ရေဝ်၊ နိုဝမ်ပါ ၂၈
တွဵုရးဍုၚ်မန် ပွိုၚ်ဍုၚ်ရေဝ် ကွာန်အစေၚ် ပ္ဍဲကဵုလ္တူဂၠံၚ်ကွာန်အစေန်-ပါၚ်ၜဳဂှ် ရဲဂကောံဒပ်မၚ်ကွာန် သၟဝ်တဲဒပ်ပၞာန်မွဲတၠ ဒးဒုၚ်ပန်ဂစိုတ်တုဲ ချိုတ်အာရဂှ် ကောန်ကွာန်တံ ဟီုကီု ဌာန်ပရိုၚ်သြၚ်လောန်တိုင်မ်ရ။
ပ္ဍဲနဝ်ဝမ်ပါ ၂၆ ၜိုတ်အခိၚ်ဗ္တံ ၇ နာဍဳဂှ် ရဲဂကောံဒပ်မၚ်ကွာန် ဥူမိုင်ဖေဝ် (အယုက် ၅၀ သၞာံ) ဍိုက်ကၠုၚ်ကွဳလိုန်ဓါတ် တိတ်အာ နူကွာန်အစေန် အဃောအာမံၚ်လပါ်ကွာန်ပါၚ်ၜဳဂှ် ရဲရပ်လွဟ်တံ ဍံၚ်ဗက်လက်ကရဴတုဲ ပန်ဂစိုတ်လဝ် မဒှ်ရ။
ဂကောံဒပ်မၚ်ကွာန် ဥူမိုင်ဖေဝ် ဒးဒုၚ်ပန်လွဟ် ပ္ဍဲကဵုက္ဍိုပ်ကဵုသြိုဟ် မကမ်ဖံက်လုပ်အာ ၇ ဒၞာဲတုဲ မွဲအခိၚ်ဓဝ် ချိုတ်အာ ပ္ဍဲဒၞာဲဂှ်ရ။
ရဲဂကောံဒပ်မၚ်ကွာန်အစေန်တံ ကၠုၚ်စၟဳစၟတ်လဝ် ဗီုပြၚ်ဒၞာဲပန်ဂစိုတ်ဂှ်တုဲ ဇွသှ်ေဂလုဲမံၚ်ဂှ် ပလံၚ်ဗစိုပ်ရုၚ်ဂဥုဲဍုၚ်ရေဝ်တုဲ ဒပ်မၚ်ကွာန်တံဂှ် ဗက်ဂၠာဲစၟဳစၟတ်မံၚ်အပ္ဍဲကဵုကွာန်ရဂှ် ဂွံတီနူညးဒေသတံရ။
ဂကောံဒပ်မၚ်ကွာန် ဥူမိုင်ဖေဝ်ဝွံ အတိုၚ်ဒပ်ပၞာန်ဗမာစကာဂှ် ပွမဗက်တံၚ်ကဵုပဝ်တာကီု၊ ဆက်ဆောံ လ္တူညးဍုၚ်ကွာန်တံရိုၚ်စိုၚ်၊ ဗက်ကၠတ်မံၚ်ကွဳလိုန်ဓါတ်အပ္ဍဲကွာန်၊ အတိုၚ်ပၟိက်စိုတ်ဒပ်ပၞာန် ဟိုတ်နူ ဗက်ကၠောန်ကဵုမံၚ်ဂှ်ရ ပန်ဂစိုတ်ပသောၚ်ထောံလဝ်ဏောၚ် တမ်ဒပ်ဒမၠုက်ရေဝ် YGF လလောၚ်တြးလဝ်ရ။
နူကဵုဂကောံဒပ်မၚ်ကွာန် ဥူမိုင်ဖေဝ်ဂှ် ပၞော်ပှော် မွဲတၞုၚ်၊ အကံက်တဲ မွဲပွံက်၊ ပသဲကဝဲစ မွဲတၞုၚ်(ဝက်အူလှည့်)၊ ၜံက်သၠကသိုဏ်ကဵု ဂဥုဲသုၚ်ညိညသီဂွံလဝ်နွံ ပ္ဍဲလိက်လလောၚ်တြးဂှ် ချူလဝ်ရ။
လောန်ကၠုၚ်အံက်တဝ်ပါ ၃၀ တေံလေဝ် ဥက္ကဌတြေံ ကွာန်အနေၚ် အခိၚ်စဴကၠုၚ်နူကၠအ်ရာဘာ ပ္ဍဲအကြာကွာန်အနေၚ်ကဵုနှေဟ်ခြၚ်ဂှ် ဒးဒုၚ်ပန်ဂစိုတ်တုဲ ချိုတ်လဝ်ကီု ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media