ဒေါအ်ထောံနူဂကောံ NUCC ဗွဲယာယဳဂှ် နကဵုပရေၚ်ဍုၚ်ကွာန် ပတဝ်ဏာ တင်ခိုဟ်ရောၚ် KNPP ဟီု

မတ်မလီု ၊ နိုဝမ်ပါ ၂၁

ဒေါအ်ထောံနူကဵုပါလုပ်မံၚ် ဂကောံ ကံၚ်သဳဒုၚ်ကဵုကသပ် ပရေၚ်ညဳသၟဟ်ကောန်ဂကူ NUCC ဂှ် နကဵုပရေၚ်ဍုၚ်ကွာန် ကြပ်အာတုဲ ပတဝ်ဏာတင်ခိုဟ်ဟ်ရောၚ် ဗော်ကရေၚ်ဍာဲတဴတက် KNPP ညးအုပ်ကာ ဥူအံၚ်သာန်မျေအ် ဟီုကဵု ဌာန်ပရိုၚ်သြၚ်လောန်တိုင်မ်ရ။

ဗော်ကရေၚ်ဍာဲတဴတက် KNPP ကဵု ဗော်သွးကောန်ဂကူကရေၚ် KNU တံ ပ္ဍဲတ္ၚဲအကြာတံဏံ နုက်တိတ်လဝ် နူဂကောံ NUCC ရဂှ် ပရိုၚ်မံက်မံၚ်ရ။

ပ္ဍဲအရာကိစ္စ ပွမစုက်လုက်ပရေၚ်ဍုၚ်ကွာန်ကေုာံ ကဵုသ္ဂုတ်သွာတ်ပရေၚ်ဍုၚ်ကွာန် အရာသဳကၠဳကဵုအာသ္ဂုတ်သွာတ်တံ မိက်ဂွံကဵုပလေဝ်ပလေတ်ဗီုပြၚ်တုဲ ဗွဲယာယဳနုက်တိတ်နူကဵု NUCC ရောင်၊ ပရူပရာကိစ္စတၞဟ်ဟ်ဂှ်တှ်ေ ဟၟဲပုဟ်ဂှ်လေဝ် ဥူအံၚ်သာန်မျေအ် ဟီုရ။

“ပိုဲနုက်တိတ်ယာယဳဟီုဂှ် နူကဵုလၟုဟ်ဏံ ပွမစုက်လုက်ပရေၚ်ဍုၚ်ကွာန်တံ ပဵုတုဲညံၚ်ဂွံခိုဟ်တိုန်အာ ရန်တၟံလဝ်ရ။ ပရူပရာတၞဟ်ဟ်ဟၟဲပုဟ်။ မိက်ဂွံသ္ဂးဂှ် တရဴပိုဲအာမံၚ်ဏံ ဗီုပြၚ်စုက်လုက်ပရေၚ်ဍုၚ်ကွာန် နွံဗွဲမဂၠိုၚ်။ ဟိုတ်ဂှ်တှ်ေ ဗီုဒက်ပကောံ NUCC တုဲပၠန် ပရေၚ်တံၚ်ဓဇက် AFTA တံ လၟေၚ်ကမၠောန် CPA တံ ပိုဲဖျေံသ္ဂုတ်သွာတ်ပရေၚ်ဍုၚ်ကွာန်တံ ပိုဲမိက်ဂွံကဵု ပလေဝ်အာ။ ဆၜိုတ်ဏံ တၞဟ်ခြာဟၟဲပုဟ်” သာ်ဝွံ သ္ဂးရ။

တုဲပၠန် ဒုၚ်လဝ်သ္ဇိုၚ် Bottom-up Federalism ပရေၚ်ချူသ္ဇိုၚ်ဥပဒေ ကာလအပြံၚ်သၠာဲဖိတ်ဒရေဝ် AFTA တံဂှ် တုဲမံၚ် ၈၀% တုဲ ညံၚ်ဂွံတုဲဒှ် ၜိုတ် ၂၀% ရ သှ်ေမံၚ်ဏီ ညးဆက်ဟီုရ။

