လိက်လလောၚ်တြးပေါဲရုဲမာဲ ဗော်ညဳသၟဟ်မန် ဒှ်မံၚ်သဟဇာတကဵု ပရေၚ်ကြေပ်ဂြတ် ညးဍုၚ်ကွာန်မန်တံကီုဟာ

မတ်မလီု ၊ နိုဝမ်ပါ ၂၂

ဗော်ညဳသၟဟ်မန် MUP လုပ်ပြိုၚ်အာပေါဲရုဲမာဲ ပ္ဍဲကဵုဒၞာဲဒေသဆန္ဒမာဲ တွဵုရးမန်ဝွံ ပ္ဍဲနိုဝမ်ပါ ၂၀ ဂှ် လလောၚ်တြးဏာ လိက်လလောၚ် ပေါဲရုဲမာဲ ဗွဲခမၞန်ရ။

သွက်ဂွံဒက်ပတန်အာ ပရေၚ်ၜိုဟ်လလမ်အလုံဍုၚ်ကီု ကၟိန်ဍုၚ် ဖိတ်ဒရေဝ် ဒဳမဝ်ကရေသဳ မၞုံကဵုပရေၚ်ဖန်ဖက် ကံကုသဵုဇကုဖန်ကေတ်မာန်ကီု ဗော်ညဳသၟဟ်မန်ရန်တၟံလဝ်ရဂှ် လလောၚ်တြးလဝ်ရ။

နကဵုလၟေၚ်ကမၠောန်မ္ဂး တင်နၚ်စပ်ကဵု ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်ထတ်ယုက်၊ ပရေၚ်တဵုလွဳ၊ ပရေၚ်အစောံဓါတ် ဂွံဖောအ်ဗြဳ၊ ပရေၚ်ကောန်ဍုၚ်အရၚ်၊ ပရေၚ်ထိၚ်ဒဝ် ပွဳပွူသဘာဝ၊ ပရေၚ်ညးဗြဴ၊ ပရေၚ်ကဵုပညာ ဂဥုဲၜူမာဲ၊ ပရေၚ်သၟတ်၊ ပရေၚ်ဆက်ဆောံ ဍုၚ်ဂၠးကဝ်ကေုာံ ပ္ဍဲကဵုပရေၚ်ကိစ္စ ဆေင်စပ်ကဵု ဂၠးကဝ်တံဂှ် ဗွဲမက္တိုၚ်ကၟိုဟ် ညံၚ်ဂွံပါလုပ်အာ တင်နၚ် ၂၅ တၚ် ပါလုပ်ရ။

ဆဂးဂှ် ပြဟ်ဟ်ဏံ ညးဍုၚ်ကွာန်အလုံဍုၚ်မွဲကီု ညးဍုၚ်ကွာန်မန်တံကီု ဒးဇီုကပါ်မံၚ်ကဵုပ္ဍဲအရာကိစ္စ ပရေၚ်ယိုက်ဂၠေၚ်ဝန်ပၞာန်ဗၟာကေုာံ ပရေၚ်အုပ်ဓလီုဥပဒေတံဂှ်ချူထမံက်လဝ် ပ္ဍဲလၟေၚ်ကမၠောန်ဗော်ဂှ် ဟွံဂွံဆဵုရ။

သွက်ဂွံကလေၚ်ပလီုထောံ သၞောဝ်ဥပဒေယိုက်ဂၠေၚ်ဝန်ပၞာန်ဂှ် ညံၚ်ဂွံဒှ်လၟေၚ်ကမၠောန်ဗော် ကဵုဖျုန်ရေၚ်တၠုၚ်အာကီု ပရေၚ်ဂဥုဲၜူမာဲညံၚ်ဂွံကၠေံကၠက်အာ ကေုာံပရေၚ်ဂီုကၠီုဂှ်လေဝ် မိက်ဂွံကဵုစုတ်လဝ် ပ္ဍဲလၟေၚ်ကမၠောန်ဗော်ကီုရောၚ် ညးဒေသတွဵုရးမန်မွဲတၠ ဟီုကဵုဌာန်ပရိုၚ်သြၚ်လောန်တိုၚ်ရ။

