မတ်မလီု၊ နိုဝမ်ပါ ၂၇
စပ်ကဵုပရေၚ်သီလဝ်ကၟိန်ဍုၚ် သၞာံ ၂၀၂၁ ဂှ်တုဲ ညးပါလုပ်လဝ် ပ္ဍဲကဵုကော်လဝ်ကောံဓရီု ကံၚ်သဳစဵုဒၞာကောန်ဂကူ ကေုာံ ပရေၚ်ဂီုကၠီုတံဂှ် ဒှ်သၟာပကီုပရာတ် ညးမပုန်ဂတးလဝ်ကၟိန်ဍုၚ်တံရောၚ် NUG ခုတ်စၟတ် လလောၚ်တြးဏာရ။
နူကဵုဂကောံဗတိုက်သရိုဟ် ပရေၚ်ပကီုပရာတ်ဗဟဵု စကာအခေါၚ်အဝဵုသုၚ်စောဲဥပဒေ ပရေၚ်ဗတိုက်သရိုဟ် နကဵုၝောံပိုဒ် ၆၊ ၝောံပိုဒ်ပါ် (င) ကေုာံ ၝောံပိုဒ် ၇၂ ၝောံပိုဒ်ပါ်(ခ)တံတုဲ အတိုၚ်တင်တုပ်စိုတ် ဂကောံအလဵုအသဳဂှ် လလောၚ်တြးလိက်အမိၚ် ပ္ဍဲကဵုနိုဝမ်ပါ ၂၅ အခိၚ်သဝ်တ္ၚဲဂှ် မဒှ်ရ။
ပ္ဍဲကဵု ဂိတုဖေဖဝ်ဝါရဳ ၁ သၞာံ ၂၀၂၁ ဂှ် ဟွံသေၚ်ကဵုလၟေၚ်ဥပဒေ နူကဵုဒပ်ပၞာန် ကော်လဝ်ကောံဓရီု ကံၚ်သဳစဵုဒၞာကောန်ဂကူကေုာံ ပရေၚ်ဂီုကၠီုတုဲ ရပ်လဝ်သမ္မတကၟိန်ဍုၚ်ကဵု ညးဒုၚ်ကဵုကသပ် ကၟိန်ဍုၚ် ဒဝ်အံၚ်သာန်သုကျဳကီု သီုကဵုဂကောံအလဵုအသဳ ညးဍုၚ်ကွာန် ရုဲစှ်ပတိုန်ကဵုလဝ်တံဂှ် ဒှ်အရာပွမပုန်ဂတးလဝ် ကၟိန်ဍုၚ်ရောၚ် ချူထမံက်လဝ်ရ။
ညးကော်လဝ်ကောံဓရီု ကံၚ်သဳစဵုဒၞာကောန်ဂကူကေုာံပရေၚ်ဂီုကၠီု ဟွံလုပ်ဗဗွဲသၞောဝ်တံဂှ် အဓိက ဒှ်ညးမကလိလောန်လဝ်ဒုဟ်ဒဏ် နဒဒှ် သၟာပကီုပရာတ်တံရောၚ် ခုတ်စၟတ်လလောၚ်တြးလဝ် မဒှ်ရ။
တုဲပၠန် နူကဵုသၞာံ ၂၀၂၁ ဖေဖဝ်ဝါရဳ ၁ တေံကဵု အကြာသၞာံ ၂၀၂၅ ဂိတုဂျူလိုၚ် ၃၁ ဏံ နူကဵု “ကံၚ်သဳပရေၚ်အုပ်ဓုပ်ကၟိန်ဍုၚ်” ဂကောံအလဵုအသဳဆက်က်တံ ကဵုကၠုၚ်လဝ်တာလျိုၚ် ကံၚ်သဳစဵုဒၞာ ကောန်ဂကူကေုာံ ပရေၚ်ဂီုကၠီုတံကီု ဒှ်သၟာပကီုပရာတ်တံကီုရောၚ် ခုတ်စၟတ်လဝ်ကီုရ။
သွက်ဂွံကေတ်အရေဝ်ကဵု သၟာပကီုပရာတ်တံဏံနကဵုဥပဒေဂှ် နူကဵုဂကောံဗတိုက်သရိုဟ် ပရေၚ်ပကီုပရာတ်ဗဟဵု ဂစာန်အာမဒှ်တုဲ ဂကောံပၠန်ဂတးတံကဵု ညးဍုၚ်ကွာန်လေဝ်ပါလုပ်ကီုညိဂှ် ဗတိုက်ဖအောဝ်လဝ်ရ။
အပ္ဍဲကဵု ပရေၚ်ဒပ်ပၞာန်သီအဝဵု ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ကော်လဝ်ကောံဓရီု ကံၚ်သဳစဵုဒၞာကောန်ဂကူ ကေုာံ ပရေၚ်ဂီုကၠီု ညးကေတ်လဝ်တာလျိုၚ် သမ္မတယာယဳ ဥူမျေအ်သွိုဲဂှ် စုတိအာလဝ်တုဲ မဒှ်ရ။
ပြဟ်ဟ်ဏံ နူကဵုကဝ်မယှေန်သီအဝဵုဂှ် ညံၚ်ဂွံဒှ်တိုန် အလဵုအသဳဒုၚ်ရုဲစှ်လဝ် နကဵုဆန္ဒမာဲညးဍုၚ်ကွာန် လုပ်ဗဗွဲသၞောဝ် ပရေၚ်ဍုၚ်ကွာန်မာန်ဂးတုဲ ပ္ဍဲအကြာကၞောတ်သၞာံအိုတ်ဏံ ဂစာန်ကၠောန်ဗ္ဒျ်မံၚ် ပေါဲရုဲမာဲရ။
ပရိုင်-သြၚ်လောန်တိုၚ်မ်
Photo – MOI