မတ်မလီု၊ နိုဝမ်ပါ ၂၇
ပ္ဍဲတွဵုရးကရေၚ် ဍုၚ်ဖာအၚ်ကဵု ရးတနၚ်သဳ ပွိုၚ်ဍုၚ်တယိတ်ချံၚ်တံဂှ် ညးဍုၚ်ကွာန် ၂ တၠ ဒးဒုၚ်ပံက်အမှု နကဵုဥပဒေစဵုဒၞာပေါဲရုဲမာဲ ဂွံတီရ။
တုဲကၠုၚ်နိုဝမ်ပါ ၂၀ တေံ ဂတဵုမုက်ဗော်ပျဳခိုၚ်ဖျိုဝ် စန်ဒက်မာဲပစူလဝ်ကရပ်ဘာလကျာ် ကွာန်တၟအ်ဒစေၚ် အရာပ် ၆ ၊ ဂၠံၚ်သဳရိ ပွိုၚ်ဍုၚ်ဖာအၚ်ဂှ် ဂစိုက်လဝ်ဂးတုဲ ဒပ်ဗၠာဲသၟိၚ်တံအာရပ်ကၠေၚ်ဏာ ကိုထက်နေလေၚ် (အယုက် ၂၇ သၞာံ) သ္ၚိနွံမံၚ် အရာပ် ၉ ရ။
တုဲပၠန် ရပ်ကော်ဏာရုၚ်ဗၠာဲသၟိၚ် ၝောံဍုၚ်ဖာအၚ်တုဲပံက်လဝ်အမှု နကဵုၝောံပိုဒ် ၂၄(က) ဥပဒေ နကဵုစဵုဒၞာပွပလီုပထုဲ ပေါဲရုဲမာဲတုဲရပ်ချုက်လဝ် ဂွံတီရ။
ဗီုဏံကီု ပ္ဍဲနဝ်ဝမ်ပါ ၇ ဂှ် ပ္ဍဲကဵုဍုၚ်တယိတ်ချံၚ် လ္တူဂၠံၚ်ကွဳစက် ဗိက်-ဓဝါဲဂှ် “ဒစဵုဒစးပေါဲရုဲမာဲညိ” ဟိုတ်နူချူလဝ်မလိက်တုဲ ပ္ဍဲနဝ်ဝမ်ပါ ၁၈ ဂှ် ရပ်ချုက်ကၠေၚ်ဏာ ရဲဍုၚ်တယိတ်ချံၚ် ကျဝ်ကျဝ်(ကော်) ညဳညဳ အယုက် (၃၁) သၞာံ၊ ပံက်လဝ်အမှု ပရေၚ်စဵုဒၞာပေါဲရုဲမာဲ နကဵုၝောံပိုဒ် ၂၃(က)/၂၃(ခ) ပ္ဍဲကဵု ဗ္ဒိုပ်ဗၠာဲသၟိၚ်ၝောံဍုၚ် တယိတ်ချံၚ်တုဲ သွက်ဂွံရပ်ကၠေၚ်အာဂှ် ဖန်ဇန်မံၚ်ရ သ္ဂးရ။
ပ္ဍဲနဝ်ဝမ်ပါ ၆ တေံလေဝ် ဟိုတ်နူပလီုလဝ် ဂတဵုမုက်စန်ဒက်မာဲ သ္ကိုပ်ဝန်ဇၞော် သဝ်အံၚ်မျေအ်ဥူဂှ် ရပ်ဏာညးတြုံ ၂ တၠတုဲ ပံက်လဝ်အမှုနကဵုဥပဒေစဵုဒၞာ ပေါဲရုဲမာဲမဒှ်ရ။
ပေါဲရုဲမာဲကၠောန်အာဏံဂှ် ထ္ၜးဟိုတ်ဗီုပြၚ်မွဲမွဲတုဲ မၞိဟ်စဵုဒၞာဒစဵုဒစးလဝ်တံဂှ်တှ်ေ ကဝ်မယှေန်ပၞာန် ပတိတ်ဥပဒေ တုဲ စောဲအမှုရပ်ကၠေၚ် ပတေၚ်ဓရတ်လဝ် တေၚ်ၚ်ရ။
သွက်ပေါဲရုဲမာဲဂွံလီု ရန်တၟံတုဲ ပ္ဍဲမုက်လိက်ဇာဖိုၚ် ပရေၚ်မၞိဟ်တံကီု၊ ဟီုတွံမံၚ် ဒၞာဲဆေၚ်စပ်ကဵုမၞိဟ်ဂမၠိုၚ်ကီု ဟီုဂး၊ ထပက်ဆီ၊ ထ္ၜးဆန္ဒ၊ ချူဆန်၊ ဗာန်ရုပ်ပဝ်သတာတံကီု ပရေၚ်ကမၠောန် ပေါဲရုဲမာဲဂွံလီု ပလီုပထုဲမံၚ်တံ နကဵုဥပဒေစဵုဒၞာပရေၚ်ပေါဲရုဲမာဲဂှ် ဒပ်ပရေၚ်ဂီုကၠီုတံ ဗွဲမစိုပ်တရဴ ကေတ်အာအရေဝ်ဏောၚ် နူကဵုကဝ်မယှေန်ပၞာန် လလောၚ်ပတိတ်လဝ် ပရိုၚ်ရ။
ဒဵုကဵုအခိၚ်တ္ၚဲဏံ ပံက်အမှုကေတ်လဝ်အရေဝ် နကဵုဥပဒေစဵုဒၞာ ပေါဲရုဲမာဲဂှ် မၞိဟ်ဟွံအောန်နူကဵု ၁၀၀ တၠ နွံမံၚ် ဂွံတီရ။
ပရိုင်-သြၚ်လောန်တိုၚ်မ်
Photo – Social Media