မတ်မလီု ၊ နိုဝမ်ပါ ၂၄
ပ္ဍဲတွဵုရးမန် စရၚ်မာဲအလန်ဒုတိယ ဗာန်စွံလဝ်ကဵု ပ္ဍဲရုၚ်အုပ်ဓုပ် အရာပ်/ကွာန်တံကီုလေဝ် မၞိဟ်ကၠုၚ်ကျောဝ်ရံၚ်ဗဵုဟၟဲတုဲ ဒးဗက်ဆဝ်ဗ္ၚုဟ်မံၚ်ကဵု စက်သၠဲရမျှာၚ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သွက်ပေါဲရုဲမာဲ ကၠောန်အာဒဳဇြမ်ပါ ၂၈ ဏံ စရၚ်မာဲအလန်ပထမဂှ် ဗာန်စွံကဵုလဝ် ပွိုၚ် ၂၁ တ္ၚဲတုဲအာတုဲ ကလေၚ်ထပ်ပလေဝ် ဗပေၚ်လဝ်တံဂှ် အလန်ဒုတိယ ထပ်ဗာန်စွံကဵုလဝ်ပၠန်ရောၚ် ကဝ်မယှေန်ပေါဲရုဲမာဲကၟိန်ဍုၚ် လလောၚ်ပတိတ်လဝ်ရ။
စရၚ်မာဲအလန်ဒုတိယ စနူနိုဝမ်ပါ ၂၁ ဒဵုစိုပ်ဒဳဇြမ်ပါ ၄ တေံ ဗာန်စွံကဵုလဝ် ပွိုၚ် ၁၄ တ္ၚဲဂှ် အာကျောဝ်ရံၚ် ပ္ဍဲဂကောံကဝ်မယှေန်ပါ် အရာပ်/ကွာန်တံမာန်မံၚ်ကီု ဒၟာနူဟိုတ်နာနာသာ် ဗာန်စွံလဝ် ပ္ဍဲအရာပ်ကွာန်တံ ဟွံမာန်မ္ဂး ပ္ဍဲဇရေၚ်ရုၚ်ကဝ်မယှေန်ပါ် ပွိုၚ်ဍုၚ်တံ အာဗဵုရံၚ်ကေတ် စရၚ်မာဲတံမာန် သ္ဂးရ။
ကဝ်မယှေန်တံ ဗာန်စွံလဝ်စရၚ်မာဲ အလန်ဒုတိယကီုလေဝ် ညးလဵုမွဲမှ ဟွံကၠုၚ်ကျောဝ်၊ စရၚ်မာဲလ္ပဟီုဏီ ယၟုဇကုပါဟွံပါ ပ္ဍဲစရၚ်မာဲဂှ်လေဝ် ညိစိုတ်လေဝ်ဟွံလုပ်စပုဟ် ညးဒေသမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“စရၚ်မာဲ ဍေံတံကၠုၚ်ဗာန်စွံလေဝ် ပ္ဍဲကွာန်။ ဗာန်စွံလဝ်ကီုလေဝ် မၞိဟ်ကၠုၚ်ကျောဝ်ဗဵုဟၟဲ။ အဲအဃောတတ်အာ ကရပ်ကရပ်ဂှ် ညးမွဲမှ ဟွံကၠုၚ်ကျောဝ်ပုဟ်။ ဟွံအာစၟတ်ရံၚ်ယၟုဇကုပုဟ်။ မၞိဟ်တံဟွံအာရၚ်ပုဟ် ပလေဝ်စရၚ်မာဲဗၠေတ်ဂှ် လ္ပဟီုဏီ။ ညးလ္ၚဵုဗီုလဵုဟီုရောတှ်ေ ဟွံအာဗဵုပုဟ်။ ဟွံပါဟဍၚ်ခိုဟ်ဟဍၚ်။ ဟွံပါတှ်ေ ညံၚ်ကဵုထဳပါ်ကီု။ ဟီုမံၚ်ဗီုတံဏံရ” သာ်ဝွံ သ္ဂးရ။
