နကဵုဥပဒေ ပေါဲရုဲမာဲ ညးဒေသၜါသွာၚ်မွဲတၠ ဒးဒုၚ်ဖျေံထံၚ် ၁၇ သၞာံ

ၜါသွာၚ်၊ နိုဝမ်ပါ ၂၁

တွဵုရးမန် ပွိုၚ်ဍုၚ်ၜါသွာၚ် ညးတြုံအယုက်ဇၞော်ဇၞော်မွဲတၠ မံၚ်ဒၟံၚ်ကွာန်ယိုက်ဂှ် နကဵုဥပဒေစဵုဒၞာပေါဲရုဲမာဲ နူကဵုကဝ်မယှေန်ပၞာန် ဖျေံထံၚ်ကဵုဒုဟ်ဒဏ် ၁၇ သၞာံရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။

စရၚ်မာဲအလံၚ်အမာတ် ပွိုၚ်ဍုၚ်ၜါသွာၚ် ဗာန်စွံလဝ် ပ္ဍဲကဵုရုၚ်ပရေၚ်အုပ်ဓုပ် ကွာန်ယိုက်ဂှ် ဥူကျဝ်မျေအ် အယုက်( ၆၅ သၞာံ) ဟစိုက်ထောံတၞးလိက် နကဵုတၚ်စောဲစပ်ဏံ ရပ်ကၠေၚ်ဏာညးတုဲ ပံက်လဝ်အမှု ပ္ဍဲနဝ်ဝမ်ပါ ၅ ရ။

ဗွဲကြဴ ကဝ်မယှေန်ပၞာန် ပတိတ်ရုၚ်ကု ဥူကျဝ်မျေအ် အခိၚ်ပွိုၚ် ၜါသတ္တဟ စၟဳစၟတ်တုဲ ပ္ဍဲကဵုနိုဝမ်ပါ ၁၉ ဂှ် ဖျေံဏာဒုဟ်ထံၚ် ၁၇ သၞာံရ။

နူကဵုရုၚ်သၞောဝ်ဓရ် ခရိုၚ်မတ်မလီုဂှ် အတိုၚ်ဥပဒေစဵုဒၞာ ပေါဲရုဲမာဲ ၝောံပိုဒ် ၂၆(က)/၂၄(က) ဖျေံဏာဒုဟ်ဒဏ်ထံၚ် ၁၇ သၞာံ မဒှ်ရ။

ဥူကျဝ်မျေအ်ဂှ် ဒှ်မံၚ်ညးဟွံပေၚ်ဒကေဝ်မွဲရောၚ် ညးဒေသတံဟီုဂးမံၚ်အိုတ်တုဲ နူကဝ်မယှေန်ပၞာန် ဖျေံဏာထံၚ်ဗီုဏံဂှ် ကောန်ညးဍုၚ်ကွာန်တံ ပါ်ပါဲမံၚ်နာနာသာ်နွံရ။

သၟတ်မံၚ်ဒၟံၚ် ပ္ဍဲကဵုဍုၚ်လ္ဂုၚ် ၃ တၠတံ ပ္ဍဲနဝ်ဝမ်ပါ ၁၉ဂှ် ဟိုတ်နူထ္ၜးလဝ်ဆန္ဒပေါဲရုဲမာဲ ကဝ်မယှေန်ပၞာန် ရပ်ကၠေၚ်ဖျေံဏာထံၚ် ကြပ် ၅၀ သၞာံရ။

သွက်ဂွံဒၞာဲတာအာ ညးဒစဵုဒစးပေါဲရုဲမာဲတံမာန် ဥပဒေစဵုဒၞာပေါဲရုဲမာဲဂှ် ပ္ဍဲကဵုဂိတုဂျူလိုၚ်တုဲကၠုၚ်တေံ ကဝ်မယှေန်ပၞာန် ခၞံဗ္ဒျ်လဝ် သၞောဝ်ဥပဒေရ။

ခၞံဗ္ဒျ်လဝ်သၞောဝ်ဥပဒေဏံတုဲဂှ် သွက်ပေါဲရုဲမာဲဂွံလီု ဆဝ်ဗ္ၚုဟ်မံၚ်စောဲစပ်တုဲ ပ္ဍဲအလုံမွဲဍုၚ် ရပ်ပံက်လဝ်အမှု မၞိဟ်ဟွံအောန်နူကဵု ၁၀၀ တၠတံဂှ်တှ်ေ ရဲသၟာအနုပညာသုခုမတံလေဝ် ပါလုပ်မံၚ်ကီုရောၚ်။

ပရိုၚ်-သြၚ်လောန်တိုၚ်မ်

Photo – MOI

Leave a Reply

Your email address will not be published. Required fields are marked *