မတ်မလီု ၊ နိုဝမ်ပါ ၂၇
စပ်ကဵုပရေၚ်လီသြန်အန်လိုၚ်မ္ဂး ယၟုဍုၚ်ဗမာဒယှ်လီုပရအ်မံၚ်အိုတ်အစောန် ကော်ခဴစကမၠောန်ကျာဖျတံဂှ် သွက်ဂွံဗတိုက်သရိုဟ်အာ သီုကဵုဂကောံဇြဟတ်မဟာမိတ်တံ မွဲကရောံကီု ဗော်ဍုၚ်မန်တၟိ AD ပံၚ်တောဲရေၚ်တၠုၚ်အာကဵု ဍုၚ်ဂၠးကဝ်တံရောၚ် ပ္ဍဲနဝ်ဝမ်ပါ ၂၅ ဂှ် ပတိတ်လဝ် လိက်လလောၚ်တြးရ။
ဍုၚ်ဗမာဂှ် ညံၚ်ဟွံဂွံဒှ်အာ ဌာန်ဒၞာဲဗဟဵု အမှုရာဇဝတ်ဒေသကေုာံ ပရေၚ်ဖံက်ပကဝ်အခေါၚ်အရာမၞိဟ်တံမာန်ဂှ် ဗော်ဍုၚ်မန်တၟိ AD သွက်ဂွံပံၚ်တောဲရေၚ်တၠုၚ်အာမွဲကရောံကဵု ဂကောံဇြဟတ်မဟာမိတ်တံကီု၊ ဂကောံဂၠးကဝ်၊ ဂကောံနွံအပ္ဍဲဒေသတံ မဒှ်ရ။
တုဲပၠန် တၠအဝဵုပၞာန်တံကဵု ဂကောံသၟဝ်တဲဒပ်ပၞာန်တံ ဖန်ဖက်လဝ် ပရေၚ်ဇာဖိုၚ်ရာဇဝတ်သိုက်ဖာတံဏံ ညံၚ်ဂွံပြးဇးအာဂှ် ညးတံအဓိကတာလျိုၚ်နွံမံၚ်တုဲ ညံၚ်ဂွံစဳရေၚ်အာအမှု ဂစာန်ကေတ်မံၚ်အရေဝ်တံဂှ် ပံၚ်တောဲရေၚ်တၠုၚ်အာရောၚ် လလောၚ်တြးလဝ်ရ။
နကဵုဗော်ဍုၚ်မန်တၟိ AD ပံၚ်တောဲအာကဵု ဂကောံအမေရိကာန် Scam Center Strike Force၊ သေံ၊ ကြုက်၊ အာသဳယာန် ကေုာံဍုၚ်ဗတိုက်သရိုဟ် ပရေၚ်လီဠာန်သြန်အန်လိုၚ်တတ်ကၠောံဍုၚ်တံရောၚ် သ္ဂးရ။
ပံက်ဂကောံကမၠောန် ပရေၚ်ဗတိုက်သရိုဟ်သိုက်ဖာတတ်ကၠောံဍုၚ်တုဲ သွက်ဂွံဘိုၚ်ထံက်ပၚ်ရီုဗၚ်အာ ညးဒးဒုၚ်ကူသာန်မၞိဟ်တံကီု၊ သွက်ဂွံကဵုအရီုဗၚ် ပ္ဍဲအရာကလေၚ်ကော်ဖျဴ ညးပၞော်ဂၠံၚ်ကၠက်မာတ်ဆိုအ်မံၚ် အပ္ဍဲဍုၚ်တံကီုကေုာံ နဲကဲပံၚ်တောဲရေၚ်တၠုၚ် ဗီုပြၚ်တၞဟ်ဟ်တံဂှ်လေဝ် ဂၠာဲအာကီု မဒှ်ရ။
