မတ်မလီု၊ နိုဝမ်ပါ ၂၈
အတိုၚ်ချူခၞံလဝ်ဥပဒေ စပ်ကဵုပရေၚ်ဒစဵုဒစး ပေါဲရုဲမာဲအလီဂှ် လ္တူညးပါလုပ်မံၚ် ပ္ဍဲကဵုပေါဲရုဲမာဲကဝ်မယှေန်ပၞာန် ကၠောန်အာဏံဂှ် စကေတ်အရေဝ်မာန်ယျ ကံၚ်သဳဖက်ဒရေဝ်ဍုၚ်မန် MSFC ဟီုကီု ဌာန်ပရိုၚ်သြၚ်လောန်တိုင်မ်ရ။
ပ္ဍဲကဵုနဝ်ဝမ်ပါ ၂၂ ဂှ် ကံၚ်သဳဖက်ဒရေဝ်ဍုၚ်မန် MSFC သ္ပဒတန်ဥပဒေ ပရေၚ်ဒစဵုဒစးပေါဲရုဲမာဲအလီတုဲ သွက်ညးဂမၠိုၚ်ဂွံတီအာ ပ္ဍဲနဝ်ဝမ်ပါ ၂၅ ဂှ် လလောၚ်ပတိတ်လဝ်ရ။
နကဵုသၞောဝ်ဏံမ္ဂး ယြဴပူဂဵုလဵုဟွံဟီု ပေါဲရုဲမာဲအလီကဝ်မယှေန်ပၞာန် ကၠောန်အာဏံမ္ဂး အပ္ဍဲတွဵုရးမန်ဒှ်ဒှ် သ္ပစၞးကောန်ဂကူမန်တုဲ လုပ်ဒုၚ်ရုဲအလံၚ်အမာတ်ဒှ်ဒှ်၊ အတိုၚ်စရၚ်ဒှ်ဒှ်၊ ဒက်ပ္တန်ဗော် ပရေၚ်ဍုၚ်ကွာန်၊ ပတိုန်စၟတ်သမ္တီ ဗော်ပရေၚ်ဍုၚ်ကွာန်ဟွံဂွံပုဟ်ဂှ် ချူထ္မံက်လဝ်ရ။
တုဲပၠန် ပ္ဍဲကဵုဗော်ပရေၚ်ဍုၚ်ကွာန်လုပ်ပြိုၚ် ပေါဲရုဲမာဲအလီဏံ နဒဒှ်ကောန်ဗော်လုပ်အာကီု၊ မွဲနဲမွဲဗီု တံၚ်ဂြဲစန်ဒက်ကဵုမာဲ၊ ကေတ်ၚုဟ်မးသြန်ဒှ်ဒှ် ဟွံကေတ်ဒှ်ဒှ် ကဵုဇြဟတ်ကေုာံ ထံက်ပၚ်တံဂှ် ယြဴပူဂဵုလဵုမွဲ ဟွံဂွံကၠောန်ပုဟ် ပ္ဍဲဥပဒေ ချူခၞံလဝ်ရ။
မွဲလပါ်ပၠန် ယြဴပူဂဵုလဵုဟွံဟီု ညးဍုၚ်ကွာန်ဂမၠိုၚ်၊ ညးဍုၚ်ကွာန်မွဲမွဲ ညံၚ်ဂွံကၠုၚ်ကဵုမာဲ နကဵုလိက်ဒှ်ဒှ်၊ နကဵုပါၚ်ဒှ်ဒှ် ကဵုအမိၚ်၊ စန်ဒက်၊ ဆဝ်ဗ္ၚုဟ်၊ ကရေပ်ဓရတ်ဘပဠတံ ညံၚ်ဟွံဂွံကၠောန်တာဒၞာလဝ်မဒှ်ရ။
ယဝ်ရဖံက်ပကဝ် ပရေၚ်ဒၞာတာလဝ်တံမ္ဂး အောန်အိုတ်ဒဏ်ထံၚ်မွဲသၞာံ ဒဵုကဵု ၅ သၞာံဒှ်ဒှ် ဖျေံဒဏ်သြန်ဒှ်ဒှ် ကဵုထပက်စၟတ်တဲ ဒုၚ်ဝန်ဒှ်ဒှ်ကေုာံ သီုကဵုဒဏ်ပရေၚ်မၞိဟ်မွဲနဲမွဲဗီု ဖျေံဒုဟ်ဒဏ် သီုၜါသာ်မာန်ရောၚ် ချူလဝ်ရ။
ညးဍုၚ်ကွာန်တံ ညံၚ်ဂွံတီအာဥပဒေဏံ ညံၚ်ဂွံပံၚ်တောဲပါလုပ်ကၠုၚ် ကၠောန်အာပရေၚ်ကဵုပညာရောၚ် မဒှ်တုဲ ဒဵုကဵုသၞောတ်ထ္ၜတ်မွဲမွဲ တာဒၞာအာပေါဲရုဲမာဲမာန်ရောၚ် ဥက္ကဌ ကမ္မတဳဒစဵုဒစး ပရေၚ်ပေါဲရုဲမာဲအလီ ဟွံလုပ်သၞောဝ် မိသုတဇဝ် ဟီုရ။
