မတ်မလီု ၊ နိုဝမ်ပါ ၂၉
ပ္ဍဲတွဵုရးမန် ညးဍုၚ်ကွာန်တံညံၚ်ဂွံအာကဵုမာဲ ပ္ဍဲကဵုပေါဲရုဲမာဲ ကဝ်မယှေန်ပၞာန်ကၠောန်အာဏံဂှ် ကဝ်မယှေန်ပၞာန်တံ တိုန်မွဲသ္ၚိ စှ်ေမွဲသ္ၚိ ဗက်ကဵုမံၚ်ဇြဟတ်ဟရိုဟ်ဏောၚ် ညးဒေသတံ ဟီုကဵုဌာန်ပရိုၚ်သြန်လောန်တိုၚ်မ်ရ။
သွက်ပေါဲရုဲမာဲ ကဝ်မယှေန်ပၞာန်ဗာန်စွံလဝ် စရၚ်မာဲအလန်ဒုတိယ ပ္ဍဲအကြာနိုဝမ်ပါ ၂၁ ဒဵုကဵုဒဳဇြမ်ပါ ၄ တေံကီုလေဝ် မၞိဟ်ကၠုၚ်ရံၚ်ဗဵု စဵုကဵုကြပ်ဟၟဲ အောန်မံၚ်ကွေံကွေံရ။
ဟိုတ်ဂှ်ရ ပ္ဍဲတ္ၚဲအကြာဏံ ဌာနစုၚ်ပံၚ်ကောံတံ ကော်ကောံဓရီုကာမံက်တိုန် သွက်ဂွံတေက်ဗဵုစရၚ်မာဲဂးတုဲ တိုန်မွဲသ္ၚိစှ်ေမွဲသ္ၚိ အကြာအရာပ်/ကွာန်ဆေၚ်စပ်တံတုဲ ညံၚ်ဂွံကၠုၚ်စုတ်မာဲ ကဵုမံၚ်ဇြဟတ်ဟရိုဟ်အိုတ်ရ။
“မၞိဟ်ကၠုၚ်ကျောဝ်စရၚ်မာဲဟၟဲပုဟ်၊ လၟုဟ်ဂကောံဌာနစုၚ်တံ ကၠုၚ်စိုပ်သ္ၚိတုဲ တေက်ဗဵုစရၚ်မာဲရ။ စရၚ်မာဲဇကု နွံဟၟဲတေက်ကဵုဏောၚ်။ ပါမံၚ် ယၟုဇကုပါမံၚ်ပ္ဍဲစရၚ်မာဲတှ်ေတုဲမံၚ်ရ။ ဟွံပါတှ်ေ ညးတၠခန္ဓစုတ်မာဲဟာ။ ဒပ်မၚ်ကွာန်လေဝ်ပါကၠုၚ်မံၚ်တှ်ေ စုတ်မာဲကီုဏောၚ် ဒးဟီုဏာ” ညးဒေသမွဲတၠ ဟီုရ။
ရဲဂကောံသၟဝ်တဲကဝ်မယှေန်ပၞာန်တံ တိုန်မွဲသ္ၚိစှ်ေမွဲသ္ၚိ ဗက်တေက်မံၚ်စရၚ်မာဲတုဲ မၞိဟ်ဗွဲမဂၠိုၚ်တံဂှ် စိုတ်ဟွံလုပ်စကီုလေဝ် ဒၟာနူဂကောံဌာနစုၚ်တံစိုပ်ကၠုၚ်သ္ၚိဂှ်ရ ဒးသွဟ်ကဵုမံၚ်နွံရောၚ် ညးဆက်ဟီုရ။
