ၜဳလေၚ်၊ နိုဝမ်ပါ၂၆
တွဵုရးဍုၚ်မန် ပ္ဍဲကဵုပွိုၚ်ဍုၚ်ၜဳလေၚ် စနူဂိတုဏံ လ္တူရဲအာမံၚ်အခိၚ်ဗ္တံတံဂှ် ကောန်ဒပ်ကဝ်မယှေန်ပၞာန်တံ ရပ်ပယျာတ်အာတ်ကေတ်သြန် ပဵုကြီုတိုန်မံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
စနူဂိတုနဝ်ဝမ်ပါဏံမံက်ဂှ် ရဲအာကၠုၚ်လ္တူဂၠံၚ် အခိၚ်ၜက်နူကဵု ၈ နာဍဳမ္ဂး ပရူပရာဟိုတ်ဟၟဲကီုလေဝ် ဒပ်ကဝ်မယှေန်ပၞာန်၊ ဒပ်ဗၠာဲသၟိၚ်ကဵုဒပ်မၚ်ကွာန်တံ ရပ်တုဲပယျာတ်အာတ်ကေတ်မံၚ်သြန် ပဵုဂၠိုၚ်တိုန် မံၚ်ရ။
အတိုၚ်ညးဒေသတံဟီုမ္ဂး စွံပွန်ကဵု ညးအာကၠုၚ်အခိၚ်ဗ္တံတံတုဲ ဒပ်ကဝ်မယှေန်ပၞာန် ရပ်အာတ်ပယျာတ်သြန် မွဲတၠမ္ဂး အောန်အိုတ်မွဲကိုဋ် ဒဵုကဵု ၅ ကိုဋ်နွံမံၚ်ရ။
ရပ်ပယျာတ်အာတ်ကေတ်သြန်တုဲဂှ်တှ်ေ ကလေၚ်ဗလးကဵုဓဝါဲဂှ်ဟွံသေၚ် ချုက်လဝ်ပ္ဍဲဗ္ဒိုပ်ဗၠာဲသၟိၚ် ၜိုတ်မွဲဗ္တံတုဲမှ အာတ်သြန် ရဲသ္ၚိကၟိန်အိန်ထံၚ်တံမွဲအဆံၚ်တုဲ ကလေၚ်ဗလးကဵုမၚ် မဒှ်ကီုရ။
ပရေၚ်ရပ်မၞိဟ်ကဝ်မယှေန်ပၞာန် ဗီုတံဏံဂှ် ဟိုတ်ပရူပရာဟၟဲ ဂၠာဲစသြန်သက်က်ရဒှ်တုဲ ဒှ်မံၚ် ပရေၚ်ဍဵုဍိုက်ညးဍုၚ်ကွာန် လွဟ်လက်နက်ဟၟဲတံရောၚ် ညးဒေသမွဲတၠ ဟီုဂးပါ်ပါဲလဝ်ရ။
အမိၚ်တိတ်ဗ္တံဟွံဂွံ ပ္ဍဲကဵုပွိုၚ်ဍုၚ်ၜဳလေၚ် နူအခိၚ်ဗ္တံ ၁၂ နာဍဳ ဒဵုစိုပ်နူဂယး ၄ နာဍဳ ကဝ်မယှေန်ပၞာန် ခုတ်စၟတ်လဝ်ကီုလေဝ် ပြဟ်ဟ်ဏံ လ္တူညးအာဂၠံၚ်အခိၚ်ဗ္တံ ၜက်နူ ၈ နာဍဳတံ ရပ်တုဲ အာတ်ပယျာတ်ကေတ်မံၚ်သြန် မဒှ်ရ။
ဒၞာဲဇြဟတ်ပၠန်ဂတး ခိုဟ်ချဳဒရာၚ်မံၚ် ပွိုၚ်ဍုၚ်ၜဳလေၚ်ဂှ် ကၠာဟွံစိုပ်ပေါဲရုဲမာဲဏံ ဒပ်ကဝ်မယှေန်ပၞာန် သၠုၚ်ပတိုန်လဝ် ပရေၚ်ဂီုကၠီုတံကီု၊ ဖျေံလဝ်ကၚ်ဒမၠုက်နာနာကီု ဂၠိုၚ်တိုန်မံၚ်ဂှ် ဂွံတီနူညးဒေသတံရ။
ပရိုၚ်-သြၚ်လောန်တိုၚ်မ်