ပဆုဲပြံၚ်လဝ်ကဵု သေဌဳကြုက်ကျဖျတံဟၟဲပုဟ် BGF တးပါဲ

ဗြဝတီ၊ နိုဝမ်ပါ ၂၂

တွဵုရးကရေၚ် ပွိုၚ်ဍုၚ်ဗြဝတဳ ပ္ဍဲဍုၚ်ယှိုဲကုက်ကိုဂှ် သေဌဳကြုက် ကၠောန်ကမၠောန်ကျဖျတံ မံၚ်ဟွံမာန်ကီု သေဌဳကြုက်တံဏံဂှ်လေဝ် ဒပ်မၚ်ပယျဵုကရေၚ် BGF ပဆုဲပြံၚ်ကဵုလဝ်ဒၞာဲ ဟၟဲပုဟ်ဂှ် ညးအခေါၚ်ဟီုဂးနွံ BGF သ္ကိုပ်ဗိုလ်ဇၞော် နာဲမိုင်ဇြဝ် တးပါဲထောံလဝ်ရ။

နူကၠာဟွံဂွံလုပ်ပလီု ဒၞာဲကျဖျ မကော်ခဴစ ပရေၚ်လီဠာန် ဝေၚ်ဇျှၚ်လံၚ်သြန်အန်လိုၚ် နွံပ္ဍဲ ဍုၚ်ယှိုဲကုက်ကိုဂှ် BGF ဒစးဒုၚ်ပဆုဲပြံၚ်လဝ်ကဵု သေဌဳကြုက်ကျဖျတံ လ္တူပရိုၚ်တိတ်မံၚ်ရဂှ် ညးအခေါၚ်ဟီုဂးနွံ BGF နာဲမိုင်ဇြဝ် ထပ်တးပါဲဏာရ။

သေဌဳကြုက်ကျဖျတံဂှ် BGF ပြံၚ်ပဆုဲကဵုလဝ်ဟၟဲဂှ်ကီု လဟီုလ္ဂးဗီုတံဏံဂှ် တၚ်စောဲစပ်ရဒှ်တုဲ ဒၞာဲပြဿနာထုဲထံၚ် ဂၠိုၚ်မံၚ်မ္ဂး သေဌဳကြုက်တံ မံၚ်ဟွံမာန်ပုဟ် နာဲမိုင်ဇြဝ် ဟီုရ။

ပ္ဍဲကဵုဒၞာဲ KK Park ဒပ် BGF ထိၚ်ချုက်လဝ် နွံမံၚ်သၠုၚ်ကျာဗြဝတဳ ကရပ်ပယျဵုသေံဗမာ စနူအံက်တဝ်ပါဂှ် ဒပ်ပၞာန်ဗမာ ဍိုက်လုပ်သီကေတ် ခတိုဟ်ပလီုထောံကဵု ဗုမ်ကီု ပံၚ်ကဵုဒပ် BGF တုဲ ပ္ဍဲနဝ်ဝမ်ပါ ၁၈ ဂှ် လုပ်ဂၠိုက်ဂၠာဲစၟဳစၟတ်လဝ် ဍုၚ်ယှိုဲကုက်ကိုရ။

ဒၞာဲကၠောန်မံၚ်ကမၠောန်ကျာဖျ တိဍာ် KK Park ကဵု ယှိုဲကုက်ကိုတံဂှ် နူကၠာဒပ်ပၞာန်ကဵု BGF ပံၚ်တောဲဟွံဂွံလုပ်သီဏီဂှ် ဒပ် BGF ပြံၚ်ပဆုဲလဝ်ကဵုသေဌဳကြုက် ကၠောန်မံၚ်ကမၠောန်ကျဖျတံ လပါ်သၟဝ်ကျာဗြဝတဳ ညံၚ်ရဴကွာန်တေံကတေကဵု ဒၞာဲဒေသတၞဟ်ဟ်ရောၚ်ဂှ် တမ်ရိုဟ်ကၞက်ပရိုၚ်ဒေသတံ ဟီုဂးလဝ်ရ။

ပ္ဍဲကဵုကမၠောန်ကျာဖျ ဝေင်ဇျှၚ်လံၚ်သြန်ကီု ပရေၚ်လီဠာန်သြန်အန်လိုၚ်တံကီုဂှ် ဒပ်မၚ်ပယျဵုကရေၚ် BGF တံ ပါလုပ်ဆက်စပ်လဝ် ဟၟဲ၊ က္ဍိုပ်သ္ကိုပ် BGF သဝ်ချေတ်တူလေဝ် စပ်ကဵုကမၠောန်ကျာဖျ ဒုဟ်ဟၟဲတုဲ ဂြိပ်ပါဲမံၚ်ဟွံသေၚ်ပုဟ် နာဲမိုင်ဇြဝ် သ္ဂးရ။

တုဲပၠန် ပံၚ်တောဲအာကဵုဒပ်ပၞာန်ဗမာတုဲ တ္ၚဲကာလသၞောတ်ထ္ၜးဟၟဲ ဗတိုက်သရိုဟ်အာကမၠောန်ကျာဖျ ပရေၚ်ဝေင်ဇျှၚ်လံၚ်သြန်အန်လိုၚ်၊ ပရေၚ်လီဠာန်သြန်အန်လိုၚ်တံကီု နကဵုစၞောန်အမိၚ် ဒု-ဂဥုပ်သ္ကိုပ်ပၞာန်ဇၞော် သဵုဝေန် ဖန်ဖက်ရေၚ်တၠုၚ်မံၚ်ရောၚ် သ္ကိုပ်ဗိုလ်ဇၞော် နာဲမိုင်ဇြဝ် ကဵုလဝ်သမ္တီရ။

ပ္ဍဲယှိုဲကုက်ကို ကၠောန်လဝ် ပရေၚ်ဗတိုက်သရိုဟ်ပွိုၚ် ၃ တ္ၚဲဏံ ရပ်ဂွံလဝ်ကောန်ဍုၚ်မ္ၚး ၁၀၁၆ တၠမဒှ်တုဲ သီဂွံလဝ် ကပေါတ်စကာသုၚ်စောဲ ကမၠောန်ကျာဖျ ဖုၚ်၊ ကန်ပျူတာဗွဲမဂၠိုၚ် နူကောန်ဍုၚ်မ္ၚး ဟွံလုပ်သၞောဝ်တံဂှ်လေဝ် ရပ်ထိၚ်စွံလဝ် ပ္ဍဲကဵုယှိုဲကုက်ကိုရဂှ် ကဝ်မယှေန်ပၞာန် ပတိတ်လဝ်ပရိုၚ်ရ။

ပရိုၚ်-သြၚ်လောန်တိုၚ်မ်

Photo – Social Media

Leave a Reply

Your email address will not be published. Required fields are marked *