တယိတ်ချံၚ်၊ နိုဝမ်ပါ ၂၉
ရးတနၚ်သဳ ပ္ဍဲကဵုပွိုၚ်ဍုၚ်တယိတ်ချံၚ် ဟိုတ်နူကရောၚ်ပၞာန် ဒပ်ပၞာန်ဗမာ ထပက်လုပ်ကၠုၚ်စံၚ်ပၟတ်တုဲ သ္ၚိဌာန်ဟွံအောန်နူကဵု ၁၂၀ မ ပၟတ်တူဆောံလေၚ်အာအိုတ်ရဂှ် ညးဒေသကဵု ဂကောံဒပ်ပၠန်ဂတးတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
စနူကဵုဂိတုအံက်တဝ်ပါ သတ္တဟလက်ကရဴအိုတ်ဂှ်တုဲ ဒၞာဲဂကောံဒပ်ပၠန်ဂတးတံ ချဳဒရၚ်ဇြဟတ်ခိုဟ် ပ္ဍဲကဵုပွိုၚ်ဍုၚ်တယိတ်ချံၚ်ဂှ် ကရောၚ်ပၞာန် ဒပ်ကဝ်မယှေန်ပၞာန် ဂေတ်မွဲကွာန်တုဲမွဲကွာန် ထပက်ကၠုၚ်မံၚ်ကရောၚ်ပၞာန် မဒှ်ရ။
ဒဵုကဵုနိုဝမ်ပါ ၂၆ ကရောၚ်ပၞာန်ထပက်ကၠုၚ်မံၚ်တုဲ
လဗ၊ ကတောဲ၊ တိၚ်ကုၚ်၊ ဗုက်တံၚ်၊ ချံက်ချံၚ်၊ မေန်တာတ်ကဵု ပျေန်ဖျူကျဳ ကွာန်နွံမံၚ်ပွိုၚ်ဍုၚ်တယိတ်ချံၚ်တံ သ္ၚိဟွံအောန်နူကဵု ၁၂၀ ဒးဒုၚ်စံၚ်လဝ်ရ။
ပ္ဍဲနဝ်ဝမ်ပါ ၂၇ ကရောၚ်ပၞာန် ဒပ်ကဝ်မယှေန်ပၞာန် စံၚ်ကွာန်ပျေန်ဖျူကျဳတုဲ ကလေၚ်တိတ်ကၠုၚ်ဂှ် ဒပ်ပံၚ်ကောံ ဂကောံပၠန်ဂတးတံ မင်ကြတ်ပန်လဝ် ပ္ဍဲမ္ၚးကွာန်ဂှ်ရ။
ပ္ဍဲပေါဲဗတိုက်ဏံ ဒပ်ကဝ်မယှေန်ပၞာန် ဒးဘဲဂိအာဂှ်ရ ဆုတ်ကလေၚ်အာ လပါ်ကွာန်ပိတိုၚ်ကီုလေဝ် အကြာၜါလပါ် အကာဲအရာပရေၚ်ပၞာန် ကြံၚ်မ္ၚိုဟ်မံၚ်ဖိုအ်ရောၚ် ညးတာလျိုၚ် ဒပ်ပၠန်ဂတးမွဲတၠ ဟီုရ။
ပ္ဍဲကဵုပွိုၚ်ဍုၚ်တယိတ်ချံၚ် ဟိုတ်နူကရောၚ်ပၞာန် ဒပ်ပၞာန်ဗမာ ထပက်မံၚ်တုဲ ညးဒေသကောန်အရာပ် ဟွံအောန်နူကဵု ၄၀,၀၀၀ တံ ဒးဂြိပ်ပါဲဒဴမံၚ် နူကဵုသ္ၚိဌာန်ကွာန်ညးတံတုဲ နွံမံၚ်ပၟိက်ကဵု ပရေၚ်အရီုဗၚ်ဗ္စာရဏာဂမၠိုၚ်ရောၚ် ဂွံတီကေတ် နူညးကဵုမံၚ်အရီုဗၚ်တံရ။
အတိုၚ်လိက်ဒုၚ်စဳရေၚ် ဂကောံသုတေသန FE5 Thanintharyi မ္ဂး ကြပ်ကၠုၚ်မံၚ်ကဵု ပေါဲရုဲမာဲဟဍၚ် ပ္ဍဲကဵုရးတနၚ်သဳမ္ဂး ဟိုတ်နူထပက်ကရောၚ်ပၞာန်ကီု ၜၚ်ကျာကြဳဗုမ်ကီုဂှ်ရ ညးဒးဂြိပ်ပါဲဒဴမံၚ် နူကဵုသ္ၚိဌာန်ကွာန် ဒဵုကဵု ၉၃၀၀၀ ဂၠိုၚ်တိုန်ကၠုၚ်ရ။
ပရိုၚ်-သြၚ်လောန်တိုၚ်မ်
Photo – KNU