“ပြဟ်ဟ်ဏံ ညးဍုၚ်ကွာန်ပိုဲတံ မုနွံပၟိက်ရောဟီုတှ်ေ မုက်ဂၞန်မွဲ ပရေၚ်ကိစ္စယိုက်ဝန်ပၞာန်။ ဥပဒေဍေံတံချူလဝ် ကိစ္စယိုက်ဝန်ပၞာန်ဏံ ညံၚ်ဂွံပလီုထောံ မုက်ဂၞန်မွဲမိက်ဂွံကဵုလဝ်ဖျုန်။ မုက်ဂၞန်ၜါ ဒၟာနူကိစ္စပရေၚ်ဂဥုဲၜူမာဲ လပါ်ပိုဲတံ အကာဲအရာပရေအ်ကွေံကွေံ။ ဒှ်မာန်တှ်ေ ညံၚ်ဂွံကၠေံကၠက် မိက်ဂွံကဵုဖန်ဖက်ကဵု။ အဓိကၜါတၚ်ဏံရ။ တုဲပၠန် တၚ်ပိဂှ် ပရေၚ်ဂီုကၠီု မိက်ဂွံကဵုထပေၚ်စုတ်ရ” သာ်ဝွံ သ္ဂးရ။

အခိၚ်ပၞာန်အပ္ဍဲဍုၚ်က္တဵုဒှ်မံၚ်ဏံ ဇၟာပ်မၞိဟ်အယုက်ပေၚ်တံ ညံၚ်ဂွံလုပ်ပၞာန် ထပၠုပ်လမျီုဥပဒေ ယိုက်ဂၠေၚ်ဝန်ပၞာန်တုဲ ဗွဲကြဴဏံ သၟတ်နူကဵုတွဵုရးမန်တံ ဗွဲအတၚ်အဓ္ဓမဒးဒုၚ်ပကောံဏာ ကောန်ပၞာန်နွံကၠုၚ်ရ။

အခိၚ်ဗ္တံလေဝ် တိတ်မ္ၚးသ္ၚိဟွံဂွံ ဒးစၟတ်ပိုၚ်ခြာလဝ်တုဲ ယဝ်ဇီုဒးမုက်ကဵုကောန်ပၞာန်ဗမာတံမ္ဂး ဒးဒုၚ်ရပ်ပကောံ ကောန်ပၞာန်တၟိတံကီု၊ ဒးကဵုသြန်ကဵုကိုဋ်တုဲ ကလေၚ်ရုဲပတိတ်နၚ်လဝ်ကေုာံ ပယျာတ်အာတ်ကေတ်သြန်နွံရဂှ် ဂွံတီနူကဵု ညးဒေသတံရ။

တုဲပၠန် ညးကၠောန်မံၚ်ကၠအ် ပ္ဍဲကဵုပွိုၚ်ဍုၚ်ရေဝ်တံ လိုန်ဒးမံၚ်မါၚ်တပ်တိကီု အခိၚ်အာကၠအ်ပ္ဍဲကဝက်ဂၠံၚ် ဒးဒုၚ်ဂစိုတ်ထောံကေုာံ ဒးဒုၚ်ပလေအ်ထောံလေဝ်နွံမံၚ်တုဲ ပရေၚ်ဂီုကၠီုဟၟဲပုဟ် ညးဒေသမွဲတၠ သ္ဂးရ။

မွဲလပါ်ပၠန် ဟိုတ်နူဂဥုဲၜူမာဲကဵု ဝိုၚ်ဝေင်ဂမၠိုၚ်တံဂှ် ပရေၚ်ကၠတ်ဂၠံက်၊ ဒမၠဗတိုက်တံလေဝ် က္တဵုဒှ်မံၚ်ပ္ဍဲအလုံတွဵုရးတုဲ မၞိဟ်တံလေဝ်ဒးဒုၚ်ဂစိုတ်မံၚ် မွဲဏှမွဲဏှရ။

