သွက်ဂွံဗတိုက်သရိုဟ်ကျာဖျ ပံၚ်တောဲရေၚ်တၠုၚ်ကဵု ဍုၚ်ဂၠးကဝ်ရောၚ် KNU သ္ပကတိ

ဗြဝတဳ၊ နိုဝမ်ပါ ၂၁

စပ်ကဵုပရေၚ်ကိစ္စ ပတိုက်သရိုဟ် ကမၠောန်လီဠာန်သြန်အန်လိုၚ်ဍုၚ်ဗမာဂှ် နကဵုဍုၚ်ဂၠးကဝ်တံ ဗီုပြၚ်အလဵုအသဳကု အလဵုအသဳ ကၠောံဍကၠောန်ၜိုတ်တုဲ ယဝ်ရပံၚ်တောဲအာကဵုဒပ်ပၞာန်ဗမာသၟးမ္ဂး ပရေၚ်ကမၠောန်ဏံ ဟွံအံၚ်ဇၞးသၟးဟွံက လ္တူညးဍုၚ်ကွာန် ဖဵုဂုဏ်ပရေအ်ပရေအ်တံ ဇီုကပါ်ကၠုၚ်မာန်ရောၚ် KNU လလောၚ်တြး ဟီုဂးလဝ်ရ။

ပ္ဍဲအရာဍုၚ်ဂၠးကဝ်တံ ဂစာန်ဗတိုက်သရိုဟ်မံၚ် ဇာဖိုၚ်လီဠာန် သြန်အန်လိုၚ် ၜက်ပယျဵုဍုၚ်တံ၊ ပွမ ကၠောန်မံၚ်ပရေၚ်တံဏံ ကေုာံ ပရေၚ်ရာဇဝတ်ဆက်စပ်မံၚ်တံဂှ် သွက်ဂွံပံၚ်တောဲရေၚ်တၠုၚ်အာ ပ္ဍဲနဝ်ဝမ်ပါ ၁၉ ဂှ် KNU လလောၚ်ပတိတ်လဝ်ပရိုၚ်ရ။

ကမၠောန် လီဠာန်သြန်အန်လိုၚ်တံဏံ ညံၚ်ဂွံဒှ်ကၠုၚ်လဝ်ဂှ် ဒပ်ပၞာန်ဗမာမွဲနဲမွဲဗီု ကဵုလဝ်ဇြဟတ်ကီု သီုဂွံလဝ် ပရဲပရၚ် နူကဵုကမၠောန်တံဏံကီုရောၚ် KNU သ္ဂးရ။

ပံၚ်တောဲအာကဵုဂၠးကဝ်တုဲ ပတိုက်သရိုဟ်အာကမၠောန် လီဠာန်သြန်အန်လိုၚ်ရောၚ် ထ္ၜးလဝ်တုဲ နူကဵုဒပ်ပၞာန် သွက်ဂွံ သၠဲပတိုန် အရာမဆက်စၠောံ ပရေၚ်အမာတ်ကလုတ်ဍုၚ်ဂၠးကဝ် တံကီု၊ ပရေၚ်အုပ်ဓုပ်ဍေံတံ ညံၚ်ဂွံလုပ်သၞောဝ် ကေုာံ ကေတ်အခေါၚ်ခိုဟ်တုဲ စကာဟလိုၚ်အာဇြဟတ် ဘိုအ်ဂွံဆက်ကြီုကြ ဍဵုဍိုက်ပျဲပျာံအာ လ္တူညးဍုၚ်ကွာန်တံဂှ် KNU ဒှ်မံၚ်ဒွိၚ်ရောၚ် ချူထ္မံက်လဝ် ပ္ဍဲလိက်လလောၚ်တြးဂှ်ရ။

ဒပ်ပၞာန်ဗမာကဵု ဒပ်မၚ်ပယျဵုကရေၚ် BGF ပံၚ်တောဲတုဲ ဍိုက်ပလီုဗတိုက်သရိုဟ်လဝ် ဒၞာဲသေန်တာ လီဠာန်သြန်အန်လိုၚ် KK Park ဂှ်တှ်ေ ညးဂြိပ်တိတ်ကၠုၚ်လဝ်တံ စိုပ်မံၚ်ပ္ဍဲကဵုတိဍာ် ပရေၚ်အုပ်ဓုပ် KNU ကီု ဗွဲတၟေၚ် ပ္ဍဲကဵုခရိုၚ်ဒူပလာယာကဵု ခရိုၚ်ဖာအၚ်တံမ္ဂး ပြဟ်ဟ်ဏံ ဒးဆဵုဂဗမံၚ်ကဵုပြဿနာဏံ တိုက်ရိုက်ရဂှ် KNU သ္ဂးလဝ်ရ။

