ကျောန်သု၊ နိုဝမ်ပါ၂၅
ပ္ဍဲရးတနၚ်သဳ ပွိုၚ်ဍုၚ်ကျောန်သု ဒပ်ကဝ်မယှေန်ပၞာန် ကၠုၚ်ပလံၚ်မကမ် ဇရေၚ်ဒပ်မၚ်ကွာန်ဂှ် ဒးဒုၚ်ကြတ်ဗတိုက် ကရပ်ကွာန်ယမုၚ်တုဲ ကောန်ပၞာန်ဗမာ ချိုတ် ၆ တၠဂှ် ဂွံတီနူကဵု ဒပ် ပကဖ ပွိုၚ်ဍုၚ်ကျောန်သုရ။
နူပ္ဍဲနဝ်ဝမ်ပါ ၂၃ ၜိုတ်အခိၚ်နူဂယး ၁၀ နာဍဳ နူကဵုလပါ်ကွာန်ကျာ်တိတ်ဂှ် ကွဳစက်ဒပ်ပၞာန်ၜါမ အာပလံၚ်မကမ်ဇရေၚ် ဒပ်မၚ်ကွာန်၊ ကွာန် ပဲ့တိုင်ဂှ် ဒပ်ပၠန်ဂတးတံ ဂွံပရိုၚ်တုဲ ကြတ်ပန်လဝ်မဒှ်ရ။
ပ္ဍဲပရေၚ်ပန်ဗတိုက်လဝ်ဏံ ကောန်ပၞာန်ဗမာ ၆ တၠချိုတ် ၂ တၠ ဒးအာဝပ်တုဲ ၂ တၠပၠန်ဂှ် ဒပ်ပၠန်ဂတးတံ ရပ်ဂွံဏာဂျိုၚ်ၚ်ရ။
ပ္ဍဲကဵုပရေၚ်ကြတ်ဗတိုက်လဝ်ဏံ ဒပ်ပၠန်ဂတးတံ သီဂွံဏာ နူဒပ်ကဝ်မယှေန်ပၞာန် ကွဳစက်မွဲမ၊ လွဟ်မကမ်ကေုာံ ကပေါတ် ဆက်စပ်လ္ၚဵုတံ ပါလုပ်ရ။
ဒပ်ကဝ်မယှေန် ဟိုတ်နူဒးဒုၚ်ကြတ်ဗတိုက်တုဲ ရဲချိုတ်လ္ၚဵုတံဂှ် ဗွဲမပြဟ် ကပှ်ပတိုန်လ္တူကွဳစက် ဒဳဟရိပ်ဂြိပ်တိတ်အာလဝ်ဏောၚ် ညးတာလျိုၚ်မွဲတၠ နူကဵုဒပ်စဵုဒၞာညးဍုၚ်ကွာန် ပွိုၚ်ဍုၚ်ကျောန်သု ဟီုရ။
ပ္ဍဲကဵုပရေၚ်ဗတိုက်ဏံ နူကဵုဒပ်စဵုဒၞာညးဍုၚ်ကွာန် ပွိုၚ်ဍုၚ်ကျောန်သု ကေုာံ ဒပ်စဵုဒၞာညးဍုၚ်ကွာန် ခရိုၚ်ဗိက်တံ ပံၚ်တောဲ ကြတ်ဗတိုက်လဝ် ဂွံတီရ။
တုဲကၠုၚ်ဂိတုမေ ၆ တေံလေဝ် ပ္ဍဲပွိုၚ်ဍုၚ်ကျောန်သု ဗ္ဒိုပ်ဒပ်ပၞာန်နွံမံၚ် ကရပ်ဇိုၚ်ကွာန်ဝါယေတ်ပုၚ်တဝ်ပျေၚ် ဒးဒုၚ်ဗတိုက်တုဲ သ္ကိုပ်ဗိုလ်ဒပ်ကဝ်မယှေန်ပၞာန်မွဲတၠကဵု ကောန်ဒပ် ၂၀ တံ ချိုတ်လဝ် ဂွံတီရ။
ပရိုၚ်-သြၚ်လောန်တိုၚ်မ်
Photo – ကျွန်းစုမြို့နယ် ပကဖ