ဗြဝတဳ၊ နိုဝမ်ပါ ၂၄
ဒေသပယျဵုသေံ-ဗမာ တွဵုရးကရေၚ် ပွိုၚ်ဍုၚ်ဗြဝတဳ ကရောၚ်ပၞာန် ဒပ်ကဝ်မယှေန်ပၞာန် ထပက်လုပ်ကၠုၚ် လပါ်ကွာန်မေန်လက်ပါန်ဂှ် ဒှ်လဝ်ပေါဲဗတိုက်ကဵု ဂကောံပၠန်ဂတးတံတုဲ ညးဒေသလၟိဟ်ကဵုကၠမ် ဂြိပ်ပါဲစိုပ်အာ လပါ်တိသင်သေံရဂှ် ညးတာလျိုၚ်သေံတံ လလောၚ်တြးပရိုၚ်တုဲ ဂွံတီကေတ်ရ။
စနူနိုဝမ်ပါ ၂၁ အခိၚ်နူဂယးဂှ် ကရောၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ် ပ္ဍဲကဵုကွာန်မေန်လက်ပါန် ဒှ်ပေါဲဗတိုက်ကဵု ဂကောံဇြဟတ်ပၠန်ဂတး ဒပ် KNLA မဟာဒပ် ၆ တုဲ နူကဵုသ္ၚောဲသ္ၚောဲ ဒပ်ကဝ်မယှေန်ပၞာန် ပန်ရီုပလံၚ်ကဵုမံၚ် လွဟ်ဇၞော်တံရ။
ဟိုတ်နူ ဒပ်ကဝ်မယှေန်ပၞာန်ပန်လွဟ်ဇၞော် ဒတုံခတိုဟ်စှ်ေအာ အပ္ဍဲကွာန်မေန်လက်ပါန်ဂှ် ကောန်ကွာန် ၃ တၠ ဒးဝပ်တုဲ ကောန်ကွာန်သီုဖအိုတ်တံ ဂြပ်လုပ်အာလပါ်တိသေံရဂှ် တမ်ရိုဟ်ကၞက်ပရိုၚ်ပယျဵုတံ သ္ဂးရ။
ဟိုတ်နူပေါဲဗတိုက်ဒှ်မံၚ် လပါ်ဍုၚ်ဗမာဂှ်တုဲ မကမ်ဖတုံစှ်ေမံၚ် လပါ်ဍုၚ်သေံကွာန်မကိုကေန်ဂှ်ကီု၊ ရဲဒဴပၞာန်တံလေဝ် လၟိဟ်ဟွံအောန်နူ ၁၀၀ တၠ စိုပ်ကၠုၚ်တိသေံရဂှ် ညးတာလျိုၚ်သေံတံ ပတိတ်လဝ်ပရိုၚ် ပ္ဍဲနိုဝမ်ပါ ၂၂ ရ။
ပေါဲဗတိုက်ဒှ်ကၠုၚ်လဝ် စနူနိုဝမ်ပါ ၂၁ အခိၚ်နူဂယးဂှ် ဒပ်ကဝ်မယှေန်ပၞာန် ထိၚ်ချုက်ဂွံ ကွာန်မေန်လက်ပါန်ကီုလေဝ် လပါ်ကဝ်မယှေန်ပၞာန် ဒးအာလဝ်ဝပ်ဇၞော်ကဵုဇြဟတ်တုဲ အခိၚ်သဝ်တ္ၚဲဂှ် ကလေၚ်ဆုတ်တိတ်အာတုဲ နိုဝမ်ပါ ၂၂ အခိၚ်နူဂယးဂှ် ဒပ်ကဝ်မယှေန်ပၞာန် ကလေၚ်ထပက်ကၠုၚ် ကရောၚ်ပၞာန်ပၠန်ဂှ်ရ၊ ပေါဲဗတိုက်ဆက်ဒှ်ပၠန်ရဂှ် ညးဒေသမွဲတၠ ဟီုရ။
ကွာန်မေန်လက်ပါန်ဂှ် ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA ထပက်လဝ်စၟတ်တဲ NCA ထိၚ်ချုက်လဝ်တုဲ ကမၠောန်ကျာဖျ လီဠာန်သြန်အန်လိုၚ်တံလေဝ်ပံက်လဝ် အပ္ဍဲကွာန်ဂှ်ရ။
ဒၞာဲကုန်ဗလံက် ဗျူဟာစှ်ေအိုတ်ကေုာံ ဍုၚ်လေဝ်ကေကဝ် သၠုၚ်ကျာဗြဝတဳဂှ် ကဝ်မယှေန်ပၞာန် ကလေၚ်သီဂွံဏာတုဲ နူဂှ်မွဲအဆံၚ် သွက်ဂွံထိၚ်ဂၠံၚ်ကွဳစက် ဗြဝတဳ-ဝဝ်လေဝ် ပ္ဍဲဂိတု အံက်တဝ်ပါဂှ် ကဝ်မယှေန်ပၞာန် ချဳဒရာၚ်ကၠုၚ် ပရေၚ်ပၞာန် မဒှ်ရ။
ပရိုၚ်-သြၚ်လောန်တိုၚ်မ်
Photo – Social Media