မတ်မလီု ၊ နိုဝမ်ပါ ၂၇
အကြာပတေၚ်ဓရတ်လဝ် ကောန်ဍုၚ်ညးအာတရဴ ကၠုၚ်စိုပ်တွဵုရးမန်တံဂှ်တှ်ေ လ္တူညးအာတရဴကောန်ဍုၚ်တံကီု ကောန်ဍုၚ်မ္ၚးတံကီု ရေၚ်တၠုၚ်ကဵုအာကဆံၚ်စိုပ်ပ်ညိဂှ် ကဝ်မယှေန်ပၞာန်တွဵုရးမန် သ္ကိုပ်ဝန်ဇၞော် ဥူအံၚ်ကျဳတိၚ် ကဵုလဝ် စၞောန်ပညုၚ်ရ။
ပ္ဍဲကဵုကောံဓရီုပ္ညဳပ္ညပ်ပရေၚ်ကမၠောန် ကမ္မတဳကမၠောန်အာတရဴဒေသမန် ကၠောန်ဗ္ဒျ်လဝ် ပ္ဍဲရုၚ်အလဵုအသဳတွဵုရးမန် ဍုၚ်မတ်မလီု နိုဝမ်ပါ ၂၅ ဏံဂှ် နူကဵုသ္ကိုပ်ဝန်ဇၞော် ကဵုဏာစၞောန်ပ္ညုၚ်ကုဌာနသၟဝ်တဲတံကဵု တၠကမၠောန်ဟဝ်တေဝ်ကဵု ကမၠောန်အာတရဴတံရ။
ညးအာတရဴနူကဵုအပ္ဍဲဍုၚ်မ္ၚးဍုၚ် ကၠုၚ်စိုပ်မှ ပိုန်ဒြပ်ဘဝမၞိဟ် တွဵုရးမန် တဴတက်ကၠုၚ်မာန်ဒှ်တုဲ သွက်ဒေသ ညံၚ်ဂွံကျေဝ်ဂေါဝ်ရာၚ်ဆာဲကေုာံ ကၟုဲဂမၠိုၚ်ညံၚ်ဇူဒီု ကဆံၚ်စိုပ်ပ်မာန်ဂှ်ရေၚ်တၠုၚ်ကဵုညိ သ္ကိုပ်ဝန်ဇၞော် ဥူအံၚ်ကျဳတိၚ် ဟီုလဝ်ရ။
သွက်ဂွံတံၚ်ဂြဲ ညးအာတရဴတံမာန်ဂးတုဲ စမြိုၚ်ဒၞာဲတြေံတြဟ်တံဂှ် သ္ကိုပ်ဝန်ဇၞော် ကဵုကလေၚ်ပလေဝ် ကီုလေဝ် ပြဟ်ဟ်ဏံ ဓရတ်လဝ်ပရေၚ်ဂီုကၠီု စၟဳစၟတ်မံၚ် ကောန်ဍုၚ်ညးအာတရဴတံဂၠိုၚ်မံၚ်ရောၚ် ညးတၠကမၠောန် ဟဝ်တေဝ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“ကမၠောန်အာတရဴ ကၟုဲဍုၚ်သ္အာၚ်ကီု ကောန်ဍုၚ်ပိုဲကီု ကၠုၚ်ဏောၚ်။ စမြိုၚ်ဒၞာဲသာသနာတံ ဒၞာဲတြေံတြဟ်တံ ထိၚ်ဒဝ်တုဲ ကလေၚ်မောမ်မာန်ကေတ် ဗ္ကန်ဏာရ။ ဟဝ်တေဝ်ပိမ တဝ်ဝေန်ဟံသာ၊ ဟံၚ်တယဝ်၊ Strand Hotel တံဂှ် ရဲရပ်တၞးကာတ် (၁၃/) ကဵုအာဇူဟီုလဝ်တုဲ ညံၚ်ဂွံပြေပြံၚ် ကၠောန်ကဵုလဝ်။ ကြပ်မံၚ်ကဵုအခိၚ်ရုဲမာဲတှ်ေ ပရေၚ်စၟဳစၟတ်တံလေဝ်ဂၠိုၚ်တိုန်မံၚ်” သာ်ဝွံ သ္ဂးရ။
တုဲပၠန် သွက်ဂွံသၠုၚ်ပတိုန်ကဏ္ဍကၟုဲအာတရဴ သ္ကိုပ်ဝန်ဇၞော် စၞောန်ပညုၚ်မံၚ်ကီုလေဝ် နတဲဏံဟီုမ္ဂး ပတေၚ်လဝ်ပရေၚ်စၟဳစၟတ်တံကီု၊ ကောန်ဍုၚ်ကၟုဲအာတရဴလ္ၚဵု ဒးဒုၚ်ပိုၚ်ခြာစၟတ်လဝ်သၟးဟွံက ပရေၚ်တေၚ်ကၟုဲလေဝ် ဒှ်တၚ်အခက်အခုဲ ဗွဲမဂၠိုၚ်ရ။
