မတ်မလီု ၊ နိုဝမ်ပါ၂၆
ပ္ဍဲတွဵုရးမန် ဒၞာဲဒယှ်တှ် ဍုၚ်မတ်မလီု စပ်ကဵုထပက်သရိုဟ်မံၚ်ဒဵုဗိုင်ဂှ်တုဲ ပရေၚ်ပါ်ပါဲအကြာညးဒေသတံ သၠုၚ်မံၚ်ကီုလေဝ် သွက်ဂွံဆက်သရိုဟ်အာမံၚ်ဂှ် ကဝ်မယှေန်ပၞာန်တွဵုရးကဵုလဝ်အခေါၚ်ရောၚ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
သရိုဟ်ဒဵုတုဲ ဂွံနၚ်လဝ်တိကဵုတၟံတံဂှ်တှ်ေ သွက်ဂွံဗဝ်သၠုၚ် ဒၞာဲဂအာၚ်သ္ၚိ ကိုန်အစဳဇန် ဍုၚ်တၟိလှိုၚ်ကေုာံကိုန်အစဳဇန် သၞေဟ်ၜၚ်ကျာတၟိ ပ္ဍဲကရပ်မုဟ်ဍုၚ် မဒှ်ရ။
စကာစက်ယန္တရာဇၞော်ဇၞော်တုဲ အရိုဟ်ဟ်တ္ၚဲ ၜံက်ခါဲမံၚ်ဒဵုဗိုင်ကီု ကွဳစက်ဂမၠိုၚ်တံ အလန်ကဵုအလန် လုပ်တိတ်ဖ္ဍိုက်ကေတ်ဏာမံၚ် တိဂမၠိုၚ်တံဂှ်တှ်ေ ဖေက်ဒဵုဗိုၚ်လီုလာ်အာ ညးဒေသတံဒှ်မံၚ်ဒွိၚ်အိုတ်ရ။
ဟိုတ်နူကဵုလဝ်အခေါၚ် ၜံက်ခါဲတိ ပွဳပွူဒဵုဗဵုဂှ်တုဲ အန္တရာဲဒဵုလာ် သရိုဟ်စှ်ေမာန်ကဵု ပရေၚ်ပွဳပွူသဘာဝလေဝ် လီုလာ်အာမန်ရောၚ် ညးမံၚ်ဒၟံၚ် ကရပ်ဒဵုဗိုၚ်မွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ကရပ်ဘာလကျာ် ဘာသီဂှ် ၜံက်ခါဲမံၚ်။ တိတ်ကၠုၚ်နူဘာသီတှ်ေ လပါ်ဂၠံၚ်တိတ် ၆ တိုၚ်တေံ နွံမံၚ်ဒၞာဲပၠန်။ ကရပ်ဒၞာဲခါဲမံၚ်ဒဵုဏံ တက်လဝ်ဂအာၚ်သ္ၚိတံဂှ် အန္တရာဲနွံမံၚ်။ ဟွံဂွံသိုင်လဝ်သ္ၚိဏီ။ ဒှ်အခက်အခုဲဍာ်မာန်။ သဘာဝလီုလာ်ရောၚ်” သာ်ဝွံသ္ဂးရ။
ဟိုတ်နူၜံက်ခါဲသရိုဟ်မံၚ်ဒဵု ဗီုဏံတုဲ ပြဿနာ ပရေၚ်ကၠောဝ်ဍာ် ဇၟာပ်ပ်သၞာံ ဒးဂဗဆဵုမံၚ်သၟးဟွံက ဒဵုလာ်စှ်ေတှ်ေ ဒးဂွိၚ်မံၚ်ကဵု သ္ၚိနွံမံၚ် ဗ္ဒာဲဗ္ဒာဲတံရဂှ် ညးဆက်ဟီုရ။