ရဲကျာဖျ ဂြိပ်ဒဴစိုပ်ကၠုၚ်လဝ်လၟုဟ်ဏံမ္ဂး ညးဒးဒုၚ်စကာနနဲအဓ္ဓမတံ ဟွံသေၚ်မ္ဂး သၟာကမၠောန်ကဆံၚ်သၟဝ် ပရေၚ်လီဠာန်သြန်အန်လိုၚ်တံဒှ်မာန် ခယျကေတ်လဝ်တုဲ ညးတာလျိုၚ်ဇၞော်ဇၞော်တံဂှ် ပြံၚ်ပဆုဲ စွံလဝ်ဒၞာဲတၞဟ်ဟ်ရောၚ် တော်ဆကဵုပရေၚ်တံဏံမ္ဂး ပရေၚ်ဗတိုက်သရိုဟ်မံၚ်လၟုဟ်ဏံဂှ် သောၚ်ကလးအာပြဿနာအဓိကဟွံမာန်တုဲ ပရေၚ်ဟွံညိၚ်ဝပ်တံရ အကာဲအရာသွက်ဂွံပရေအ်အာနွံမံၚ်ရဂှ် ချူလဝ်ပ္ဍဲလိက်လလောၚ်တြးရ။

စပ်ကဵုအမှုရာဇဝတ် တတ်ၜက်ပယျဵုဍုၚ် ဆက်စပ်မံၚ်ကဵုပရေၚ်လီဠာန်သြန်အန်လိုၚ် မပ္တံ ပရေၚ်လီဠာန်၊ ပွမ သ္အးသြန်ဗု၊ သွံရာန်ဂဥုဲၜူမာဲကဵု ကူသာန်မၞိဟ်တံဂှ် KNU သွက်ဂွံဗတိုက်ပလီုအာကီု၊ ညံၚ်ဂွံကၠေံကၠက်အာရန်တၟံတုဲ ပ္ဍဲကဵုပရေၚ်ဂိုတ်ဂစာန် နူကဵုဒေသကီု ဂၠးကဝ်တံကီု သီုကေတ်တာလျိုၚ်ဗွဲမဇြိုဟ်နက် သ္ပဏာကတိကဝတ်တုဲ သွက်ဂွံပံၚ်တောဲအာပေၚ်ၚ်ရောၚ်ဂှ် KNU သ္ဂးလဝ်ရ။

ပရေၚ်ဗတိုက်သရိုဟ် လီဠန်သြန်အန်လိုၚ်ကဵု ပရေၚ်ရာဇဝတ်တံဂှ် ကဵုဖျုန်သွက်ဂွံရေၚ်တၠုၚ်အာကီု သွက်ဂွံကဵုအာအရီုဗၚ်ကဵု ဍုၚ်သေံ ကေုာံဂကောံဂၠးကဝ်တံဂှ် KNU ပံက်လဝ်ဂကောံတၟေၚ် မွဲဂကောံတုဲ ချိက်ကၠောန်အာမံၚ် ပ္ဍဲဗလးတိလေဝ်နွံမံၚ်ရောၚ် KNU ကဵုလဝ်သမ္တီရ။

သေန်တာလီဠာန်သြန်အန်လိုၚ်တံကီု၊ ပရေၚ်ကူသာန်မၞိဟ်ကေုာံ ပရေၚ်ရာဇဝတ် တတ်ကၠောံၜက်ပယျဵုဍုၚ်တံဂှ် ဘပဠမံၚ် ပရေၚ်ၜိုဟ်လလမ်ဒေသကေုာံ ပရေၚ်ညိၚ်ဝပ်တံရောၚ် KNU ဟီုရ။

