နေပျဳတဝ်၊ နိုဝမ်ပါ ၂၀
ဆေၚ်စပ်ကဵုပေါဲရုဲမာဲ လ္တူလညာတ်နာနာနွံမံၚ်တံဏံ ဘဲဒဏ်လောကပရေၚ်ဍုၚ်ကွာန်တံဂှ် ကၟိန်ဍုၚ်ကဵု ညးဍုၚ်ကွာန်တံ ညံၚ်ဒးဒုၚ်အောန်အိုတ် ဂွံဒှ်ဂှ် ဂၠာဲအာနဲကဲရောၚ် ဗော်မန်တဴတက် စန်ဒက်လဝ်မာဲရ။
နူကဵုအစဳဇန်စန်ဒက်မာဲ ဌာန်တြးဝါဒ ဒပ်ပၞာန်ထိၚ်ချုက်လဝ် ဌာနရေဒဳယောကဵု ရုပ်ရမျှာၚ်ကၟိန်ဍုၚ်ဝွံ ပ္ဍဲကဵုနဝ်ဝမ်ပါ ၁၈ အခိၚ်ဗတမ်ဂှ် ညးအုပ်ကာဗော်မန်တဴတက် မာံထောန်လောန် ဟီုတွံဏာ စပ်ကဵုမူဝါဒ၊ သဘဴလစွံစိုတ်၊ လၟေၚ်ကမၠောန် ဗော်မန်တဴတက်ရ။
ပ္ဍဲကဵုပေါဲရုဲမာဲ ဒဳဇြမ်ပါ ၂၈ ဏံမ္ဂး ပ္ဍဲကဵုတွဵုရးကရေၚ်ဂှ် ဗော်မန်တဴတက် သွက်ဂွံပြိုၚ်အာ ဒၞာဲဝန်ဇၞော်ဂကူမန်ကီု သီုဖအိုတ် ဒၞာဲဆန္ဒမာဲ ပိဒၞာဲဂှ် အလံၚ်အမာတ် ပိတၠတံ လုပ်ပြိုၚ်အာရောၚ်။
ဗော်ပရေၚ်ဍုၚ်ကွာန်ဍောတ်တ် သ္ပစၞးကောန်ဍုၚ်အရၚ်ဂှ်လေဝ် ပ္ဍဲကဵုလၟေၚ်ပရေၚ်ကမၠောန် သွက်ဂွံဒက်ပ္တန်အာ ကၟိန်ဍုၚ်ဖိတ်ဒရေဝ် ဒုၚ်လဝ်သ္ဇိုၚ်သၞောတ်ဒဳမဝ်ကရေသဳကဵု ဖိတ်ဒရေဝ်ဂှ် ပ္ဍဲကဵုအခန်ကဏ္ဍ လၟေၚ်ဒဒှ်ပရေၚ်ဍုၚ်ကွာန် အရာပၟိက်ဇၞော်မံၚ်တံဂှ်ပါလုပ် ထပေၚ်အာဇြဟတ်မာန်ရောၚ် ပတေဟ်ကေတ်လဝ်ရ။
ပြဟ်ဟ်ဏံ အခိၚ်ဒးဆဵုဂဗမံၚ်ကဵု တင်အခက်အခုဲပရေၚ်ဍုၚ်ကွာန် နာနာ၊ ပဋိပက္ခဂမၠိုၚ်တံဏံ လ္တူကၠောန်အာပေါဲရုဲမာဲ လညာတ်ထေင်ခယျ နာနာသာ်၊ တင်ပ္လန်ဗီုပြၚ်စုၚ်ၚ် နွံမံၚ်ကီုရောၚ် မာံထောန်လောန် ဟီုရ။
ဗော်မန်တဴတက် ပတေဟ်ကေတ်လဝ်မ္ဂး ဘဲဒဏ်လောကပရေၚ်ဍုၚ်ကွာန် ဒးဆဵုဂဗမံၚ်တံဏံ ကၟိန်ဍုၚ်ကဵုညးဍုၚ်ကွာန်တံ ညံၚ်ဂွံဒးဒုၚ်အောန်အိုတ်ဂှ် ဂၠာဲအာနဲကဲတုဲ ဒးတတ်ထပါ် ဂါံကၠောံအာရောၚ် ပ္ဍဲစန်ဒက်မာဲဂှ် ညးဟီုတွံလဝ်ရ။
သ္ဇိုၚ်သၞောတ်ဒဳမဝ်ကရေသဳ ဗော်ဇဳ ညံၚ်ဂွံကြံၚ်မ္ၚိုဟ်တိုန်ဂှ် သွက်ဂွံဂစာန်လွဳအာ၊ သွက်ဂွံဒက်ပတန် ဍုၚ်နိဂီုဒဳမဝ်ကရေသဳ မဍိုက်ပေၚ်ကဵု ဓရ်လောကပါလ ပွမ နွံကဵုဗဗွဲဓရ်၊ ပွမသၠးပွး၊ ပွမညဳသၟဟ်တံဂှ် ဒှ်မူဝါဒ ဗော်မန်တဴတက်ရောၚ် သ္ဂးရ။
