ဗြဝတဳ၊ နိုဝမ်ပါ ၂၈
ဟိုတ်နူပေါဲဗတိုက် မေန်လက်ပါန် ပွိုၚ်ဍုၚ်ဗြဝတဳ နူကဵုဒၞာဲကမၠောန် ကျာဖျတံတုဲ သၟာကမၠောန်ကျာဖျ ကြပ် ၇၀၀ တၠ ခက်ကၠၚ်မံၚ် ပ္ဍဲကဵုဇိုၚ်ၜဳသံၚ်ရေၚ် ပယျဵုဍုၚ်သေံရဂှ် ရိုဟ်ကၞက်ပရိုၚ်ဒေသတံ ဟီုကီု ဌာန်ပရိုၚ်သြၚ်လောန်တိုင်မ်ရ။
နူကဵု အေန်ကျေန်မျာၚ် မေဝ်ဝါခဳ ကရောၚ်ပၞာန်ဒပ်ပၞာန်ဗမာ ပ္ဍဲကဵုနိုဝမ်ပါ ၂၁ ထပက်ကၠုၚ်လပါ် ကွာန်မေန်လက်ပါန်ဂှ် ဒှ်လဝ်ပေါဲဗတိုက်ကဵုဂကောံဇြဟတ်ပၠန်ဂတး KNLA မဟာဒပ် ၆ ဗွဲမသ္ကာတ်မြဟ်ရ။
တုဲပၠန် ပ္ဍဲနဝ်ဝမ်ပါ ၂၁ ဂှ်လေဝ် ပ္ဍဲကဵုဒၞာဲကမၠောန်ကျာဖျ DKBA ကွာန်မေန်လက်ပါန်ဂှ် ဒပ် KNU လုပ်ဗတိုက်တုဲ ရပ်ဂွံလဝ်ကောန်ကျာဖျ လၟိဟ်ကဵုလ္ၚီ၊ ရပ်ဂွံကောန်ဒပ် DKBA တံ သီုသီဂွံဏာလွဟ်ရဂှ် KNU လလောၚ်ပတိတ်လဝ်ပရိုၚ်ရ။
ဟိုတ်နူ KNU လုပ်ဗတိုက်သီလဝ် ကမၠောန်ကျာဖျ ကွာန်မေန်လက်ပါန် သၟဝ်တဲ DKBA ဂှ်ရ ကောန်ကျာဖျတံ ဂြိပ်တိတ်အာ ပ္ဍဲနိုဝမ်ပါ ၂၆ ဂှ် စိုပ်ကၠုၚ်ပယျဵုၜဳသံၚ်ရေၚ်ကီုလေဝ် နူကဵုလပါ်သေံ ဟွံဒုၚ်လုပ်တုဲ ဒဵုကဵုနိုဝမ်ပါ ၂၇ ဂှ် ခက်ကၠၚ်မံၚ်ပ္ဍဲဇိုၚ်ၜဳရဂှ် တမ်ရိုဟ်ပရိုၚ်ဒေသတံ သ္ဂးရ။
ဒၞာဲကမၠောန်ကျာဖျ ကွာန်မေန်လက်ပါန်ဂှ် KNU သီလဝ်တုဲ ၜၚ်ကျာပၞာန်ဗမာ ကၠုၚ်ကြဳဖျေံဗုမ် သီုကဵုပန်လဝ်ကဵုလွဟ်ဇၞော် ပ္ဍဲကဵုကွာန်မေန်လက်ပါန်ကဵု ကွာန်ထီုဣသိ လပါ်ပလိုတ် ပ္ဍဲနဝ်ဝမ်ပါ ၂၆ ရဂှ် တမ်ရိုဟ်ကၞက်ပရိုၚ်ဒေသတံ သ္ဂးရ။
ပ္ဍဲကဵုနဝ်ဝမ်ပါ ၂၇ အခိၚ်နူဂယး ဒပ်ကဝ်မယှေန်ပၞာန် ဂစာန်ထပက်ကၠုၚ်ကရောၚ်ပၞာန် ပ္ဍဲကဵုကွာန်မေန်လက်ပါန်ပၠန်ဂှ် ဆက်ဒှ်လဝ်ပေါဲဗတိုက်ကဵု ဂကောံဇြဟတ်ပၠန်ဂတးတံရဂှ် ဂွံတီရ။
ဒပ်ပၞာန်ဗမာ ညံၚ်ဂွံကလေၚ်သီကေတ် ဗ္ဒိုပ်သ္ကုတ်ဂၠံၚ် ဗြဝတဳ-ဝဝ်လေဝ် သီုဖအိုတ်မာန်ကီု သွက်ဂွံကလေၚ်ထိၚ်ချုက် တိဍာ်မာန်ပၠန်ဂှ် စနူဂိတု အံက်တဝ်ပါ နူကဵုလေဝ်ကေကဝ် မွဲကဆံၚ် ၃ ကရောၚ်ပၞာန်ဟွံက ထပက်ကၠုၚ်မံၚ်ရ။
သတင်း – ပရိုၚ်-သြၚ်လောန်တိုၚ်မ်
Photo – Social Media