သွက်ဂွံပ္တန်အာ တွဵုရးမန်/ဒေသမန် ပရေၚ်လီဠာန်သြန်အန်လိုၚ်တတ်ၜက်ဍုၚ် သ္အးကၠေံ၊ သွက်ဂွံဒက်ပ္တန်အာ ကၟိန်ဍုၚ်ဗမာ ကမၠောန်လီဠာန်သြန်ဟၟဲတံ အလန်ပထမ လဂါံဇိုၚ်ကၠာအိုတ်ရောၚ် သ္ဂးရ။
အခိၚ်ပၞာန်သီအဝဵုတုဲဏံ အပ္ဍဲကဵုဍုၚ်ဗမာမ္ဂး ပရေၚ်ကူသာန်မၞိဟ်၊ ပရေၚ်လီသြန်အန်လိုၚ်၊ ပရေၚ်ဍဵုဍိုက်ပျဲပျာံ ကေုာံ ပရေၚ်ဂစိုတ်မၞိဟ် မပ္တံကဵုပရေၚ်ရာဇဝတ်တတ်ကၠောံဍုၚ် သၞောတ်စှ်ေစှ်ေတံ က္တဵုဒှ် ပဵုဂၠိုၚ်ကၠုၚ်အဆရောၚ် သ္ဂးရ။
ပံၚ်တောဲကဵု ဂကောံမဟာမိတ်ဇြဟတ်ပၠန်ဂတးတံ မွဲကရောံတုဲ ပ္ဍဲဂိတုဂျာန်နဝါရဳ ၂၀ သၞာံဏံဂှ် ပံၚ်တောဲလိက်လလောၚ်တြး ပျုတ်ဗ္ဒေက်ဏာပရေၚ်ရာဇဝတ်တံဏံတုဲ လ္တူညးဖံက်ပကဝ်လဝ်တံဂှ် အတိုၚ်လိက်လိက်လလောၚ်တြးတေံ ဆက်ဒတူလိုၚ်အာရောၚ် သ္ဂးလဝ်ရ။
တုဲပၠန် ပရေၚ်ရာဇဝတ်တံဏံဂှ် အလဵုလဵုက္တဵုဒှ်ကေတ်သၟးသၟးဟွံသေၚ် ဟိုတ်နူကဵုတၠအဝဵုပၞာန်ဗမာတံကဵု ဂကောံသၟဝ်တဲဒပ်ပၞာန် ဆက်စပ်မံၚ်တံ ကဵုလဝ်ဇြဟတ်က္တိုၚ်ၚ်ကၟိုဟ်ဟ် ချဳဒရာၚ်ပါလုပ် ကေတ်မံၚ်ပရဲပရၚ်တံရဂှ် ချူလဝ်ရ။
ပရေၚ်ရာဇဝတ်ဇၞော်ဇၞော်တံ ညံၚ်ဂွံမံက်တိုန်ကၠုၚ် ဂကောံဇြဟတ်တံဏံ နကဵုပရေၚ်ဂီုကၠီု ကဵုလဝ်ပရေၚ်ဗၠးၜးရောၚ် ပ္ဍဲကဵုတၚ်လလောၚ်တြး ချူထ္မံက်လဝ်ဂှ် ဂွံဆဵုရ။
ပ္ဍဲကဵုပရေၚ်ကျာဖျဏံ ဇီုကပါ်မံၚ်ကဵု ဍုၚ်ဂၠးကဝ် ၇၇ ဍုၚ်နွံတုဲ ညးဍုၚ်ကွာန်ဗွဲမဂၠိုၚ် ဒးဒုၚ်ကူသာန်မၞိဟ်၊ ပရေၚ်သြန်ဆောံလေၚ် နူဍုၚ်အမေရိကာန်၊ အဂႅလိက်၊ ကြုက်တံသၟးဟွံက သီုကဵုဍုၚ်ဂၠးကဝ်ဂမၠိုၚ် လၟေၚ်ၚ်သၞာံမ္ဂး သြန်ဒဝ်လာ ၁၅ ဗဳလဳယာန် ပြၚ်နွံမံၚ်ရောၚ်။
