မတ်မလီု၊ နိုဝမ်ပါ ၂၄
အခိၚ်ပၞာန်အပ္ဍဲဍုၚ် မက္တဵုဒှ်မံၚ်ဏံ ကဝ်မယှေန်ပၞာန် သ္ကိုပ်သ္ကကၠောန်အာပေါဲရုဲမာဲဂှ် ပါဲနူကဵုဍုၚ်မိတ်သဟာဲလ္ၚဵုမ္ဂး ပေါဲရုဲမာဲအလီဏောၚ် အခိၚ်ဂၠးကဝ်ကဵုညးဍုၚ်ကွာန်ဂမၠိုၚ် ညာတ်မံၚ်ဂှ် မာဲဒစးဒုၚ် လၟိဟ်ကဵုလက်ဂွံလဝ်တုဲယျရောၚ် ကဝ်မယှေန်ပၞာန် ဟီုလလောၚ်လဝ်ရ။
သွက်ဂွံကၠောန်အာပေါဲရုဲမာဲသ္ကုတ် ၁ ဂှ် အခိၚ်သှ်ေမံၚ်ၜိုတ် ၃၀ တ္ၚဲဏံ ညးဍုၚ်ကွာန်တံ စိုတ်လုပ်စဟၟဲကီုလေဝ် မာဲဒစးဒုၚ် ၂၈၃၀၀ ပြၚ် ဂွံလဝ် နူကဵုကွးဘာတက္ကသိုလ် သၟဝ်တဲပရေၚ်အုပ်ဓုပ် ကဝ်မယှေန်ပၞာန်တံရ။
အတိုၚ် လိက်ပရိုၚ်ကၟိန်ဍုၚ် ဒပ်ပၞာန်ထိၚ်ချုက်လဝ် ချူလဝ်မ္ဂး ပ္ဍဲအခိၚ်ကာလ ပိုၚ်ခြာစၟတ်လဝ် မာဲဒစးဒုၚ်ဂှ် ကွးဘာတက္ကသိုလ် ၂၈၃၃၉ တၠတံ ကၠုၚ်ကဵုလဝ်မာဲဒစးဒုၚ်ရဂှ် ကဝ်မယှေန်ပၞာန် လလောၚ်ပတိတ်လဝ်ပရိုၚ်ရ။
ကွးဘာအခေါၚ်ကဵုမာဲနွံ နူကဵုတက္ကသိုလ်၊ ဒဳကရဳကဝ်လိက်၊ ကဝ်လိက် နွံမံၚ်ဇၟာပ်ရးကဵုတွဵုရးတံ စနူကဵုနိုဝမ်ပါ ၁၇ ဒဵုစိုပ် ၂၁ ဂှ် ပ္ဍဲကဵုရုၚ်ကဝ်မယှေန်ပါ် အရာပ်/ကွာန်ဆေၚ်စပ်တံ ကၠုၚ်ကဝ်လဝ်မာဲဒစးဒုၚ် သ္ဂးရ။
ပ္ဍဲကဵုဂၠံစိုတ်ညးဍုၚ်ကွာန်တံဂှ် ပေါဲရုဲမာဲအလီဏောၚ် ဒုၚ်ကေတ်လဝ်တုဲ ဟိုတ်နူပါဲဟွံဗၠးဇြဟတ်ဟရိုဟ်တုဲ ဒးအာကဵုလဝ်မာဲရောၚ် ညးဍုၚ်ကွာန်မွဲတၠ ဟီုရ။
