မြဝတဳ၊ နိုဝမ်ပါ ၂၀
ပ္ဍဲကဵုကမၠောန် လီဠာန်သြန်အန်လိုင်ကေုာံ ဝေင်ဇျှၚ်လံၚ်သြန်အန်လိုင် ဒေသမြဝတဳ တွဵုရးကရေၚ်တံဂှ် ဒပ်မၚ်ပယျဵုကရေၚ် BGF သၟးဟွံက ဂကောံကောန်ဍုၚ်အရၚ် ထပက်လဝ်လိက်ကသုက် NCA လ္ၚဵု လုပ်ကၠောန်မံၚ်နွံ ညးတာလျိုၚ်လလောၚ်ပရိုင် သ္ကိုပ်ပၞာန် ဇြဝ်မေန်ထောန် ဟီုရ။
စပ်ကဵုကၠောန်မံၚ် ပရေၚ်ဗတိုက်သရိုဟ် ပရေၚ်လီဠာန်ဝေင်ဇျှၚ်အန်လိုၚ် ဒေသဗြဝတဳ အကာဲအရာပံၚ်တောဲမံၚ်ကဵုဂၠးကဝ်တံတုဲ အတိုင်ညးတာလျိုၚ် ဂကောံလလောၚ်ပတိတ်ပရိုၚ် ကံၚ်သဳစဵုဒၞာ ကောန်ဂကူကေုာံ ပရေၚ်ဂီုကၠီု သ္ကိုပ်ပၞာန် ဇြဝ်မေန်ထောန် ဟီုဂးလဝ်ဂှ် ပ္ဍဲနဝ်ဝမ်ပါ ၁၉ ချူလဝ် ပ္ဍဲကဵုလိက်ပရိုၚ်တြးဝါဒ ဒပ်ပၞာန်ဗမာတံရ။
ဟွံဂွံလဝ်အခေါၚ်မွဲသာ် စမြိုၚ်သိုၚ်ခၞံလဝ် ၃ မ အပ္ဍဲတိဍာ်ယှိုဲကုက်ကို သၟဝ်ကျာဗြဝတဳဂှ် ဂကောံပံၚ်တောဲဂီုကၠီု ကဝ်မယှေန်ပၞာန်ကဵု ဌာနဆေင်စပ်တံ လုပ်ပသောၚ် ပ္ဍဲကဵုနိုဝမ်ပါ ၁၈ ဂှ်တှ်ေ ရပ်ဂွံနၚ် ကောန်ဍုၚ်မ္ၚး ၃၄၆ တၠ၊ ဖုၚ်ဗ္ဒာဲ ၁၀၀၀၀ မ၊ သီုကဵုကပေါတ်ဆက်စပ် စကာသုၚ်စောဲလဝ် ပ္ဍဲကဵုကမၠောန် လီဠာန်ဝေင်ဇျှၚ် အန်လိုၚ်တံရောၚ် သ္ကိုပ်ပၞာန် ဇြဝ်မေန်ထောန် သ္ဂးရ။
ပ္ဍဲဒေသဗြဝတဳ ဒၞာဲကၠောန်မံၚ်ကမၠောန် လီဠာန်ဝေင်ဇျှၚ်အန်လိုၚ်တံ ၃ ဒၞာဲတံဂှ်တှ်ေ ပ္ဍဲတိဍာ်ယှိုဲကုက်ကို သၟဝ်ကျာဗြဝတဳ၊ တိဍာ် KK Park သၠုၚ်ကျာဗြဝတဳကဵု ဒေသကျံက်ခါတ် တၞုၚ်သၠုၚ်ကျာအိုတ် ဗြဝတဳတံ ကၠောန်မံၚ် လီဠာန်ဝေင်ဇျှၚ်အန်လိုၚ်ရဂှ် သ္ကိုပ်ပၞာန် ဇြဝ်မေန်ထောန် ဟီုရ။
ပ္ဍဲကဵုဒၞာဲဒေသ KK Park ကဵု ယှိုဲကုက်ကိုတံဂှ် ဒပ်မၚ်ပယျဵုကရေၚ် BGF သၟဝ်တဲဒပ်ပၞာန်ဗမာ ထိၚ်ချုက်လဝ်တုဲ ပ္ဍဲကဵုဒၞာဲဒေသ ကျံက်ခါတ်ဂှ်တှ်ေ ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA ထပက်လဝ်စၟတ်တဲ NCA ဂကောံမိတ်ဒပ်ပၞာန်ဗမာ ထိၚ်ချုက်လဝ် မဒှ်ရ။
နူကဵုဍုၚ်မွဲလပါ်(သေံ) မွဲအဆံၚ် ကောန်ဍုၚ်မ္ၚးဗွဲမဂၠိုၚ် ပြံၚ်ကၠောံစိုပ်ကၠုၚ်ဍုၚ်ဗမာ ပ္ဍဲကဵုဒေသ ၃ ဏံဒှ်တုဲ ပၟတ်ဓါတ်လလဳကဵု ပရေၚ်ဆက်စၠောံတံဂှ်တှ်ေ ဂွံလဝ် နူကဵုဍုၚ်မွဲလပါ်တေံရောၚ် သ္ကိုပ်ပၞာန် ဇြဝ်မေန်ထောန် ဟီုရ။