ပရေၚ်ဏံမ္ဂး သွက်ပရေၚ်ဂီုကၠီုဍုၚ်ဂၠးကဝ်ဂမၠိုၚ်ကဵု ပရေၚ်ဒေသညိၚ်ဝပ်တံဂှ် တၚ်ဘပဠဇၞော်ဇၞော်မွဲ ဒှ်မံၚ်ရောၚ် ဗော်ဍုၚ်မန်တၟိ AD ထံက်ထ္ၜးလဝ်ရ။
မွဲလပါ်ပၠန် သၞောတ်တၠအဝဵုပၞာန်ကဵု ဂကောံရပ်လွဟ်သၟဝ်တဲဍေံတံ ကေတ်ပရဲပရၚ်သြန် နူကဵုဒၞာဲတံဏံတုဲ ဒက်ပ္တန်မံၚ်ယန္တရာပၞာန် သွက်ဂွံကလေၚ်ဗတိုက် ညးဍုၚ်ကွာန်ကောန်အရာပ်တံပၠန်ရ။
လ္တူပူဂဵုအဓိက ဖန်ဖက်ကၠောန်မံၚ် ဇာဖိုၚ်လီဠာန်သြန်တံမ္ဂး သေံကဵုကြုက်တံ ရပ်စပ်ကၠောန်မံၚ်ပိုတ်တ်သ္ကုတ်တ်ဂှ် ထိုၚ်သးတုဲ ဍုၚ်အဂႅလိက်၊ ကိုဝ်ရဳယာကဵု ဂျပါန်တံ သွက်ဂွံဗတိုက်သရိုဟ်အာ ဖျေံမံၚ်အစဳဇန် ပရေၚ်ရာဇဝတ်တတ်ကၠောံပယျဵုဍုၚ် တံဂှ်လေဝ် သ္ပလဝ်စၟတ်သမ္တီရ။
ဗွဲတၟေၚ် နူကဵုဌာနသၞောဝ်ဓရ်အမေရိကာန်၊ FBI ကဵု ဌာနထံၚ်ပရိုၚ် အမေရိကာန် (U.S. Secret Service) တံ ဒက်ပ္တန်ဏာ Scam Center Strike Force အမေရိကာန်ဂှ် ဗော်ဍုၚ်မန်တၟိ AD ဒုၚ်တၠုၚ်ဏာသ္ဂးရ။
သွက်ဂွံဗတိုက်သရိုဟ်အာ ကမၠောန်လီဠာန်သြန် တတ်ၜက်ပယျဵုဍုၚ် ကဵုမံၚ်အထံက်ပၚ်ကဵုတၠအဝဵုပၞာန်တံဏံ ပြဟ်ဟ်ဏံ နူကဵုဍုၚ်ဂၠးကဝ်တံဂိုတ်ဂစာန်မံၚ်ဂှ်တှ်ေ ဒှ်လဂါံဇိုၚ်အဓိကမွဲရောၚ် ပ္ဍဲလိက်လလောၚ်တြး ချူလဝ်ရ။
အတိုၚ်ဗော်ဍုၚ်မန်တၟိ AD လလောၚ်တြးလဝ် ပံက်လဝ်ဂကောံ ကမၠောန်ဗတိုက်သရိုဟ်သိုက်ဖာ တတ်ၜက်ဍုၚ်ကီု စပ်ကဵုပရေၚ်ပံၚ်တောဲအာကဵု မဟာမိတ်ကေုာံ ဍုၚ်ဂၠးကဝ်တံတုဲ နကဵုဌာန်ပရိုၚ်သြၚ်လောန်တိုၚ်မ် ကေတ်မံၚ်အဆက်ကီုလေဝ် ဟွံကလေၚ်နၚ် ပရိုၚ်ဏီရ။
ပရိုင်-သြၚ်လောန်တိုၚ်မ်
Photo – NMSP-AD