“ဥပဒေ ပိုဲတံခၞံလဝ်ဏံ ညးဍုၚ်ကွာန်တံ ညံၚ်ဂွံပါလုပ်မာန် သွက်ဂွံကဵုအာပညာ ပတိတ်အာလိက်ကၞပ်၊ လိက်လၟေၚ်တံ၊ ပရေၚ်ကဵုပညာညးဍုၚ်ကွာန်၊ ပွမညးဍုၚ်ကွာန်တံဂွံပံၚ်တောဲတံ ပါမံၚ်ရ။ ဟိုတ်ဂှ် ပရေၚ်တာဒၞာကေတ်အရေဝ်ကဵုအာဒုဟ်ဒဏ်တံကီု ညးဍုၚ်ကွာန်တံ ပါလုပ်ပံၚ်တောဲအာမ္ဂး ဂကောံမွဲမွဲ မှာရာမံၚ်ဟီုကီုလေဝ် ဒဵုကဵုသၞောတ်ဗ္ၜတ်မွဲမွဲ ပိုဲတာဒၞာအာမာန်ရောၚ် စၟဳစလဝ်ရ” သာ်ဝွံ သ္ဂးရ။
ပ္ဍဲကဵုအခေါၚ်အရာပရေၚ်ကမၠောန် ကမ္မတဳဒစဵုဒစးပရေၚ်ပေါဲရုဲမာဲအလီ ဟွံလုပ်သၞောဝ်မ္ဂး သွက်ညးဖံက်ပကဝ်သၞောဝ်တံဂှ် နူကဵုကဝ်မတဳပတိုန်ဒုဟ်အခေါၚ်စောဲအမှုနွံရ။
တုဲပၠန် သွက်ဂွံကေတ်အရေဝ်မာန် ပံၚ်တောဲအာကဵု ဌာနသၟဝ်တဲ ဖိတ်ဒရေဝ်ကံၚ်သဳတံတုဲ အတိုၚ်ကံၚ်သဳကဵုအခေါၚ်ဂှ် သွက်ဂွံပံၚ်ဗစပ် အာကဵု ဂကောံဇြဟတ်ပၠန်ဂတး တၞဟ်ဟ်တံ မဒှ်ရ။
ဥပဒေဏံ ညံၚ်ဂွံဇာပ်အာ ဒဵုကဵုဗလးတိမာန် ဒၞာဲညးပါလုပ် ဂကောံကံၚ်သဳတံယိုက်ဂၠေၚ်မံၚ်တာလျိုၚ် ပ္ဍဲတိဍာ်(တွဵုရးမန်) ကၠောန်အာမဒှ်တုဲ ဒဵုကဵုအဝဵု သွက်ဂွံတန်ကြန်အာ ပ္ဍဲဒေသမဟာမိတ်တံကီု ဆက်သဳကၠဳအာဏောၚ် မိသုတဇဝ် သောၚ်ကလးလဝ်ရ။
သွက်ဂွံဆက်သ္ပအာဍိက်ကု ကၟိန်ဍုၚ်သၞာံဗွဲမလံလ ကေတ်လဝ်လိုၚ်သေန်ဂစိုတ်မၞိဟ်၊ သွက်အယုက်သၞောတ်တၠအဝဵုပၞာန်ဂွံတန်ကြန် ရန်တၟံကၠောန်ပေါဲရုဲမာဲဟွံလုပ်သၞောဝ် သီုကဵုပိကာလ ညံၚ်ဂွံဒစဵုဒစးအာ MSFC ရန်တၟံချူခၞံလဝ် ဥပဒေဏံ မဒှ်ရ။
တုဲပၠန် ဒှ်ပေါဲရုဲမာဲအလီ ဟွံလုပ်သၞောဝ်ပုဟ် သွက်ညးဍုၚ်ကွာန်တံဂွံတီ ကဵုအာပညာကီု ညံၚ်ဂွံကေတ်အာအရေဝ် ကုညးသ္ကိုပ်သ္က ကၠောန်ပေါဲရုဲမာဲဏံကဵု ညးပါလုပ်တံ ညးကဵုဇြဟတ်တံမာန် ပ္ဍဲဥပဒေဏံ ချူလဝ်ရ။
နူလပါ်ကဝ်မယှေန်ပၞာန်ပၠန်ဂှ်လေဝ် လ္တူရဲဒစဵုဒစး စန်ဒက်ဆဝ်ဗ္ၚုဟ် ပလီုပလာ်မံၚ်ပေါဲရုဲမာဲတံဂှ် နကဵုဥပဒေစဵုဒၞာပေါဲရုဲမာဲ ကေတ်မံၚ်အရေဝ်ဖိုအ်ရ။
စပ်ကဵုပေါဲရုဲမာဲဂှ် အောန်န်ဂၠိုၚ်ၚ် ဒးပါလုပ်ဆက်မံၚ်တုဲ ခၞံချူဏာသၞောဝ်ဥပဒေဗီုဏံဂှ်တှ်ေ လျိုၚ်ထပ်ဍိုက်ကၠုၚ်မွဲပၠန်ရဂှ် ညးဒေသမုဟ်ဍုၚ်မွဲတၠ ဟီုကီုဌာန်ပရိုၚ်သြၚ်လောန်တိုင်မ်ရ။