နူကဵုဒၞာဲ သေန်တာလီဠာန်သြန်အန်လိုၚ်တံဏံ မာတ်ဆိုအ်မံၚ်တုဲ ကောန်ဍုၚ်ဗမာကီု သၟာကမၠောန်ဆုဲပြံၚ်ဒၞာဲတံကီု ကောန်ဍုၚ်တၞဟ်ဟ် ညးဂြိပ်တိတ်ကၠုၚ်လဝ်ဗွဲမဂၠိုၚ်တံဂှ် သွက်ဂွံကဵုအရီုဗၚ်တုဲ ညံၚ်ဂွံပလံၚ်ဗစိုပ်ဏာ ဍုၚ်ကွာန်ညးတံခိုဟ်ဟ်မာန် ဒးဆက်ကဵုအရီုဗၚ် ဒးဆက်ပ္ညဳပ္ညပ်အာနွံမံၚ် KNU သ္ဂးရ။

သီုကဵုပရေၚ်ကမၠောန်တံဏံ ဂွံအၚ်ဇၞးကီု သွက်ဂွံရပ်စပ်အာ ပရေၚ်လီဠာန်သြန်အန်လိုၚ်ကေုာံ ပရေၚ်ရာဇဝတ်တၞဟ်ဟ်တံမာန် KNU နွံမံၚ်ပၟိက်ကဵု နဲကဲပညာကဵု ကသပ်ထံက်ပၚ်ရီုဗၚ်ကီု ပရေၚ်ပါ်ပါဲတၠုၚ်လအာခိုဟ်တံဂှ် ဒုၚ်တၠုၚ်ရောၚ် KNU ဟီုလဝ်ရ။

တုဲပၠန် သွက်ဂွံကဵုအာပရေၚ်စဵုဒၞာကု ညးဒးဒုၚ်ကူသာန်မၞိဟ်တံကေုာံ ညးဒးဒုၚ်စကာလဝ် ဗွဲအဓ္ဓမအတေၚ် နူကဵုဒၞာဲသေန်တာလီဠာန်သြန်အန်လိုၚ်တံဂှ် နကဵုပွဳဗွိုၚ်ဂၠးကဝ်တံ အခါရရေၚ်တၠုၚ်အာပရေၚ်ကမၠောန်မ္ဂး ညံၚ်ဂွံပံၚ်တောဲကၠောန်အာကဵု ညးချဳဒရာၚ်ပရေၚ်ဒဳမဝ်ကရေသဳတံကီု ဂကောံပရေၚ်အုပ်ဓုပ်ဒေသ သီုကဵု ဂကောံမှာဇန်တံဂှ် KNU ဗတိုက်ဖအောဝ်လဝ်ရ။

ပွမ ဒးဒုၚ်စကာလဝ်ဗွဲအဓ္ဓမအတေၚ် ဟွံသေၚ်မ္ဂး နူကဵုပရေၚ်ဍဵုဍိုက်ကေတ်ဇၞး သွက်ညးဒးဂြိပ်ပါဲလဝ်တံဂှ် သွက်ဒၞာဲဇူဒီု၊ ပရေၚ်ရီုဗၚ်အရာကာမံက်တိုန်တံကေုာံ ယန္တရာပရေၚ်ဂီုကၠီု သွက်ပရေၚ်ထံက်ပၚ်ဗ္စာရဏာမၞိဟ်တံ ဇြဟတ်ညံၚ်ဂွံခိုဟ်ဂှ်လေဝ် KNU အာတ်မိက်လဝ် ဗွဲမဇြိုဟ်နက်ရ။

သွက်ဂွံပတိုက်သရိုဟ်အာ ကမၠောန်လီဠာန်သြန်အန်လိုၚ်ကေုာံ ပရေၚ်ရာဇဝတ်ဆက်စပ်မံၚ် ပ္ဍဲဒေသအဂၞဲဏံ နူကဵုဂၠးကဝ်ဒက်ပ္တိုန် ဂကောံကေုာံ အရာဂိုတ်ဂစာန်မံၚ်တံဂှ် ဒုၚ်တၠုၚ်တုဲ ညံၚ်ဂွံပါလုပ်အာ မွဲမွဲဒၞာဲမာန် KNU သ္ပလဝ်ကတိကဝတ်ရဂှ် လလောၚ်ပတိတ်လဝ် ပရိုၚ်ရ။

ပရိုၚ်-သြၚ်လောန်တိုၚ်မ်

Photo – CNA

Leave a Reply

Your email address will not be published. Required fields are marked *