မတ်မလီု ၊ နိုဝမ်ပါ ၂၁
ပ္ဍဲကဵုတွဵုရးမန် ဍုၚ်မတ်မလီု ဒဵုဗိုၚ် ဒၞာဲဒယှ်တှ်မွဲဂှ် ကဝ်မယှေန်ပၞာန်တွဵုရး ကဵုအခေါၚ်သရိုဟ်ဖျေံတုဲ အာဗပေၚ်စုတ်မံၚ်တိ ပ္ဍဲကဵုကိုန်အစဳဇန်ဍုၚ်တၟိဂှ်တှ်ေ ညးဍုၚ်ကွာန်တံ ပါ်ပါဲမံၚ် ဇၞော်ကဵုဇြဟတ်ကီုရ။
ကဝ်မယှေန်ပၞာန်တွဵုရးမန် သရိုဟ်ဖျေံမံၚ် ဒဵုဗိုၚ်တုဲ တိတိတ်ကၠုၚ်ဂှ်တှ်ေ အာဗပေၚ်စုတ်မံၚ် ပ္ဍဲကဵုဒၞာဲကိုန်အစဳဇန်ဍုၚ်တၟိလှိုၚ် ကေုာံ သီုကဵုဒၞာဲကိုန်အစဳဇန် သၞေဟ်ၜၚ်ကျာတၟိ ကရပ်မုဟ်ဍုၚ် မဒှ်ရ။
အတိုၚ်သြၚ်လောန်တိုၚ် စၟဳစၟတ်ဂၠိုက်ဂၠာဲဂွံလဝ်ဂှ်မ္ဂး သွက်ဂွံသရိုဟ်ဒဵုဗိုၚ်ဂှ် ကဵုလဝ်အခေါၚ်ကဵု ရဲတၠကမၠောန်ဗာတ်ဟိုဝ်တုဲ တိတိတ်ကၠုၚ်တံဂှ် ကာန်ပနဳခရိုနဳမတ်မလီု ဥူမိုဝ်ကျဝ်တံ ကလေၚ်ရာန်ကေတ် မံၚ်ရ။
ပရေၚ်သရိုဟ်ဒဵုဗိုင်ဏံဂှ် ဍာ်ဇမၠိၚ်မ္ဂး ပရေၚ်သဘာဝလီုလာ်ဒှ်မာန်ကီု အန္တရာဲတိသရိုဟ်လေဝ် ဒှ်ကၠုၚ်မာန်တုဲ ဒုၚ်တဲဟွံမာန်ပုဟ် ညးလ္တူ ဍုၚ်မတ်မလီုမွဲတၠ ဟီုရ။
“ပွဳပွူသဘာဝလီုလာ်အိုတ်ရ။ ရဲမံၚ်ကြပ်ပ်တံ ဒှ်အန္တရာဲမာန်။ လောန်ကၠုၚ်ပိပန်သၞာံတေံ တိကေၚ်သရိုဟ်လဝ်နွံ။ ဘာသီမွဲမ ပါအာကရောံတိသရိုဟ်လဝ်ဂှ်ကီု။ ပွဳပွူသဘာဝလီုအိုတ်ယျ။ မွဲသၞာံကဵုမွဲသၞာံ ဍာ်ဇတ်ဂၠိုၚ်တိုန်မံၚ်။ ၜံက်သရိုဟ်ဒဵုဂှ် ညိလေဝ်အဲဟွံဒးစိုတ်ပုဟ်” သာ်ဝွံ သ္ဂးရ။
တုဲပၠန် သရိုဟ်မံၚ်ဒဵုဗိုင်ဏံ ကေတ်ပတိတ်ဇက်မံၚ် တိကီုတၟအ်ကီုနွံတုဲ ဂၠံၚ်ဍာန်လီုလာ် စိုပ်အခိၚ်ကသီုမ္ဂး ဂွိၚ်ဖေက်ဒဵုသရိုဟ်စှ်ေတုဲ သွက်ရဲမံၚ်ဇိုၚ်ဒဵုတံ အန္တရာဲဂၠိုၚ်ကွေံရောၚ် ဂွံတီရ။
ဟိုတ်နူသရိုဟ်ဖျေံမံၚ် ဒဵုဗိုၚ်ဂှ် အကြာညးဍုၚ်ကွာန်ဂမၠိုၚ် ပါ်ပါဲမံၚ်ဂှ်ရ ပ္ဍဲနဝ်ဝမ်ပါ ၂၁ ဂှ် ဂကောံစၟဳစၟတ်ဌာနစုၚ်တံ သ္ပကလောအ် အာရံၚ်လဝ် ဒၞာဲၜံက်သရိုဟ်ဖျေံမံၚ် ဒဵုဗိုၚ်ညိညကီုရဂှ် ရဲကြပ်ကဵု ကဝ်မယှေန်ပၞာန်တံ ဟီုတုဲဂွံတီကေတ်ရ။
ဒဵုဗိုင်ဂှ် ဒှ်မံၚ်ကတေၚ်ဆီ မတ်မလီုကီု ဇၟာပ်ပ်သၞာံစိုပ်အခိၚ် တ္ၚဲဂိတုပေၚ်ဒဂိုန်မ္ဂး ကၠောန်ပေါဲသဘၚ်တုဲ တ္ၚဲတၞဟ်ဟ်ဂှ်လေဝ် ရဲနူဌာန်သ္ၚောဲဇၟာပ်ပ်ဒေသတံ ကၠုၚ်လ္ၚောဝ်ကျာ်ကီုတုဲ ဒှ်မံၚ်ဒၞာဲအဓိကမွဲရ။
အခိၚ်ပၞာန်သီအဝဵုတုဲ ပ္ဍဲမတ်မလီုဂှ် ပရေၚ်ထိၚ်ဒဝ်သဘာဝ ညိလေဝ် ဟၟဲတုဲ ကဵုလဝ်အခေါၚ် သရိုဟ်ဒဵု ခါဲတိသၟးဟွံက ရုၚ်စက်အာန်တိုမိုနဳ (Antimony-ခနောက်စိမ်း) တၚ်ယုတ်ဒေက်သဘာဝလီု နွံမံၚ်ဂှ်လေဝ် ကဵုအခေါၚ်ပဂေတ်ဂြိပ်မံၚ်ရ။
ပရိုၚ်-သြၚ်လောန်တိုၚ်မ်
Photo – Social Media

