မတ်မလီု၊ နိုဝမ်ပါ ၂၂
ကဝ်မယှေန်ပၞာန် သွက်ဂွံကၠောန်အာပေါဲရုဲမာဲ ဟၟဲကဵုသၠးပွး၊ ဟၟဲကဵု ဗဗွဲဓရ်၊ ဍုၚ်ဂၠးကဝ်ဂမၠိုၚ်လေဝ် ဟွံသ္ပစၟတ်သမ္တီ ပေါဲရုဲမာဲအလီဏံဂှ် ကဝ်တူလေကီု ညးဍုၚ်ကွာန်အလုံဍုၚ်ဗမာသီုဖအိုတ် သွက်ဂွံဒစဵုဒစး ဗတိုက်သရိုဟ်အာ KNU ထပ်ဗတိုက်ဖအောဝ်ရ။
ကဝ်မယှေန်ပၞာန်ကၠောန်အာဏံဂှ် ဒှ်ပေါဲရုဲမာဲအလီဏောၚ် ဗော်သွးကောန်ဂကူကရေၚ် KNU ထံက်ထ္ၜးလဝ်ကဵု တၚ်နၚ် ၅ တၚ်ရ။
ကဝ်မယှေန်ပၞာန်ဝွံ “အခေါၚ်အဝဵုသွက်ဂွံကၠောန်ပေါဲရုဲမာဲဟၟဲ၊ ဟွံလုပ်ဗဗွဲသၞောဝ်ဥပဒေ၊ ပရေၚ်သၠးပွးကဵု ပရေၚ်ဓရ်ယာဟၟဲ၊ ဆန္ဒညးဍုၚ်ကွာန်တံဟွံပါသၟးဟွံက ဟွံကိတ်ညဳကဵုလစွံစိုတ် ညးဍုၚ်ကွာန်တံ၊ သောၚ်ကလးပရေၚ်ဍုၚ်ကွာန် နဲကဲဍာံဍာံ ဟွံသေၚ်” ဟိုတ်နူတၚ်နၚ်တံဏံဂှ် ပေါဲရုဲမာဲဏံ တက်ပေါဲအလီရ ဏောၚ် သ္ဂးလဝ်ရ။
ဒပ်ကဝ်မယှေန်ပၞာန် ဂကောံပၞာန်အုပ်ဓုပ်လဝ်ဂှ်ဝွံ သ္ပမာန် ကေတ်ဇၞးကဵုလွဟ် ပၠံၚ်ကေတ်လဝ်အဝဵုဍုၚ် ဗွဲအဓ္ဓမအတေၚ် စနူကဵု ဂိတုဖေဖဝ်ဝါရဳ ၂၀၂၁ သၞာံတေံဂှ် ရပ်ညးဍုၚ်ကွာန်ကောန်အရာပ် ဟၟဲကဵု ပရေၚ်ဓရ်ယာတပ်တး၊ ဂစိုတ်ညးဍုၚ်ကွာန်တံသၟးဟွံက နူကဵုဒပ်ပၞာန်ကျာ ရန်တၟံနွံနွံ ပန်ဗတိုက်လဝ် စမြိုၚ်ဒၞာဲ ပရေၚ်သာသနာကေုာံ ဘာဗတောန်လိက်တံရောၚ် KNU သ္ဂးရ။
တုဲပၠန် တၠအဝဵုပၞာန်တံ ချူခၞံလဝ် သ္ဇိုၚ်သၞောဝ် ၂၀၀၈ ဂှ် ဒစဵုဒစးတုဲ ရပ်လဝ်သမ္မတကီု အမှုရာဇဝတ်ဂကူစုၚ်တံ လုလောန်ဖန်ဖက်လဝ် ကၠးကၠးမးမး ဒှ်မံၚ်ဂှ်ရ နကဵုညးဍုၚ်ကွာန်တံ လ္ပအာကဵုမာဲ သွက်ဂွံဒစဵုဒစးအာ KNU ဗတိုက်ဖအောဝ်လဝ်ရ။
သွက်ဂွံဆက်အယုက်တၠအဝဵုပၞာန် သ္ဇိုၚ်သၞောဝ်ဥပဒေ ၂၀၀၈ ကီု သၞောတ်တၠအဝဵုပၞာန် အာယုက်သွက်ဂွံဂၠိုၚ်ကီု ညံၚ်ဂွံကၠေံကၠက်အာ “ညံၚ်ဟွံဒးဒုၚ်ဝင် စဝ်ဍာ်တၞံဂျိ” ဂှ်တှ်ေ နဲလဵုဒှ်ဒှ် ညးဍုၚ်ကွာန်တံ ညံၚ်ဂွံပါဲဓလေတ်ညိ KNU ဗတိုက်ဖအောဝ်လဝ်ရ။
ဒစဵုဒစးပေါဲရုဲမာဲရောၚ် ဟိုတ်နူပတိတ်လိက်လလောၚ်တြးဂှ်ရ ကဝ်မယှေန်ပၞာန် ပံက်လဝ်အမှုကဵု ဥက္ကဌ KNU ကေုာံ ညးတာလျိုၚ်ကဆံၚ်လ္တူတံ နကဵုဥပဒေပေါဲရုဲမာဲ ပ္ဍဲကဵုရုၚ်ဗၠာဲသၟိၚ် ဆေင်စပ်တံရ။
ပရိုၚ်-သြၚ်လောန်တိုၚ်မ်
Photo – DDMSC