“ပ္ဍဲကဵုစိုတ်မၞိဟ်ဂမၠိုၚ်တံဂှ် တက်ပေါဲအလီရ ဒုၚ်ကေတ်လဝ်ဏောၚ်။ နကဵုသမ္တီစိုတ်ဓါတ်နူကဵုဂၠံသြိုဟ်ဇကု ဒးကဵုမာဲ ၁၀၀% မ္ဂး ၈၀% ဟၟဲပုဟ်။ နကဵုဇြဟတ်ဟရိုဟ် ပရေၚ်ဘပဠ ဟွံကဵုဟွံဂွံ ညံၚ်ဂွံဒးကဵုမာဲဟေၚ် ပါဲဟွံဗၠး ဒးအာကဵုလဝ်ဂှ် စိုတ်ဟွံပါပုဟ်။ သီုဖအိုတ် ပေါဲအလီရ” သာ်ဝွံ သ္ဂးရ။
ကဝ်မယှေန်ပၞာန် စကာရပ်စပ် ဥပဒေ၊ နဲကဲဥပဒေပေါဲရုဲမာဲ ချူခၞံကေတ်လဝ်ဂှ်တုဲ ညံၚ်ဂွံဂွံမာဲဒစးဒုၚ် နူကဵုကွးဘာတက္ကသိုလ်တံဂှ် လလောၚ်ပရိုၚ်ကဵုလဝ်သမ္တီ ပ္ဍဲနဝ်ဝမ်ပါ ၈ တေံရ။
ပ္ဍဲတ္ၚဲကၠောန်ပေါဲရုဲမာဲဂှ်တှ်ေ ကွးဘာတက္ကသိုလ်တံဒှ်မံၚ် အခိၚ်ဗတောန်လိက် အခိၚ်တိုန်မံၚ်ဘာ စိုပ်မံၚ်မ္ၚးဒၞာဲ ဆန္ဒမာဲဇကုမဒှ်တုဲ ပ္ဍဲတ္ၚဲဒဳဇြမ်ပါ ၂၈ ပေၚ်အယုက် ၁၈ သၞာံမ္ဂး ကၠုၚ်ကဵုမာဲဒစးဒုၚ်မာန် ရောၚ် ပ္ဍဲကဵုတင်လလောၚ်ပရိုၚ်ချူထ္မံက်လဝ်ရ။
မွဲလပါ်ပၠန် ကွးဘာတက္ကသိုလ်တံ ကၠာဟွံအာအပ်ဘာဂှ် ဒၞာဲစရၚ်မာဲဇကုနွံ ပ္ဍဲကဵုရုၚ်ကဝ်မယှေန်ပါ်ဆေင်စပ်တံ ညံၚ်ဂွံအာကဵုလဝ်မာဲတုဲတုဲ နူကဵုမုက်လိက် Facebook တက္ကသိုလ်၊ ဒဳကရဳကဝ်လိက်လ္ၚဵု ဆဝ်ဗ္ၚုဟ်လဝ်ကီုရ။
ယဝ်ခါရ ကွးဘာတံကၠုၚ်အပ်ဘာမ္ဂး သက်သဳစုတ်လဝ်မာဲ မွဲမွဲဗီုဂှ် ညံၚ်ဂွံကေတ်နၚ် မွဲကရောံကီုဂးတုဲ နူကဵုတက္ကသိုလ်ကန်ပျူတာ သဓီု ပလံၚ်လဝ်လိက်အီးမေလ်ရ။
ဆဂး ကွးဘာတက္ကသိုလ်တံ ကၠုၚ်အပ်ဘာမ္ဂး သက်သဳစုတ်လဝ် မာဲဒစးဒုၚ် ဒးကေတ်နၚ်ရောၚ် ကဵုလဝ်စၞောန်ဟၟဲပုဟ်ဂးတုဲ ကဝ်မယှေန်ပေါဲရုဲမာဲကၟိန်ဍုၚ် တးပါဲဟီုမံၚ်ရ။
