ဗြဝတဳ၊ နိုဝမ်ပါ ၂၉
တွဵုရးကရေၚ် ပွိုၚ်ဍုၚ်ဗြဝတဳ ပ္ဍဲကဵုကွာန်မေန်လက်ပါန် KNU ရပ်လဝ် ကောန်ဒပ် ဒပ်ပၞာန်ကရေၚ်ပတုဲဖဵုဒဳမဝ်ကရေသဳ DKBA တံ ကလေၚ်ဗၠးကၠုၚ် ပ္ဍဲနိုဝမ်ပါ ၂၇ ရဂှ် တမ်ရိုဟ်ပရိုၚ် DKBA တံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကောန်ဒပ် DKBA ဒးဒုၚ်ရပ်လဝ်ကဵု KNU တံ ပ္ဍဲနိုဝမ်ပါ ၂၇ အခိၚ်ဒေါဝ်တ္ၚဲဂှ် နူကဵုကွာန်မေန်လက်ပါန်၊ ကွာန်ဖလူတံမွဲအဆံၚ် ကလေၚ်စိုပ်ကၠုၚ် ဒၞာဲဌာန်ဂအုပ်ဗဟဵု DKBA သုၚ်သဳမျာၚ်ကီုလေဝ် လၟိဟ်ကောန်ဒပ်ဗၠးကၠုၚ်တံကဵု လွဟ်ပါဟွံပါဂှ် ဟွံဂွံတီလဝ် ချိုတ်တ်ပၠိုတ်တ်ဏီပုဟ် ဂွံတီနူကဵု တမ်ရိုဟ်ပရိုၚ် DKBA တံရ။
လၟိဟ်ကောန်ဒပ်ကလေၚ်စိုပ်ကၠုၚ် ဌာန်ဂအုပ်ဗဟဵု DKBA သုၚ်သဳမျာၚ်တံ နွံကဵုကၠမ်ကီုလေဝ် ရပ်လဝ်လွဟ်ဂှ် ဟွံဆဵုလဝ်ပုဟ်ဂှ်လေဝ် ရိုဟ်ကၞက်ပရိုၚ်ဒေသတံ သ္ဂးရ။
ဒပ် DKBA နွံမံၚ်ပ္ဍဲကဵုကမၠောန်ကျာဖျ မေန်လက်ပါန်တံ ပ္ဍဲနိုဝမ်ပါ ၂၁ စပန်ဏာ ဂကောံဇြဟတ်ပၠန်ဂတး KNLA သ္ကိုပ်သ္ကလဝ်ဂှ် အကြာၜါလပါ် ဒှ်ပန်ညးသ္ကံမွဲခဏတုဲ ဒပ် KNLA လုပ်ထိၚ်ချုက်ထောံ ဒၞာဲကမၠောန်ကျာဖျ DKBA ကေတ်လဝ် ပရေၚ်ဂီုကၠီုဂှ်ရ။
အပ္ဍဲလုပ်ထိၚ်ချုက် ဒၞာဲကမၠောန်ကျာဖျဂှ် ရပ်ဂွံကောန်ဒပ် DKBA အောန်အိုတ် ၂၃၀ တၠ သီုကဵုလွဟ်ဗွဲမဂၠိုၚ်၊ သီုကဵုလုပ်သီကေတ် ထိၚ်ချုက်လဝ် ဗ္ဒိုပ် DKBA ကီု၊ နူကဵုဗွိုၚ်အပ္ဍဲကဵုဗ္ဒိုပ်ဏံ KNU ရပ်ဂွံ ကောန်ကျာဖျလၟိဟ်ကဵုလ္ၚီတုဲ ထမံက်ဂၠိုက်ဂၠာဲဂွံ သီုကဵုကပေါတ်ဆက်စပ် ဗွဲမဂၠိုၚ်တံရ။
ပရေၚ် KNU လုပ်သီထိၚ်ချုက်လဝ်ဂွံလဝ် ဒၞာဲကမၠောန်ကျာဖျ မေန်လက်ပါန် တုဲဒှ်အာပွိုၚ် ၅ တ္ၚဲဂှ် DKBA ပတိတ်အမိၚ် ပ္ဍဲကဵုပွိုၚ်ဍုၚ်ဗြဝတဳ ဂၠံၚ်ကွဳစက်ဆက်လဝ်ကဵု ဖလူဍောတ်၊ ဍုၚ်ဝဝ်လေဝ်ကဵု သုကလိတံဂှ် ဂကောံရပ်လွဟ်တံ ညံၚ်ဟွံဂွံအာကၠုၚ်၊ ယဝ်ရ ပရေၚ်ကာမံက်တိုန် ဒးအာကၠုၚ်မ္ဂး ကေတ်အဆက်ကဵု ညးတာလျိုၚ် DKBA တံညိဂှ် ပတိတ်လဝ်ပရိုၚ်ရ။
တုဲပၠန် ပ္ဍဲကဵုတိဍာ်ဒၞာဲ DKBA ထိၚ်ချုက်လဝ်တံ ယဝ်ရဖ္ဍိုက်နၚ် ကောန်ဍုၚ်မ္ၚး ဗွဲတၟေၚ် ကောန်ဍုၚ်ကြုက်တံမ္ဂး ရပ်စပ် ကေတ်အာအရေဝ်ဏောၚ် DKBA လလောၚ်တြးလဝ်ရ။
စပ်ကဵုပါလုပ်ဆက်စပ်မံၚ်ကဵု ကမၠောန်ကျာဖျ ပရေၚ်ဝေၚ်ဇျှၚ် လံၚ်သြန် လီဠာန်သြန်တံတုဲ DKBA သီုအလုံမွဲဂကောံကဵု က္ဍိုပ်သ္ကိုပ် ၄ တၠတံဂှ် နူကဵုအမေရိကာန် ကေတ်လဝ်အရေဝ် နကဵုပရေၚ်မာတ်ဆိုအ်ရ။
ပရိုၚ်-သြၚ်လောန်တိုၚ်မ်
Photo – Social Media