“လျိုၚ်ထပ်ဍိုက်ကၠုၚ်မွဲပၠန်ရဏောၚ်။ မွဲလပါ်ဂှ် ညးဍုၚ်ကွာန် တိတ်အာနူဍုၚ်ဟွံမာန် ဗါန်ခက်မံၚ်ဒၞာဲဏံ ဒုက္ခသုခဂမၠိုၚ် ဒုၚ်ဒဝ်အာတုဲ အောန်အောန်ဂၠိုၚ်ၚ် စပ်ကဵုပေါဲရုဲမာဲဂှ် ဒးဆက်စပ်ဟေၚ်။ ဟွံဆက်စပ်တှ်ေ မွဲလပါ်တေံ (ဇြဟတ်ဟရိုဟ်စကမ) ဒးဂွိၚ်ပၠန်။ ဆက်စပ်ပၠန်ဟီုတှ်ေ ဗီုဥပဒေမွဲလပါ် (MSFC) ပတိတ်လဝ်ပၠန်ဟီုတှ်ေ အဓိကမုမိက်ဂွံဒှ်ရော။ မုညးဍုၚ်ကွာန်တံ ဒးကၠောန်ကဵုရော။ လပါ်တေံလေဝ် ပတိတ်အမိၚ်၊ လပါ်ဏံလေဝ်ပတိတ်အမိၚ် သီုညးၜါလပါ် ကၠောန်မံၚ် သွက်ညးဍုၚ်ကွာန်ဟီုတှ်ေ ကၠောန်မံၚ်သွက်ညးဂှ်ရော ညးဍုၚ်ကွာန်တံ ဒးကလေၚ်သၟာန်ပၠန် စိုပ်မံၚ်အကာဲအရာဏံ” သ္ဂးရ။
သွက်ဂွံဒစဵုဒစး တာဒၞာပေါဲရုဲမာဲအလီ ဟွံလုပ်သၞောဝ်၊ ပရေၚ်ညးဍုၚ်ကွာန်တံပါလုပ်ကေုာံ ပရေၚ်ကံၚ်သဳဏံ ဂစာန်မံၚ်ဂှ်တှ်ေ ထံက်ထ္ၜးကဵုမံၚ် ပရေၚ်ယောၚ်ယာသၞောဝ်ဓရ် မဒှ်တုဲ ကၠောန်မံၚ်သွက်အခေါၚ်အရာမၞိဟ်ရောၚ် မိသုတဇဝ် ဟီုစၟတ်လဝ်ရ။
သွက်ဂွံကေတ်အရေဝ် နကဵုဂၠံၚ်ဍာန် နဲကဲစဳရေၚ်သၞောဝ်ဓရ်မ္ဂး သွက်ဂွံစဳရေၚ်ဒုဟ်ဒဏ်မာန် နကဵုရုၚ်သၞောဝ်ဓရ် အမှုသၠောဲပအပ် လဝ်ကဵု နကဵုၝောံပိုဒ် ၂၃ ဂှ် ဒးစဳရေၚ်အမှုတံရောၚ်။
တုဲပၠန်ပရေၚ် ခၠေဝ်သှ်အမှုပၠန်ဂှ်လေဝ် ကလေၚ်ကၠောန်မာန်တုဲ သွက်ပရေၚ်တံဏံ အတိုၚ်ကမ္မတဳသၞောဝ်ဓရ် ကံၚ်သဳဖိတ်ဒရေဝ်ဍုၚ်မာန်ဟေၚ် ဒှ်ဒတန်ရောၚ် ပ္ဍဲဥပဒေချူလဝ်ဂွံဆဵုရ။
ပ္ဍဲကဵုတွဵုရးမန် ကဝ်မယှေန်ပၞာန်ကၠောန်အာပေါဲရုဲမာဲဏံ သွက်ဂွံလုပ်ပြိုၚ်အာဂှ် ပေါဲစန်ဒက်အလုံဍုၚ်ကီု ဗော်ကောန်ဍုၚ်အရၚ်တံကီု ဗော်ပရေၚ်ဍုၚ်ကွာန် ဟွံအောန် ၈ ဗော် တံလုပ်ပြိုၚ်အာရောၚ်။
ပ္ဍဲဏံ ဗော်ညဳသၟဟ်မန်၊ ဗော်ပျဳခိုၚ်ဖျိုဝ်၊ ဗော်ညးဍုၚ်ကွာန်ဥူကိုကိုဂျဳ၊ ဗော် “ပြည်သူ့ရှေ့ဆောင်ပါတီ” ဒဝ်တိတ်တ်ခိုၚ်၊ ဗော်ကၠဗုကဵု ဗော်တစညတံပါလုပ်မံၚ်ရ။
ပရိုၚ်-သြၚ်လောန်တိုၚ်မ်
Photo – MUP