မလီု ၊ နိုဝမ်ပါ ၂၀
ဒပ်ပၞာန်သီထောံအဝဵုတုဲ ဟိုတ်နူပရေၚ်ပဋိပက္ခလွဟ်တံဂှ် ပရေၚ်ဇွောံမဟွံရုံဂပ် ပ္ဍဲကဵုဍုၚ်ဗမာ ဆက်နွံအာ ကဆံၚ်ဒးဂွိၚ်ဂွာဲ မံၚ်ဖိုအ်ရောၚ် ရုၚ်ပ္ညဳပ္ညပ်ဗ္စာရဏာပရေၚ်မၞိဟ် UNOCHA လလောၚ်တြးလဝ်ရ။
ရဲဒးဂြိပ်ပါဲဒဴ နူကဵုသ္ၚိဌာန်ဂၠိုၚ်တိုန်မံၚ်ဂှ် အတိုၚ်လိက်ဒုၚ်စဳရေၚ် ဂကောံပရေၚ်ဇွောံမရုံဂပ်ဂၠးကဝ် လက်ကရဴအိုတ်မ္ဂး ဟိုတ်နူပရေၚ်ဇွောံမဟွံရုံဂပ်တုဲ ဍုၚ်ဗမာဂှ် ဒၞာဲပရေၚ်ဒးဒှ်ဒဝိၚ် နွံမံၚ်သၠုၚ်အိုတ်ဏီ ဒးဆက်ဒုၚ် ခုတ်စၟတ်လဝ်ရောၚ် သ္ဂးရ။
ပြဟ်ဟ်ဏံ အကြာဒပ်ပၞာန်ဗမာကဵုဂကောံပၠန်ဂတးတံ ပ္ဍဲကဵုရးဒေသဇၞော်ကဵုတွဵုရးတံ ပဋိပက္ခဆက်ဒှ်မံၚ်တုဲ အရိုဟ်ဒဒှ်တ္ၚဲ ပန်မံၚ်လွဟ်ဇၞော်တံ၊ ပ္ဍဲဇၟာပ်ဒၞာဲ ကၠောန်ဗ္ဒျ်မံၚ်ပေါဲဗတိုက်လွဟ်တံတုဲ အကြာပရေၚ်ဒးဘဲဒဏ် ကောန်ညးဍုၚ်ကွာန်တံဏံ ပ္ဍဲကဵုဒၞာဲဗွဲမဂၠိုၚ်ဒးဂြိပ်ပါဲဒဴမံၚ် ဘဲပၞာန်တံဆက်က္တဵုဒှ်မံၚ်ဖိုအ်ရ။
ဟိုတ်နူပေါဲဗတိုက် ဒှ်ကၠုၚ်လဝ် ပ္ဍဲကဵုဂိတုအံက်တဝ်ပါကဵုနဝ်ဝမ်ပါမံက်ဏံဂှ် ကၟိန်သ္ၚိအိန်ထံၚ်ကောန်ညးဍုၚ်ကွာန် ဗွဲမဂၠိုၚ်တံ ဒးထောံစွံလဝ်သ္ၚိဌာန်ညးတံတုဲ နွံပၟိက်မံၚ်ကဵု အရီုဗၚ်ပရေၚ်ဗ္စာရဏာမၞိဟ်တံ ဂၠိုၚ်တိုန်ရဂှ် ပ္ဍဲကဵုလိက်လလောၚ်တြး ချူလဝ်ရ။
အပ္ဍဲဏံ ပ္ဍဲကဵုတွဵုရးရခေၚ် ပွိုၚ်ဍုၚ်မံၚ်တဝ်ကဵု ဗူတဳတံၚ်တံဂှ် အကာဲအရာ စၞအဟာရဟွံဍိုက်ပေၚ် ဘိုအ်ဂွံယုတ်ဒေက်စှ်ေအာ ဗွဲမပြဟ်မာန် တော်ဆလဝ်ရ။
ပြဟ်ဟ်ဏံ သၞာံ ၂၀၂၅ ဟွံအိုတ်ဏီ ၜါဂိတုဟွံပေၚ်ဍၚ်ဏံ သွက်အစဳဇန် အရာတၚ်နွံပၟိက်ပရေၚ်ဗ္စာရဏာမၞိဟ် HNRP သွက်သၞာံ ၂၀၂၅ ဂှ် ဂွံလဝ်သြန်ဖအုံ ၜိုတ် ၁၅% ဓဝ်ရောၚ် UNOCHA ကဵုလဝ်သမ္တီရ။
အကာဲအရာသြန်ဂအုံဟွံဍိုက်ပေၚ် ပရေအ်အိုတ်ဒှ်မံၚ်တုဲ ဘဝမၞိဟ်တံဂွံဂျိုၚ်တဴ သွက်ဂွံကဵုအာအရီုဗၚ်လၟိဟ်မၞိဟ် သင်ဃဲဗွဲမဂၠိုၚ်တံဂှ် ဝါတ်ခါဲမံၚ်ကွေံကွေံရောၚ် UNOCHA ကဵုလဝ် သတိကီုရ။
ဟိုတ်နူပေါဲဗတိုက်အလုံမွဲဍုၚ် က္တဵုဒှ်မံၚ်တုဲ ဒဵုကဵုဂိတုနဝ်ဝမ်ပါ သၞာံ ၂၀၂၅ ဏံ ညးဂြိပ်ဒဴပၞာန် နွံအပ္ဍဲဍုၚ် ဒဵုကဵု ၃ ဒဿမ ၆ ပြကောတိကိုဋ် ပဵုတိုန်ကၠုၚ်မံၚ် UNOCHA တော်ဆလဝ်ရ။
ပရိုင်-သြၚ်လောန်တိုၚ်မ်
Photo – ဂကောံမၚ်မွဲရီုဗၚ် ပဲါဒဴဘဲပၞာန် ရးကရေၚ်ဍာဲ