သွက်ဂွံကၠုၚ်ရံၚ်စရၚ်မာဲ ပေါဲရုဲမာဲကဝ်မယှေန်ပၞာန်ဂှ် ကၠောန်မံၚ်ဗီုပြၚ်နာနာကီုလေဝ် ညးမွဲမှပရေၚ်စိုတ်လုပ်စလေဝ်ဟၟဲတုဲ ညးဍုၚ်ကွာန်လ္ၚဵုတံဂှ် တ္ၚဲစုတ်မာဲလေဝ်ဟွံတီဏီပုဟ်ဂှ် ညးဒေသမန် မွဲတၠပၠန်ဂှ် ဆက်ဟီုကဵုဌာန်ပရိုၚ်သြန်လောန်တိုၚ်မ်ရ။
“စရၚ်မာဲဂှ် စိုတ်လုပ်စဟာဟီုတှ်ေ ညိလေဝ်ဟွံအာရံၚ်ပုဟ်၊ ပ္ဍဲကဵုအရာပ်ပိုဲကညာၚ်ဏာကဵုစက်သၠဲရမျှာၚ်ကီုရ။ ယၟုဇကုစရၚ်မာဲပါဟွံပါ ကၠုၚ်ရံၚ်ညိဟီုဂှ် အကွက်ဂွံစ ဒှ်မံၚ်ဒဒိုက်ဏောၚ် ဟွံဒှ်အာရံၚ်စရၚ်မာဲပုဟ်။ ညးမွဲလေဝ်ဟွံအာရံၚ်ပုဟ်။ ညးလ္ၚဵုတ္ၚဲဇကုစုတ်မာဲ တ္ၚဲလဵုဂှ် ဟွံတီဏီပုဟ်” သာ်ဝွံသ္ဂးရ။
ပြဟ်ဟ်ဏံ မၞိဟ်ရံၚ်ဟၟဲတုဲ ညံၚ်ဂွံကၠုၚ်ရံၚ်စရၚ်မာဲညိဂှ် ကဝ်မယှေန်ပၞာန်တံဆဝ်ဗ္ၚုဟ်မံၚ် နကဵုစက်သၠဲရမျှာၚ်၊ တိုန်မွဲသ္ၚိစှ်ေမွဲ သ္ၚိတုဲ သွက်ဂွံအာရံၚ်စရၚ်မာဲဗက်ဟီုသၟးဟွံက လက်ကရဴအိုတ် တိုန်သ္ၚိတေက်ရံၚ်စရၚ်မာဲတံ ကၠောန်ကၠုၚ်မံၚ်ယျ။
ဒဵုကဵုစိုပ်သ္ၚိကၠုၚ်စၟဳစၟတ် တေက်ရံၚ်လဝ်စရၚ်မာဲတုဲ ကဝ်မယှေန်ပၞာန်ဂွံလဝ်တၚ်နၚ်တုဲတုဲ ဒှ်မံၚ်ဂှ်ရ ဟွံကၠုၚ်ဟွံဂွံ ညံၚ်ဂွံကၠုၚ်ကဵုမာဲဍာံဍာံ ကဵုမံၚ်ဇြဟတ်ဟရိုဟ်နွံမံၚ်ရောၚ် ညးဒေသတံသ္ဂးရ။
ပ္ဍဲကဵုတွဵုရးမန် စရၚ်မာဲအလန်ပထမ ဗာန်လဝ်ဂှ်တှ်ေ မၞိဟ်ချိုတ်အာတံလေဝ် ကလေၚ်ပါမံၚ်။ မၞိဟ်မွဲဓဝ် နွံမံၚ်ပိပန်ဒၞာဲ။ ယၟုမၞိဟ်ပြံၚ်ဆုဲအာဂှ်လေဝ် ကလေၚ်ပါမံၚ်ပ္ဍဲကဵုစရၚ်မာဲ၊ တၚ်နၚ်ဗၠေတ်ဗၠေၚ်နာနာဒှ်မံၚ်တုဲ ညးလ္ၚဵုယၟုညးတံလေဝ် ဟွံပါလုပ် ဒှ်မံၚ်ရဂှ် ညးဒေသတံဟီုတုဲ ဂွံတီရ။
ပရိုၚ်-သြၚ်လောန်တိုၚ်မ်
Photo – MOI