ၜိုန်ညးဍုၚ်ကွာန်တံ ဟီုဂးပါ်ပါဲမံၚ်ကီုလေဝ် အတိုၚ်ပၟိက်စိုတ် တၠအဝဵုတံ ဍေံတံဆက်ၜံက်ခါဲသရိုဟ်မံၚ်ဒဵုရ ညးဒေသ လ္တူဍုၚ်မတ်မလီုမွဲတၠ ပါ်ပါဲလဝ်ရ။
“ပရေၚ်ဏံဂှ် ကောန်ဍုၚ်ဇၞော်ဒှ်ဒှ် ညးဆာန်ဍုၚ်ဒှ်ဒှ် ဟွံရန်ကဵုဖဵုဇကုတှ်ေ ဒှ်မံၚ်ကပေါတ်ညးဍုၚ်ကွာန်တံ ပိုၚ်ပြဳရောၚ်။ ဒြပ်ကၟိန်ဍုၚ်ပိုၚ်လဝ် ကပေါတ်ကောန်ညးဍုၚ်ကွာန်တံ ပိုၚ်လဝ်ဏောၚ်။ ညးလဵုမွဲမှ ဍေံတံဟွံထံက်ဟွံရံၚ်လဝ်ပုဟ်။ စကာအဝဵုဟွံစှ်ေကဵုဒၞာဲ ဗီုပၟိက်စိုတ်ဍေံ ဍေံတံကၠောန်မံၚ်” သာ်ဝွံသ္ဂးရ။
အတိုၚ်ဌာန်ပရိုၚ်သြၚ်လောန်တိုၚ် ဂၠိုက်ဂၠာဲစၟဳစၟတ်လဝ်မ္ဂး သွက်ဂွံၜံက်ခါဲသရိုဟ်ဒဵုဗိုၚ်ဂှ် ကဝ်မယှေန်ပၞာန်တွဵုရး ကဵုလဝ်အခေါၚ် ကဵု ဂကောံတၠကမၠောန်ဗက်ဟိုဝ် မွဲဂကောံတုဲ တိကဵုတၟံ တိတ်ကၠုၚ် နူဏံဂှ် ကာန်ပနဳခရိုနဳမတ်မလီု ဥူမိုဝ်ကျဝ် ကလေၚ်ရာန်ကေတ်မံၚ် ရဂှ် ဂွံတီရ။
စပ်ကဵုပရေၚ်ခါဲၜံက် သရိုဟ်မံၚ်ဒဵုဗိုၚ်တုဲ ပရေၚ်ပါ်ပါဲညးဍုၚ်ကွာန်တံ သၠုၚ်မံၚ်ကီုလေဝ် အကာဲအရာပွဳပွူသဘာဝ ၜိုတ်လဵုလီုလာ်အာမာန်ဂှ် ညိလေဝ် ဟွံသောၚ်ကလးကဵုညးဍုၚ်ကွာန်၊ အတိုၚ်ပၟိက်စိုတ် ကဝ်မယှေန်ပၞာန်တွဵုရးဂှ် ဆက်ကဵုလဝ်အခေါၚ်ကၠောန်ရ။
ပ္ဍဲကဵုနဝ်ဝမ်ပါ ၂၀ တေံ စပ်ကဵုပရေၚ်ၜံက်ခါဲဒဵုဗိုၚ်တုဲ ဂကောံဌာန ဆေင်စပ်ဂမၠိုၚ် သၟဝ်တဲကဝ်မယှေန်ပၞာန်တွဵုရးတံ ကၠုၚ်စၟဳစၟတ် ဗွဲလ္တူကျာကီုလေဝ် မွဲသာ်မှ ဟွံတၟေၚ်ကၠုၚ်ပုဟ်ဂှ် ညးကြပ်ကဵုကဝ်မယှေန်တံ ဟီုဂးမံၚ်ရ။
ပရိုၚ်-သြၚ်လောန်တိုၚ်မ်
Photo – CJ