ဗွဲကြဴသၞာံ ၂၀၂၁ ဂှ်တုဲ ပ္ဍဲကဵုဒေသတံဏံ ဒှ်ကၠုၚ်ပေါဲဗတိုက်ဂမၠိုၚ်တုဲ ပ္ဍဲကဵုဒၞာဲတိဍာ် သ္ၚောဲခြာမံၚ်ကဵု ဍုၚ်ဗြဝတဳဂှ်တှ်ေ ဂကောံကောန်ဍုၚ်အရၚ်ရပ်လွဟ် KNU-KNLA၊ ဂကောံကောန်ဍုၚ်အရၚ်လ္ၚဵု ထပက်လဝ် စၟတ်တဲ NCA ကေုာံ ဂကောံဒုၚ်လဝ်ယၟု ဒပ်မၚ်ပယျဵုကရေၚ် BGF တံ လုပ်ကၠောန်မံၚ် ကမၠောန်လီဠာန် ဝေင်ဇျှၚ်သြန်အန်လိုၚ်တံဏံရဂှ် သ္ကိုပ်ပၞာန် ဇြဝ်မေန်ထောန် သ္ဂးရ။
ကမၠောန်လီဠာန် ဝေင်ဇျှၚ်သြန်အန်လိုၚ် KK Park ဂှ် ဟွံဆေၚ်ကဵု KNU မွဲသာ်၊ ပ္ဍဲကဵုကမၠောန်တံဏံ KNU လုပ်ကၠောန်မံၚ် တင်စောဲစပ် ဒပ်ပၞာန်ဗမာသီုဖအိုတ်တံဂှ် စဵုစးတးပါဲဏာပိုတ်တ်ရဂှ် ပ္ဍဲကဵုအံက်တဝ်ပါ ၂၆ လောန်ကၠုၚ်တေံ KNU ပတိတ်လဝ် လိက်လလောၚ်တြး ဗွဲမလုပ်သၞောဝ်ရ။
အတိုင်ညးတာလျိုၚ် ဂကောံလလောၚ်ပတိတ်ပရိုၚ် သ္ကိုပ်ပၞာန် ဇြဝ်မေန်ထောန်ဟီုလဝ် ဂကောံကောန်ဍုၚ်အရၚ်လ္ၚဵု ထပက်လဝ်စၟတ်တဲ NCA ဂှ်တှ်ေ ရန်စၞောန်လဝ်ကဵု ဒပ်ပၞာန်ကရေၚ်ပတုဲဖဵု ဒဳမဝ်ကရေသဳ DKBA မဒှ်တုဲ ပ္ဍဲဒေသကျံက်ခါတ်ဟွံက ပ္ဍဲကဵုဍုၚ်ကျာ်ပိ ပွိုၚ်ဍုၚ်လှာဒကှ်ကီု ကၠောန်မံၚ်ကမၠောန်ကျာဖျ မဒှ်ရ။
ဂကောံကၠောန်မံၚ်ကမၠောန်ကျာဖျ ဒပ်ပၞာန်ဗမာဟီုလဝ် ဒပ်မၚ်ပယျဵုကရေၚ် BGF ကဵု ဒပ်ပၞာန်ကရေၚ်ပတုဲဖဵု ဒဳမဝ်ကရေသဳ DKBA တံဂှ်တှ်ေ သွက်ဂွံဗတိုက်သရိုဟ်အာ ကမၠောန်ကျာဖျ ပ္ဍဲကဵုဒေသညးတံဏောၚ် ကေင်ဟီုလဝ်နွံရ။
ပြဟ်ဟ်ဏံ ဒပ်ကဝ်မယှေန်ပၞာန် ဆက်ပသောၚ်အာမံၚ် ဒေသ KK Park ဂှ်ကီု ပ္ဍဲကဵုဒေသယှိုဲကုက်ကိုကီု ကျံက်ခါတ်ကီု ပ္ဍဲဒၞာဲတိဍာ်လ္ၚဵုလ္ၚဵုတံလေဝ် ဖျေံအာပရေၚ်ဂီုကၠီုပေၚ်ၚ်တုဲ ဆက်ပသောၚ်သ္အးအာဏောၚ် ကဝ်မယှေန်ပၞာန် ပတိတ်လဝ်ပရိုၚ်ရ။
ကဝ်မယှေန်ပၞာန်ကဵု ဒပ် BGF တံလုပ်ပသောၚ်သ္အးမံၚ် ဒၞာဲကမၠောန်ကျာဖျ နွံမံၚ်ဒေသ KK Park ကဵု ယှိုဲကုက်ကိုတံဟီုဂှ် ဗွဲလ္တူကျာ ဆၜိုတ်ထ္ၜးစသက်က်ရဒှ်တုဲ က္ဍိုပ်ကမၠောန်ဂိုဏ်ကျာဖျဇၞော်ဇၞော်တံဂှ် နအစဳဇန် BGF ကေတ်တာလျိုၚ် ပရေၚ်ဂီုကၠီုတုဲ ပြံင်ပဆုဲကဵုလဝ်ဒၞာဲ လုပ်ဗ္ဒဗ္ဒာဲမံၚ်ဒၟံၚ် ပ္ဍဲကဵုဒေသတၞဟ်ဟ်ရဂှ် ဂွံတီနူကဵုရိုဟ်ကၞက်ပရိုၚ်ဒေသတံရ။
ပရိုင်-သြၚ်လောန်တိုၚ်မ်
Photo – Social Media