ဟိုတ်နူ ဒှ်မံၚ်အကာဲအရာဗီုတံဏံဂှ်တှ်ေ ပ္ဍဲတ္ၚဲစုတ်မာဲတေံမ္ဂး ညးဍုၚ်ကွာန်အခေါၚ်ကဵုမာဲနွံတံဂှ် ညံၚ်ဂွံအာကဵုမာဲ ဂွိၚ်ဖေက် သ္ကိုပ်ပရေၚ်အုပ်ဓုပ်တံ ကဵုကၠုၚ်ဇြဟတ်ဟရိုဟ်အတေၚ်ဂှ်လေဝ် ချပ်တုဲဂွိၚ်မံၚ်နွံရ။
“အကာဲအရာဒးဒုၚ်ကဵုဇြဟတ်ဟရိုဟ် လးဒးဆဵုတှ်ေ ဆဵုဏောၚ်။ ဟွံဆဵုဒှ်မာန်ဟာ ဒးဆဵုရောၚ်။ သွက်အရၚ်ဏံ ဍေံတံ(စကမ) ပလေဝ်စလဝ်နွံမံၚ်။ ဟဂှ်တှ်ေ ကာလဒးဒုၚ်ကဵုဇြဟတ်ဟရိုဟ် မြကြပ်အိုတ်ဂှ် ဒးဖေက်ရတှ်ေ ဒးအာကဵု(မာဲ) ဗီုဂှ်ရဏောၚ်” သာ်ဝွံ ညးဍုၚ်ကွာန်မွဲတၠ ဟီုရ။
ပေါဲရုဲမာဲဏံ ပါ်ပိသ္ကုတ် သွက်ဂွံကၠောန်အာ ကဝ်မယှေန်ပၞာန်စဳဇန်လဝ်တုဲ သ္ကုတ် ၁ ဂှ် ၁၀၂ ပွိုၚ်ဍုၚ်ၢ သ္ကုတ် ၂ ဂှ် ၁၀၀ ပွိုၚ်ဍုၚ်၊ သ္ကုတ် ၃ ဂှ် ပါဲနူ ဒၞာဲကၠောန်ပေါဲရုဲမာဲဟွံမာန် ၅၆ ပွိုၚ်ဍုၚ်ဂှ်တုဲ ပ္ဍဲကဵုပွိုၚ်ဍုၚ်သှ်ေမံၚ်တံ သွက်ဂွံဆက်ကၠောန်အာရောၚ်။
ပေါဲရုဲမာဲကဝ်မယှေန်ပၞာန် သ္ကိုပ်သ္ကကၠောန်အာလၟုဟ်ဏံ ပရေၚ်ဓရ်ယာသၠးပွးဟၟဲတုဲ ဂလာန်ပတေဟ်လေဝ်ဟၟဲမံၚ်ဂှ်ရ အာကဵုမာဲဟွံသေၚ်ပုဟ် ညးဍုၚ်ကွာန်ဗွဲမဂၠိုၚ် ဟီုလဝ်ရ။
သွက်ပေါဲရုဲမာဲဂွံလီု ညးပလာတ်ပထုဲမံၚ်တံ ညးဆဝ်ဗ္ၚုဟ်ဟီုတွံ စန်ဒက်မံၚ် လ္တူအန်လိုၚ်ကီု သီုကဵုဗလးတိဂှ် ကဝ်မယှေန်ပၞာန် ရပ်ချုက်ပံက်လဝ်အမှု နကဵုဥပဒေစဵုဒၞာပေါဲရုဲမာဲဂှ် ၁၀၀ တၠ ပြၚ်အာယျ။
ပြဟ်ဟ်ဏံ ပ္ဍဲကဵုဒၞာဲရုၚ်ကဝ်မယှေန်ပါ် အရာပ်/ကွာန်တံဂှ် စနူနိုဝမ်ပါ ၂၁ ဒဵုကဵု ဒဳဇြမ်ပါ ၄ တေံ ဗာန်စွံလဝ် စရၚ်မာဲအလန်ဒုတိယရဂှ် ကဝ်မယှေန်ပၞာန် လလောၚ်ပတိတ်လဝ်ပရိုၚ်ရ။
ပရိုၚ်-သြၚ်လောန်တိုၚ်မ်
Photo – MOI