မတ်မလီု၊ နိုဝမ်ပါ၂၅
ရဲစဴကၠုၚ်နူဍုၚ်ဗြဝတဳ တွဵုရးကရေၚ် ပယျဵုသေံတံလုပ်စိုပ်ကၠုၚ် တွဵုရးမန်မ္ဂး ဒပ်ကဝ်မယှေန်ပၞာန် မာတ်ဆိုအ်ရပ်ထိၚ်ကေတ်တုဲ စၟဳစၟတ်မံၚ်ဏောၚ် ရဲကြပ်ကဵုကဝ်မယှေန်ပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ရဲစဴကၠုၚ် နူပွိုၚ်ဍုၚ်ဗြဝတဳတံဂှ် ဒၞာဲသၞေဟ်ကၚ်စၟဳစၟတ် ပွိုၚ်ဍုၚ်သဓီု၊ ၜဳလေၚ်ကဵု ကျာ်ထဝ်တံ ဒပ်ကဝ်မယှေန်ပၞာန် မာတ်ဆိုအ်တုဲ ရပ်မံၚ်ရ။
အပ္ဍဲဏံ အဓိကစွံအာရီုကဵု ညးဒေသတွဵုရးသေံ တၞးကာတ် ကောန်ဍုၚ် ၁၃/ တံဂှ် ရပ်မံၚ်တုဲ ကောန်ဍုၚ်ကြုက်လ္ၚဵုတံ ဒးဒုၚ်ရပ်လဝ်နွံမံၚ်ရောၚ်ဂှ် ဂၠိုက်ဂၠာဲတုဲ ဂွံတီရ။
အတိုၚ် ဌာန်ပရိုၚ်သြၚ်လောန်တိုၚ်မ် သၟာန်သၟုက်ဂၠိုက်ဂၠာဲဂွံလဝ်မ္ဂး ဒဵုကဵုနဝ်ဝမ်ပါ ၂၃ ဂှ် ရပ်ဂွံလဝ်မၞိဟ် ၄၀၀ ပြၚ်ၚ် ထိၚ်စွံလဝ် ပ္ဍဲကဵုခဒမ်ဂံၚ်ဇာနဲ ဗွိုၚ်ဒပ်ဗၠာဲသၟိၚ်ခရိုၚ်သဓီုတုဲ သၟာန်သၟုက် ကေတ်မံၚ်တၚ်နၚ် နာနာ မဒှ်ရ။
အပ္ဍဲကဵုမၞိဟ်ရပ်ဂွံလဝ်တံဏံ စပ်ကဵုကမၠောန်ကျာဖျ ကၠောန်လဝ်ဒုဟ်ဒဏ်ကၠးမးမ္ဂး စဳစဥ်လဝ်သွက်ဂွံပံက်အမှု ကေတ်အာအရေဝ်နွံမံၚ်ရောၚ် အတိုၚ်ရိုဟ်ကၞက်ပရိုၚ်ဒပ်ဗၠာဲသၟိၚ်တံဟီုလဝ် ဂွံတီရ။
အကြာဒးဒုၚ်မံၚ် ဇြဟတ်ဟရိုဟ်ဍုၚ်ဂၠးကဝ်တံဂှ် ဗတိုက်သရိုဟ်အာ ကမၠောန်ကျာဖျ ဒဵုအိုတ်ကၠက်ဏောၚ် ကဝ်မယှေန်ပၞာန် ကြဴဇာလဝ်ရ။
စနူဂိတုအံက်တဝ်ပါ လောန်ကၠုၚ်ဏံဂှ် ဒပ်ကဝ်မယှေန်ပၞာန်လုပ်သီလဝ် ဌာန်ကမၠောန်ကျာဖျ ပ္ဍဲကဵု KK Park ကဵု ဍုၚ်တၟိ ယှိုဲကုက်ကို ဒၞာဲဒပ်မၚ်ပယျဵုကရေၚ် BGF ထိၚ်ချုက်လဝ်တံတုဲ ရဲကောန်ကမၠောန် ကျာဖျ နူကဵုဍုၚ်ဂၠးကဝ်ဗွဲမဂၠိုၚ် နကဵုဂကောံကဵုဂကောံ ဂြိပ်တိတ်မံၚ်ရ။
အခိၚ်လုပ်သီဍုၚ်တၟိ ယှိုဲကုက်ကိုဂှ်တှ်ေ ရဲကၠောန်ကမၠောန် ပရေၚ်လီသြန်အန်လိုၚ်၊ ကမၠောန် ဝေၚ်ဇျှၚ်လံၚ်သြန်တံဟၟဲရတုဲ ရပ်သီဂွံလဝ် ကောန်ပျူတာကဵု ကပေါတ်ဆက်စပ်တံနွံမံၚ်ရဂှ် ကဝ်မယှေန်ပၞာန် လလောၚ်ပတိတ်လဝ်ပရိုၚ် ပ္ဍဲကဵုနဝ်ဝမ်ပါ ၂၃ မဒှ်ရ။
ပရိုၚ်-သြၚ်လောန်တိုၚ်မ်
Photo – CJ