မတ်မလီု ၊ နိုဝမ်ပါ ၂၈
နကဵုရာဇသာဒ်ဇၞော် ၝောံပိုဒ် ၅၀၅(က) ပ္ဍဲကဵုကဝ်မယှေန်ပၞာန် ကဵုလဝ်အခေါၚ်သၠးဗၠးဒုဟ်တံဂှ် နူကဵုတွဵုရးမန် မၞိဟ် ၁၂ တၠ ကလေၚ်ဗၠးတိတ်ကၠုၚ်နွံရဂှ် ညးကြပ်ကဵုထံၚ်တံ ဟီုကီု ဌာန်ပရိုၚ်သြၚ်လောန်တိုင်မ်ရ။
နကဵုအမှု ပွမဟဍိုက်ဟရိုက်ကၟိန်ဍုၚ် ၝောံပိုဒ် ၅၀၅(က)ဂှ် ကဝ်မယှေန်ပၞာန် ကဵုလဝ်အခေါၚ်သၠးဗၠးဒုဟ် မၞိဟ် ၃၀၀၀ ပြၚ်တံရဂှ် ပ္ဍဲနဝ်ဝမ်ပါ ၂၆ အခိၚ်သဝ်တ္ၚဲ လလောၚ်ပတိတ်လဝ်ပရိုၚ်ရ။
အပ္ဍဲဏံ နူကဵုထံၚ်ကျာ်မြဟ် ညးတြုံ ၄ တၠ၊ ညးဗြဴ ၂ တၠ၊ နူကဵုထံၚ်သဓီု ညးတြုံ ၆ တၠ အပံၚ်ဖအိုတ် ၁၂ တၠတံ ကဵုဏာအခေါၚ် သၠးဗၠးဒုဟ်ဒဏ် မဒှ်ရ။
အခေါၚ်ကဵုမာဲပေါဲရုဲမာဲ ညံၚ်ဟွံဂွံဆောံလေၚ်အာ သွက်ဂွံကဵုမာဲ ဗွဲမသၠးပွးဓရ်ယာမာန်ဂးတုဲ နကဵုၝောံပိုဒ် ၅၀၅(က) ညးဒးဒုၚ်ဖျေံလဝ်ထံၚ် ညးတြုံညးဗြဴ ၂၃၆၁ တၠတံဂှ် ယှအ်ထောံဒုဟ်ဒဏ် မသှ်ေမံၚ်တံတုဲ ကဵုဏာအခေါၚ်သၠးဗၠးဒုဟ် ကဝ်မယှေန်ပၞာန် လလောၚ်တြးလဝ်ရ။
တုဲပၠန် နကဵုၝောံပိုဒ် ၅၀၅(က) ညးစှ်ေမံၚ်ဒုဟ် ၇၂၄ တၠ နူကဵုဒၞာဲထံၚ်၊ ရုၚ်အချုက်၊ ဗ္ဒိုပ်ထံၚ်နာနာတံကီု ယဝ်ရ ထပ်လုလောန်ဒုဟ်မ္ဂး သီုကဵုဒုဟ်သှ်ေမံၚ်တံဏံ ဒုၚ်အာဒုဟ်ပၠန်ရောၚ် ဒုၚ်ဝန်တုဲ ဂွံအခေါၚ်ဗၠးတိတ်ကၠုၚ်ရ။
တုဲပၠန် နကဵုၝောံပိုဒ် ၅၀၅(က) ဒးဒုၚ်စောဲအမှုတုဲ ညးဂြိပ်ပါဲမံၚ် ၅၅၈၀ တံဂှ်လေဝ် နူကဵုကံၚ်သဳစဵုဒၞာကောန်ဂကူကေုာံ ပရေၚ်ဂီုကၠီုဂှ် ကၟာတ်ထောံအမှုယျရောၚ် လလောၚ်တြးလဝ်ရ။
အပ္ဍဲကဵုထံၚ် တွဵုရးမန်မ္ဂး နူအလုံဍုၚ်မွဲ နကဵုၝောံပိုဒ် ပရေၚ်ဍုၚ်နာနာသာ် ညးဒးမံၚ်ထံၚ် ကောန်ထံၚ်ပရေၚ်ဍုၚ်ကွာန် ညးတြုံညးဗြဴ ဟွံအောန်နူ ၃၀၀ နွံမံၚ်ရောၚ် ညးကြပ်ကဵုထံၚ်မွဲတၠ ဟီုလဝ်တုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – MOI