စပ်ကဵုညးဍုၚ်ကွာန်မန်တံ ဒးဆဵုဂဗဇီုကပါ်မံၚ်ကဵု တၚ်ကြေပ်ဂြတ်နာနာသာ်တံတုဲ သွက်ဂွံသောၚ်ကလးအာ နကဵုလၟေၚ်ကမၠောန် တၚ်ကဵုဖျုန်အဓိကဟွံစုတ်လဝ် ပ္ဍဲကဵုလိက်လလောၚ်တြးပေါဲရုဲမာဲဂှ် နကဵုဌာန်ပရိုၚ်သြၚ်လောန်တိုၚ် ဂစာန်ကေတ်အဆက်ကဵု ညးအခေါၚ်ဟီုဂးနွံ ဗော်ညဳသၟဟ်မန်ကီုလေဝ် ဟွံဒုၚ်တဲ သှ်လဴကဵုဖုၚ်ရ။

ပ္ဍဲကဵုပေါဲရုဲမာဲဏံ နကဵုသၞောတ်ထ္ၜတ်ဗော်ညဳသၟဟ်မန် မဒးလုပ်ပြိုၚ်အာဂှ် ဗော်ပံက်အလဵုအသဳဟွံမာန်ဒှ်မံၚ်တုဲ ပရေၚ်အပြံၚ်အလှာဲဇၞော်ဇၞော်တံဂှ် စၟဳစဟွံဂွံပုဟ် ညးဒေသမန် တၞဟ်ခြာ မွဲတၠပၠန်ဂှ် ဟီုကဵုဌာန်ပရိုၚ်သြၚ်လောန်တိုၚ်ရ။

“ဗော် MUP ဂှ် အတိုၚ်ပိုဲစၟဳစလဝ် ဒှ်ကၠုၚ်မာန်ဟွံသေၚ်။ မုဒှ်ရောဟီုတှ်ေ ပ္ဍဲကဵုပေါဲရုဲမာဲ ဒးလုပ်ပြိုၚ်မံၚ်ကဵု သၞောတ်ထ္ၜတ်ပိုၚ်ခြာလဝ်ကီု ဗော်ပံက်အလဵုအသဳဟွံမာန်ဟီုတှ်ေ သွက်အပြံၚ်အလှာဲဇၞော်ဇၞော် ပတိုန်ဂလာန်လေဝ် မာန်ညးတၞဟ် အဲဟွံထေၚ်။ ဆဂး ရမျှာၚ်ညးဍုၚ်ကွာန်ပိုဲဇေတ်တ်ဂှ် ဂွံမိၚ်အာပ္ဍဲစၠတ်ထဝ်မာန်ရောၚ် စၟဳမံၚ်။ ဆဂး ကိစ္စသွက်ဂွံပလီု ဥပဒေယိုက်ဝန်ပၞာန်တံ ဗော်ညးတံပၠုပ်ဂလာန်လေဝ် အံၚ်ဇၞးဟွံသေၚ်။ မုဒှ်ရောဟီုတှ်ေ ပံက်အလဵုအသဳလေဝ်ဟွံမာန်တုဲ ဗီုကိစ္စဥပဒေယိုက်ဝန်ပၞာန်ဂှ် မၚ်စၟဳစဟွံဂွံပုဟ်” သာ်ဝွံ သ္ဂးရ။

ဗော်ညဳသၟဟ်မန် အခိၚ်ကၠာတေံဂှ် ဒှ်ကၠုၚ်ဗော်ပရေၚ်ဍုၚ်ကွာန် သ္ပစၞးဂကူမန် စန်ဒက်အလုံကၟိန်ဍုၚ်မွဲကီုလေဝ် အခိၚ်သီအဝဵုတုဲဏံ ဟိုတ်နူကဝ်မယှေန်ပၞာန် ခၞံလဝ်ဥပဒေ ပ္တိုန်စၟတ်သမ္တီဗော်ပရေၚ်ဍုၚ်ကွာန်ဂမၠိုၚ်တုဲ ဒှ်အာဗော် သွက်ဂွံစန်ဒက် အလုံတွဵုရးမန်မွဲဟေၚ် ဂွံအခေါၚ်ရ။