သ္ဇိုၚ်သၞောဝ်ဥပဒေဏံဝွံ KNPP, KNU ကဵု ဂကောံကောန်ဍုၚ်အရၚ်ရပ်လွဟ်တံကဵု ကံၚ်သဳဖိတ်ဒရေဝ် စၞးတွဵုရး/စၞးဂကူ ၉ ဂကောံတံ စချူခၞံမံၚ်ယျဂှ် လလောၚ်တြးလဝ် ပ္ဍဲကဵုဂိတုဖေဖဝ်ပါရဳ သၞာံဏံရ။

အရာဒက်ပ္တန်ကၟိန်ဍုၚ် ဖိတ်ဒရဝ်ဒဳမဝ်ကရေသဳအနာဂတ်ဂှ် ထမံက်ရုပ်ရဴနတဲတုဲ ညံၚ်ရဴသ္ဇိုၚ်သၞောဝ် ပ္ဍဲကဵုကာလအပြံၚ်သၠာဲ နဒဒှ်လိက်ကၞဟ်ပရေၚ်အုပ်ဓုပ် သွက်ဂွံစကာသုၚ်စောဲအာ မဒှ်ရ။

ပရေၚ်ချူခၞံသၞောဝ်ဥပဒေ အရာမပြုပြေၚ်ဆေင်စပ်ကဵု ကာလအပြံၚ်သၠာဲ ဖိတ်ဒရေဝ်ဂှ် ဒှ်လၟေၚ်ကမၠောန် NUCC တုဲ ဒက်ပတန်လဝ် ဂကောံကမၠောန် ချူခၞံသ္ဇိုၚ်သၞောဝ်ဥပဒေ TCWG ရ။

ပ္ဍဲ TCWG မ္ဂး ညးစၞးနူကဵု ဂကောံကောန်ဍုၚ်အရၚ်တံကီု ကံၚ်သဳဖိတ်ဒရေဝ် စၞးတွဵုရး/စၞးဂကူ ၉ ဂကောံတံ ပါလုပ်မံၚ်တုဲ သီုကဵုညးစၞး NUG ကဵု NUCC တံ ချူခၞံမံၚ်မွဲစွံ မဒှ်ရ။

မွဲလပါ်ပၠန် စပ်ကဵုဗော်သွးကောန်ဂကူကရေၚ် KNU နုက်တိတ်နူကဵု ဂကောံ NUCC ဂှ်တုဲ နကဵုသြၚ်လောန်တိုၚ်မ် ကေတ်အဆက်သၟာန်ဏာကု ညးအခေါၚ်ဟီုဂးနွံ KNU ပဒိုသဝ်တဝ်နဳကီုလေဝ် ဟွံကလေၚ်နၚ်ပရိုၚ်ဏီရ။

ကံၚ်သဳကဵုကသပ် ပရေၚ်ညဳသၟဟ်ကောန်ဂကူ NUCC ဂှ် ဒက်ပတန်ကၠုၚ်လဝ် ပ္ဍဲကဵုသၞာံ ၂၀၂၁ ဂိတုမာတ်ချ် မံက်တေံတုဲ စပ်ကဵုမူဝါဒ ဒှ်ဂကောံပၠတရဴပရေၚ်ဍုၚ်ကွာန်မွဲကီု ဒက်ပတန်လဝ် နကဵုမူဝါဒ သွက်ကဵုအရီုဗၚ် NUG ရ။

ပ္ဍဲဂကောံဏံမ္ဂး ကမ္မတဳသ္ပစၞး စၠတ်ထဝ်ကၟိန်ဍုၚ် CRPH၊ ဗော်ပရေၚ်ဍုၚ်ကွာန်၊ ဂကောံကောန်ဍုၚ်အရၚ်ရပ်လွဟ် ကေုာံ ဂကောံသ္ပစၞးတွဵုရး/ ဖိတ်ဒရေဝ်ယူနေတ်/ ကံၚ်သဳကဵု ကမ္မတဳဗဗေၚ် တံ ပါလုပ်ရ။

ပြဟ်ဟ်ဏံ KNPP ကဵု KNU သွက်ဂွံနုက်တိတ် နူကဵု NUCC ပတိတ်လဝ်လိက်တုဲ စနူသၞာံ ၂၀၂၂ တေံဂှ် ဂကောံကချေၚ် KPICT ကဵု ဗော် NLD တံ နုက်တိတ်လဝ်ကီုရ။

ပရိုၚ်-သြၚ်လောန်တိုၚ်မ်

Photo – KNU/KNPP

Leave a Reply

Your email address will not be published. Required fields are marked *