မတ်မလီု၊ နိုဝမ်ပါ၂၅
ဗော်တဴတက်ကရေၚ်ဍာဲ KNPP ကဵု ဗော်သွးကောန်ဂကူကရေၚ် KNU တံ စပ်ကဵုနုက်တိတ်နူဂကောံ ဗွဲယာယဳတုဲ ပ္ညဳပ္ညပ်မံၚ်ဖိုအ်ရောၚ် ကံၚ်သဳဒုၚ်ချပ်ဗ္စာ ပရေၚ်ညဳသၟဟ်ဂကူ NUCC လလောၚ်ပရိုၚ်ရ။
ဒဒှ်ရ KNPP ကဵု KNU တံ နုက်တိတ်နူကဵု NUCC ဗွဲယာယဳ လိက်ပလံၚ်ဗစိုပ်နၚ်ဂှ် ပ္ဍဲနဝ်ဝမ်ပါ ၁၇ ဂွံဒုၚ်တဲရောၚ် သာ်ဝွံ ဂကောံကမၠောန် ဆက်ဆောံညးဍုၚ်ကွာန်ကေုာံ လလောၚ်ပရိုၚ် NUCC ကဵုလဝ်သမ္တီ ပ္ဍဲနဝ်ဝမ်ပါ ၂၂ မဒှ်ရ။
နူကဵုစၟတ်တ္ၚဲ ဂွံဒုၚ်တဲလိက်ဂှ်တုဲ အတိုၚ်လၟေၚ်ကမၠောန်ကံၚ်သဳ သွက်ဒက်ပ္တန်ဂကောံပ္ညဳပ္ညပ် NUCC တုပ်စိုတ် ပလေဝ်ပလေတ်စလဝ်ရဂှ် ပ္ဍဲလိက်လလောၚ်တြး ချူထ္မံက်လဝ်ရ။
ဟိုတ်နူဒှ်မံၚ်ကာလ ဒက်ပ္တန်ဂကောံပ္ညဳပ္ညပ်ကီု သွက်ဂွံပ္ညဳပ္ညပ်ကု ညးတာလျိုၚ် KNPP KNU တံကီုတုဲ ရန်တၟံကဵုပရေၚ်ပၠန်ဂတး နကဵုကတိဝတ်ပဋိဥာဥ်ဖိတ်ဒရေဝ် ဒဳမဝ်ကရေသဳတံဂှ် NUCC ဆက်ရေၚ်တၠုၚ်အာရောၚ် သ္ဂးရ။
ပရေၚ်နုက်တိတ်ထောံဗွဲယာယဳ နူကဵုကောန်ဂကောံကံၚ်သဳဂှ်တှ်ေ သွက်ဂွံစုက်လုက်အာ နနဲပရေၚ်ဍုၚ်ကွာန် ပဵုတုဲညံၚ်ဂွံခိုဟ် ရန်တၟံလဝ်တုဲ သဘဴစပ်ကဵုအရာကိစ္စ ဖျေံသ္ဂုတ်သွာတ်ပရေၚ်ဍုၚ်ကွာန်မ္ဂး မိက်ဂွံကဵုပလေဝ်ရောၚ် ညးအုပ်ကာ KNPP ဥူအံၚ်သာန်မျေအ် ဟီုလဝ်ကဵု ဌာန်ပရိုၚ်သြၚ်လောန်တိုၚ်မ်ရ။
လပါ်ဗော် KNU ပၠန် စပ်ကဵုပွမနုက်တိတ်ဗွဲယာယဳ နူကဵုဂကောံ NUCC တုဲ နူကဵုဌာန်ပရိုၚ် သြၚ်လောန်တိုၚ်မ် ထပ်ဆက်ဖုၚ်သၟာန်ဏာ ညးအခေါၚ်ဟီုဂးနွံ ပဒိုသဝ်တဝ်နဳကီုလေဝ် ဟွံကလေၚ်နၚ်ပရိုၚ်မွဲသာ်ဏီရ။
စနူသၞာံ ၂၀၂၁ ဂိတုမာတ်ချ်တေံရ ဒက်ပတန်လဝ် ကံၚ်သဳဒုၚ်ချပ်ဗ္စာ ပရေၚ်ညဳသၟဟ်ကောန်ဂကူ NUCC ဝွံ ပ္ဍဲကာလပၠန်ဂတး ဂကောံပၠတရဴ ပရေၚ်ဆေင်စပ်ကဵု မူဝါဒမွဲ ဒှ်တုဲ သွက်ဂွံကဵုအရီုဗၚ် NUG နကဵုမူဝါဒတံ မဒှ်ရ။
ပ္ဍဲကဵုဂကောံကံၚ်သဳဏံမ္ဂး ကမ္မတဳသ္ပစၞးစၠတ်ဓရ်ကၟိန်ဍုၚ် CRPH, ဗော်ပရေၚ်ဍုၚ်ကွာန်နာနာ၊ ဂကောံကောန်ဍုၚ်အရၚ်ပၠန်ဂတးနာနာကေုာံ ဂကောံသ္ပစၞးတွဵုရး/ယူနေတ်ဖိတ်ဒရေဝ်နာနာ/ဂကူ/ ကံၚ်သဳ/ ကမ္မတဳဗဗေၚ်တံလေဝ် ပါလုပ်မံၚ်ကီုရ။
လောန်ကၠုၚ်ပ္ဍဲကဵုသၞာံ ၂၀၂၂ တေံဂှ် ဂကောံကချေၚ် KPICT ကေုာံ NLD တံ နုက်တိတ်ထောံ နူကဵုဂကောံ NUCC မဒှ်ကီုရ။
ပရိုၚ်-သြၚ်လောန်တိုၚ်မ်
Photo – NUCC