ပြဟ်ဟ်ဏံ ရဲနူဒေသဌာန်သ္ၚောဲတံ ဟိုတ်နူဒေသၜိုဟ်သြိုဟ် ကၠုၚ်ဝေၚ်တွဵုရးမန် ဟီုကီုလေဝ် ရဲသၟဝ်တဲကဝ်မယှေန်ပၞာန်တံဂှ် ဍဵုဍိုက်သ္ပပခက်ပထုဲမံၚ် ကၟုဲအာတရဴတံနွံမံၚ်တုဲ ဗီုလဵုဂွံသၠုၚ်ပတိုန် ပရေၚ်အာတရဴမာန်ရောဂှ် ရဲပလံၚ်ကၟုဲမွဲတၠ ဟီုဂးပါ်ပါဲလဝ်ရ။
“နူဒေသလဵု ညးတံကၠုၚ်ကၠုၚ်လေဝ် မိက်ဂွံဟီုအဓိပ္ပါဲဂှ်တှ်ေ နူတွဵုရးကချေၚ်ဒှ်ဒှ် နူမျေအ်ကျဳနာဒှ်ဒှ် တွဵုရးသေံဒှ်ဒှ် ကၠုၚ်ဝေၚ်တွဵုရးမန်။ ဟိုတ်နူတွဵုရးမန် ၜိုဟ်သြိုဟ်ဏောၚ်။ မၞိဟ်ကၠုၚ်ဝေၚ်တွဵုရးမန်ဇကုဂှ် ဒးဒုၚ်တၠုၚ်ဏောၚ်လေဝ်၊ တင်မွဲ။ တုဲတှ်ေ ဒးစၟဳစၟတ်။ နကဵုပရေၚ်ဂီုကၠီုဇကု ဒးစၟဳစၟတ်။ ဒးကၠောန်အာအဆံၚ်ၚ်ဏောၚ်။ ၜိုတ်မၞိဟ်ကၠုၚ်မံၚ်သီုဖအိုတ်ဂှ် ကောန်ရဲတဝ်သွာအဆံၚ်သၟဝ်တံ စၟဳစၟတ်မံၚ်ဂှ် သံၚ်ဗြောံလောန်အာ။ ညံၚ်ကဵုကေတ်ဇၞသ္ပမာန်ညးတၞဟ်သ္အာၚ်။ ဒးဆဵုမံၚ်ဗွဲမဂၠိုၚ်။ ဗီုလဵုဂွံဟီုရော။ ကမၠောန်အာတရဴ ဗီုလဵုသၠုၚ်အာရော” သာ်ဝွံ သ္ဂးရ။
မွဲလပါ်ပၠန် လ္တူညးရပ်လဝ် တၞးကာတ်ကောန်ဍုၚ် (၁၃/) တွဵုရးသေံ ကၠုၚ်ဝေၚ်ခရိုၚ်မတ်မလီုတံဂှ် စနူသိပ်တမ်ပါ ၁၇ တေံ ပိုၚ်ခြာစွံလဝ် ဒၞာဲဇူဒီုတုဲ ဒးအာဇူဒီု ဒၞာဲညးတံကဵုလဝ်ပညုၚ် ပ္ဍဲကဵုဟဝ်တေဝ် ၂ မကဵု မဝ်တေဝ် ၁ မဂှ်ရ ဒးအာဇူရောၚ် သ္ဂးလဝ်ရ။
တုဲပၠန် ကၟုဲအာတရဴတံ လုပ်ကၠုၚ်တွဵုရးမန်မ္ဂး ဒၞာဲကဵုဂိက်သၞေဟ်ကၚ်လုပ်ဍုၚ်တံ ပတေၚ်ဓရတ်စၟဳစၟတ်မံၚ်တံကီု၊ အာတ်သြန်ဂၠိုၚ်ကဵုဆနွံတုဲ ဟွံထေၚ်တှ်ေ ဗီုဟွံထေၚ် ရပ်ဏာဟဂှ်၊ ပရေၚ်တေၚ်ကၟုဲတံလေဝ် ကရေပ်ဓရတ်လဝ် အအိုတ်စောန်တုဲ သွက်ညးတရဴကၟုဲတံ ဂွံဒှ်အခက်အခုဲ မဒှ်ကီုရ။
သွက်ဂွံသၠုၚ်ပတိုန် ကဏ္ဍကၟဲအာတရဴ ပ္ဍဲကဵုတွဵုရးမန် ကဝ်မယှေန်ပၞာန် ကၠောန်မံၚ်ကောံဓရီု မွဲဏှမွဲဏှကီုလေဝ် ပ္ဍဲဒေသလ္ၚဵု ဟိုတ်နူပေါဲဗတိုက်ဒှ်မံၚ် ပရေၚ်ဂီုကၠီုဟၟဲတုဲ ပရေၚ်ကၟုဲအာတရဴဂှ် ဗီုအခိၚ်လက်ထက် အလဵုအသဳကၠာကၠာတေံ ဟွံဂၠိုၚ်တိုန်ပုဟ်ဂှ် ညးပလံၚ်ကၟုဲတံ ဟီုဂးမံၚ်အိုတ်ရ။
ပရိုင်-သြၚ်လောန်တိုၚ်မ်
Photo – MOI