တနင်သဳ၊ နိုဝမ်ပါ၂၆
ပ္ဍဲရးတနၚ်သဳ ဟိုတ်နူ ပေါဲဗတိုက်သီဍုၚ်မဝ်တံၚ်ဂှ် ညးဒဴပၞာန် ဂြိပ်စိုပ်အာပယျဵုသေံတံ ဒၟာနူလပါ်သေံ ကလေၚ်ဗလးဖျဴတုဲ ညးပါဲဒဴပၞာန်မဝ်တံၚ်တံ နကဵုစိုတ်ဒွိၚ်ဒးကလေၚ်စဴကၠုၚ်မံၚ်ယျဂှ် ညးကဵုမံၚ်အရီုဗၚ်တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူနိုဝမ်ပါ ၂၃ ဂှ် ညးတာလျိုၚ်သေံ သၞေဟ်ကၚ်ပယျဵုမဝ်တံၚ် ဟီုကဵု ညးပါဲဒဴပၞာန်တံသွက်ဂွံကလေၚ်စဴတုဲ ရဲဒဴပၞာန်တံဟွံဂံၚ်ဆက်မံၚ် ဒးကလေၚ်စဴမံၚ်ပ္ဍဲကဵုဍုၚ် ပရေၚ်ဂီုကၠီုဟွံညိၚ်ဝပ်ဏံရ။
နူကဵုလပါ်သေံ ၜိုန်ရကဵုမံၚ်ဇြဟတ်ဟရိုဟ်ကီုလေဝ် ဟိုတ်နူဒှ်မံၚ်ဒွိၚ်ဟွံဂံၚ်ကလေၚ်စဴသ္ၚိ နွံမံၚ်အပ္ဍဲဍုၚ်ဂှ်တှ်ေ ဆသှ်ေအာမံၚ် ပ္ဍဲလ္တူပၞောန် ပယျဵုလပါ်သေံတံ ဗွဲမဂၠိုၚ်ဏီရောၚ်ဂှ် ညးကဵုအရီုဗၚ်ဘဲပၞာန်မွဲတၠ သ္ဂးရ။
ဟိုတ်နူပေါဲဗတိုက် သီဍုၚ်မဝ်တံၚ် ညးဂြိပ်ပါဲဘဲပၞာန် ၜိုတ် ၈၀၀ စိုပ်အာလပါ်သေံတုဲ သှ်ေမံၚ်ၜိုတ် ၃၀၀၀ ဂှ်တှ်ေ ဆက်မံၚ်ဒၟံၚ် ကရပ်သၞေဟ်ကၚ်ပယျဵုရ။
ဒပ် KNLA သ္ကိုပ်သ္ကဂကောံပၠန်ဂတးဒပ်ပံၚ်ကောံမဟာမိတ်တံ ထိၚ်ချုက်ဂွံလဝ်ဍုၚ်မဝ်တံၚ်ကီုလေဝ် ပရေၚ်တိဍာ်ဟွံညိၚ်ဝပ်ဏီဂှ်ကီု၊ ဒးဂွိၚ်မံၚ်ကဵုဘဲအန္တရာဲပၞာန်ကျာကဵု လွဟ်ဇၞော် ဒပ်ကဝ်မယှေန်ပၞာန်တံဖိုအ်ဏီရောၚ်။
ဍုၚ်မဝ်တံၚ် ပရေၚ်ကူသာန်ကပေါတ်ဗၞိက် ဒေသပယျဵုကိစ္စဇၞော်မွဲဂှ် ဒပ်ပၞာန်ဗၠးၜးကောန်ဂကူကရေၚ် KNLA ကဵု ဂကောံပၠန်ဂတး ဒပ်ပံၚ်ကောံမဟာမိတ်တံသီဂွံလဝ် ပ္ဍဲကဵုနဝ်ဝမ်ပါ ၁၄ တေံ မဒှ်ရ။
ဍုၚ်မဝ်တံၚ် ဟိုတ်နူဒးဒုၚ်သီဏာတုဲ ညံၚ်ဂွံကလေၚ်ထိၚ်ချုက်ကေတ်ဍုၚ်မာန်ပၠန်ဂှ် ကဝ်မယှေန်ပၞာန် ထပ်ပလံၚ်နၚ် ကောန်ပၞာန် ၁၀၀ ပြၚ် နကဵုၜၚ်ကျာပၞာန်၊ ထပ်ထပက်မံၚ် ကရောၚ်ပၞာန်ဂှ် ပ္ဍဲကဵုကွာန်သိၚ်ခေါန်ကဵု ဗတဳဗုတံ ပေါဲဗတိုက် ဆက်ဒှ်မံၚ်ဏီရဂှ် ဂွံတီကေတ် နူရိုဟ်ကၞက်ပရိုၚ်ဒေသတံရ။
ပရိုၚ်-သြၚ်လောန်တိုၚ်မ်
Photo – Social Media