ရေဝ်၊ ဒဳဇြမ်ပါ ၁
တွဵုရးမန် ပွိုၚ်ဍုၚ်ရေဝ် ပ္ဍဲကရပ်ကွာန်ဗရံၚ်ကဵု ၝောံလမုအကြာၜါလပါ် ဒှ်လဝ်ပေါဲဗတိုက်ဂှ်ရ ရဲဒပ်ကဝ်မယှေန်ပၞာန် ၇ တၠ ချိုတ်အာရဂှ် ဒပ်စဵုဒၞာညးဍုၚ်ကွာန်တပေန်ယှိုဲထဳကိုကျိုက် ဖျေံသ္ဇိုၚ်ရေဝ် လလောၚ်တြးရ။
ပ္ဍဲနဝ်ဝမ်ပါ ၂၅ ဂှ် ဒပ်ကဝ်မယှေန်ပၞာန် ဇြဟတ် ၁၅၀ ပြၚ်တံ ထပက်လုပ်ကၠုၚ်ကရောၚ်ပၞာန် ကွာန်ဗရံၚ်ဂှ် ဒှ်ပေါဲဗတိုက်ကဵု ဒပ်ပံၚ်ကောံမဟာမိတ်ပၠန်ဂတးတံၜါဝါရ။
တုဲပၠန် တ္ၚဲနိုဝမ်ပါ ၂၇ ဂှ်လေဝ် ပ္ဍဲကဵုကရပ်ဒဒန်ဇုက် ကွာန်ၝောံလမုဂှ် ထပ်ဒှ်လဝ်ပေါဲဗတိုက်ပၠန်ရောၚ် အတိုၚ်လိက်လလောၚ်တြး ဂွံတီရ။
အပ္ဍဲကဵုပေါဲဗတိုက်တံဏံ ကောန်ပၞာန်ဗမာ ၇ တၠ ချိုတ် ၇ တၠ ဒးဝပ် ၅ နွံရောၚ် ညးတာလျိုၚ် ဒပ်စဵုဒၞာညးဍုၚ်ကွာန် တပေန်ယှိုဲထဳကိုကျိုက်မွဲတၠ ဟီုကဵုဌာန်ပရိုၚ်သြန်လောန်တိုၚ်မ်ရ။
ပေါဲဗတိုက်တုဲအာဂှ် ကရောၚ်ပၞာန်ဒပ်ပၞာန်ဗမာ ကလေၚ်ဆုတ်အာ ကီုလေဝ် ပန်မံၚ်လွဟ်ဇၞော်တံ နွံမံၚ်ဏီရောၚ် သ္ဂးရ။
ပ္ဍဲကဵုပေါဲဗတိုက်ဏံ ဒပ်ပၞာန်ဗၠးၜးကောန်ဂကူကရေၚ် KNLA မဟာဒပ်(၆) တမ်ဒပ်(၂၇) ဒပ်ပါ်(၁)၊ ဒပ်စဵုဒၞာညးဍုၚ်ကွာန် တပေန်ယှိုဲထဳကိုကျိုက်၊ ဗျူဟာ(၃၃) ဒပ်ပါ် ဗတိုက်သၠေက်တံပါလုပ်ရောၚ် ဂွံတီရ။
လောန်ကၠုၚ်နိုဝမ်ပါ ၁၁ တေံကီုလေဝ် ပ္ဍဲကရပ်ကွာန်ကၞေၚ်တၟံ ပွိုၚ်ဍုၚ်ရေဝ် ပေါဲဗတိုက်အကြာၜါလပါ်ဒှ်တုဲ ကောန်ပၞာန်ဗမာမွဲတၠချိုတ် ဒးလဝ်ဝပ် ၃ တၠ နွံရ။
ပရိုၚ်-သြန်လောန်တိုၚ်မ်
Photo – PDF