ဟိုတ်ဂှ်ရ ပ္ဍဲပေါဲရုဲမာဲဏံ သွက်စၠတ်ထဝ်ညးဍုၚ်ကွာန်ကီု ပ္ဍဲကဵုသၞောတ်ဂွံမာဲဂၠိုၚ်ဇၞး FPTP ကေုာံ သၞောတ်သ္ပစၞး PR တံပံၚ်ဗစပ်လဝ် ပ္ဍဲကဵုစၠတ်ထဝ်ကောန်ဂကူကဵု စၠတ်ထဝ်တွဵုရးတံဂှ် သွက်ဂွံလုပ်ပြိုၚ်အာ ပတိုန်လဝ်စရၚ် အလံၚ်အမာတ် ၃၈ တၠ နွံရ။

သွက်တၠဆန္ဒမာဲတံကဵု ညးဍုၚ်ကွာန်နွံမံၚ်အပ္ဍဲကၟိန်ဍုၚ်တံ ဒးဆဵုဂဗမံၚ်ကဵုပရေၚ်အခက်အခုဲ ပရေၚ်ဍုၚ်ကွာန်၊ ပရေၚ်ပိုန်ဒြပ်၊ ပရေၚ်မၞိဟ်နာနာသာ်တံဂှ်သောၚ်ကလးမာန်တုဲ ဗော်ညးဍုၚ်ကွာန်တံပတေဟ်စဂွံ ဗော်ပရေၚ်ဍုၚ်ကွာန်ခိုၚ်ၚ်ကၠိုက်က်မွဲ ညံၚ်ဂွံဒတူလိုင်အာမာန် ဗော်ညဳသၟဟ်မန်ရန်တၟံလဝ်ရ။

စပ်ကဵုပရေၚ်ဍုၚ်ကွာန် ပ္ဍဲကဵုလၟေၚ်ကမၠောန် တၚ်လလောၚ်တြးဗော်ဂှ် သွက်ပလေဝ်ချူခၞံအာ သ္ဇိုၚ်သၞောဝ်ဥပဒေ မကိတ်ညဳကဵု မူသ္ဇိုၚ်ဖိတ်ဒရေဝ်ကီု ဒက်ပတန်အာပရေၚ်ၜိုဟ်လလမ်ကေုာံ အရာကလေၚ်ဒက်ပ္တန် ပရေၚ်ညဳသၟဟ်ကောန်ဂကူတံ နကဵုပရေၚ်ကမၠောန် သွက်ဂွံထမံက်အာရုပ်ရဴ ကဵုအာဇြဟတ်ဟရိုဟ် ဏောၚ် ချူလဝ်ရ။

ပ္ဍဲကဵုပေါဲရုဲမာဲလောန်ဏံမ္ဂး သွက်အရာပြံၚ်လှာဲပရေၚ်ဍုၚ်ကွာန်ဂှ် ဗွဲမဂၠိုၚ်စၟဳစဟွံဂွံကီုလေဝ် ယဝ်ရ လစွံစိုတ်ဂၠးကဝ် မွဲမွဲဗီုပြံၚ်သၠာဲကၠုၚ်မ္ဂး ပ္ဍဲအရာကိစ္စပရေၚ်ၜိုဟ်လလမ်ကဵုပရေၚ်ဂီုကၠီုတံ ဒှ်ကၠုၚ် ပရေၚ်အဆုဲအပြံၚ်မွဲမာန်ရောၚ် ညးလ္ၚတ်တံသ္ၚဳဂၠိပ်လဝ်ရ။

ပရိုၚ်-သြၚ်လောန်တိုၚ်မ်

Photo – MUP

Leave a Reply

Your email address will not be published. Required fields are marked *