ညးကၠုၚ်ရံၚ် စရၚ်မာဲဟၟဲတုဲ ဂကောံအုပ်ဓုပ်တံဂှ် သွက်ဂွံကဵုစရၚ်မာဲ ဗက်ဆဝ်ဗ္ၚုဟ်မံၚ်ကဵု စက်သၠဲရမျှာၚ်ကီု တိုန်မွဲသ္ၚိစှ်ေမွဲသ္ၚိအာလဴစ သွက်ဂွံအာကျောဝ်စရၚ်မာဲကီု ညးဆက်ဟီုရ။
အာရံၚ်စရၚ်မာဲတုဲ ယဝ်ရ ယၟုဇကုဟွံပါ ပ္ဍဲစရၚ်မ္ဂး နကဵုတၞးလိက်ဗီုပြၚ်(၃) အာတ်မိက် စုတ်စရၚ်မာဲမာန်တုဲ ယဝ်ရ ညးပါလုပ်ဟွံထေက်တံ ယၟုပါလုပ်မံၚ်မ္ဂး နကဵုတၞးလိက်ဗီုပြၚ်(၄) ဂှ် စောဒကအာမာန် သ္ဂးရ။
တုဲပၠန် တၚ်နၚ်စရၚ်မှာရာမံၚ်မ္ဂး နကဵုတၞးလိက် ကလေၚ်ပလေဝ် ဗီုပြၚ် (၄-ဂ) ပတိုန်ထ္ၜးမာန်တုဲ တၞးလိက်ဗီုပြၚ် နွံပၟိက်တံဂှ် ကၠုၚ်အာတ်ကေတ် ပ္ဍဲရုၚ်ပါ်ကဝ်မယှေန်တံမးမးမာန်တုဲ ထပ်စုတ်ဗပေၚ်၊ ပတိတ်၊ ကလေၚ်ပလေဝ် တုဲဒှ်မ္ဂး ပ္ဍဲဂိတုဒဳဇြမ်ပါဏံသွက်ဂွံထပ်ဗာန် စရၚ်မာဲအလန်တတိယပၠန်ရောၚ် လလောၚ်တြးလဝ်ရ။
ပ္ဍဲစရၚ်မာဲဗာန်စွံလဝ် အလန်ပထမဂှ်တှ်ေ ညးချိုတ်လဝ်တံ ယၟုကလေၚ်ပါမံၚ်၊ ယၟုမၞိဟ်မွဲတၠဓဝ် ပါမံၚ်ပိပန်ဒၞာဲ၊ ယၟုမၞိဟ်ပြံၚ်ဆုဲအာတံပါမံၚ်၊ တၚ်နၚ်ဟွံဍာံပြ ဟွံဍိုက်ပေၚ်သၟးဟွံက ဒၞာဲလ္ၚဵု ယၟုကၠေံအာလေဝ်နွံ ဂွံဆဵုလဝ်ရောၚ် ညးဒေသတံ ဟီုရ။
စရၚ်မာဲကဝ်မယှေန်ပၞာန် ပ္ဍဲတွဵုရးမန်ဂှ် မှာရာဗၠေတ်ဗၠေၚ်ဂၠိုၚ်နူကဵု စရၚ် ၂၀၂၀ တေံဏီတုဲ အလန်ဒုတိယဗာန်စွံကီုလေဝ် စရၚ်မာဲဗၠေတ်တ်တံဂှ် ညးဍုၚ်ကွာန်တံဟိုတ်နူစိုတ်ဟွံလုပ်စတုဲ အာကျောဝ်ရံၚ်ဗဵုကီု ပလေဝ်တၚ်နၚ်ကီု ဟၟဲလးလးဒှ်မံၚ်ရဂှ် ဂွံတီရ။
ပရိုၚ်-သြၚ်လောန်တိုၚ်မ်
Photo – MOI