စပ်ကဵုကောန်ဍုၚ်အရၚ်တံ သီုဖအိုတ်မ္ဂး သ္ပလဝ်စၟတ်သမ္တီကဵု လက်ျှန်ဂကူ၊ ဂကောံဆေၚ်စပ်တံသၟးဟွံက သွက်ဇၟာပ် ကောန်ညးဍုၚ်ကွာန်မွဲမွဲပၠန် ညံၚ်ဂွံဒက်ပတန်အာ ဂကောံမၞိဟ် မၞုံကဵုအခေါၚ်အရာကောန်ဍုၚ်၊ အခေါၚ်အရာဒဳမဝ်ကရေသဳ အခေါၚ်အရာကောန်ဍုၚ်အရၚ်တံပေၚ်ၚ် မဒှ်ရ။
တုဲပၠန် အလုံညးဍုၚ်ကွာန်တံသီဖအိုတ် သွက်သ္ဂောံဂွံ အခေါၚ်အရာမၞိဟ်ဍိုက်က်ပေၚ်ၚ် ကေုာံ သွက်ဂွံဒုၚ်စသိုၚ်အာ ဘဝပရေၚ်မၞိဟ်ဗၠးၜးမာန် ရေၚ်တၠုၚ်အာတုဲ ပၠုပ်လဝ်အာရီုကဵု ဂုဏ်ဖဵု အလုံကၟိန်ဍုၚ်မွဲကီု မူဝါဒ ဒှ်သဟာဇာတကဵု သီုညးဖအိုတ်မာန်ဂှ် တံၚ်ဓဇက်ဖျေံဗီုထမံက်အာရုပ်ရဴရောၚ် သ္ဂးလဝ်ရ။
ပ္ဍဲကဵုကဏ္ဍပရေၚ်ဍုၚ်ကွာန်မ္ဂး သွက်ဂွံဒက်ပတန်အာ ကၟိန်ဍုၚ်ဖိတ်ဒရေဝ် ဒုၚ်သ္ဇိုၚ်ကဵုသၞောတ်ဒဳကရေသဳကဵု ဖိတ်ဒရေဝ်၊ သွက်ဂွံစဵုဒၞာမၚ်မွဲအာ အခေါၚ်အရာကောန်ဍုၚ်အရၚ် ဂကောံမၞိဟ်အောန်တံဂှ် ကဵုဖျုန်ရေၚ်တၠုၚ်အာရောၚ် စန်ဒက်လဝ်မာဲရ။
ဗွဲတၟေၚ် ပ္ဍဲကဵုကဏ္ဍကောန်ဍုၚ်အရၚ်မ္ဂး ချူခၞံအာဥပဒေ၊ နဲကဲဥပဒေတံတုဲ သွက်ဂွံစဵုဒၞာမၚ်မွဲသၠုၚ်ပတိုန်အာ အခေါၚ်အရာကောန်ဍုၚ်အရၚ်တံမာန်၊ သွက်ဂွံကဵုအာဇြဟတ်သၠုၚ်ပတိုန်ကဵု ပရေၚ်အခိုက်ကၞာကောန်ဍုၚ်အရၚ်တံ မဒှ်ရ။
ဗွဲကြဴအိုတ် အလုံဍုၚ်မွဲ သွက်သ္ဂောံဂွံပရေၚ်ၜိုဟ်လလမ်ကီု သွက်ဂွံဒက်ပတန်အာကၟိန်ဍုၚ်ဖိတ်ဒရေဝ် ဒုၚ်သ္ဇိုၚ်ကဵု သၞောတ်ဒဳမဝ်ကရေသဳကဵု ဖိတ်ဒရေဝ်ဂှ် ပံၚ်တောဲရေၚ်တၠုၚ်အာကဵု ကောဒေံကောန်ဍုၚ်အရၚ်တံမွဲစွံရောၚ် စန်ဒက်ဟီုတွံလဝ်ရ။
ပ္ဍဲကဵုသၞာံ ၂၀၂၃ တေံ အတိုၚ်ကဝ်မယှေန်ပၞာန် ချူခၞံလဝ်ဥပဒေ ပွမ သ္ပစၟတ်သမ္တီ ဗော်ပရေၚ်ဍုၚ်ကွာန်ဂမၠိုၚ်ဂှ် ဗော်သ္ပစၞးဂကူမန် ဗော်မန်တဴတက် ဒက်ပတန်လဝ် ပ္ဍဲကဵုသၞာံ ၂၀၂၄ တုဲ ဂွံလဝ်အခေါၚ်ဒက်ပတန်ဗော် စန်ဒက်အပ္ဍဲတွဵုရးကရေၚ် မဒှ်ရ။
သၟဝ်သ္ဇိုၚ်သၞောဝ်ဥပဒေ ၂၀၀၈ ကဝ်မယှေန်ပၞာန်ကၠောန်အာ ပေါဲရုဲမာဲအလီ မဒှ်တုဲ သွက်အာယုက်တၠအဝဵုပၞာန်ဂွံဂၠိၚ်ရ ဒှ်မံၚ်ဂှ် ညးဍုၚ်ကွာန်မန်တံ လ္ပပံၚ်တောဲကၠောန်ညိ သာ်ဝွံ ဂကောံဇြဟတ်ပၠန်ဂတးမန်တံ ဗတိုက်ဖအောဝ်လဝ်ရ။
ပရိုင်-သြၚ်လောန်တိုၚ်မ်
Photo – MUP