မတ်မလီု ၊ ဒဳဇြမ်ပါ ၁
တွဵုရးမန် ပ္ဍဲကဵုဍုၚ်မတ်မလီုဝွံ သွက်ဘာပၞာန်တန်ဗတောန်ကွတ် ယိုက်ဝန်ပၞာန် လၟေၚ်ဂိတုပံက်လဝ်ဂှ် သ္ကိုပ်အုပ်ဓုပ်ဂၠာဲကဵု ကောန်ပၞာန်တၟိဟွံမာန်တံ ဒးဒုၚ်ကေတ်အရေဝ်ရောၚ် လပါ်ကဝ်မယှေန်ပၞာန် ကဵုထပက်စၟတ်တဲရဂှ် သ္ကိုပ်အုပ်ဓုပ်ဟွံမိက်ထမံက်ယၟုညးတံ ဟီုကဵုဌာန်ပရိုၚ်သြန်လောန်တိုၚ်မ်ရ။
ကဝ်မယှေန်ပၞာန်ကော်ကောံဓရီု သ္ကိုပ်အုပ်ဓုပ် ပ္ဍဲအကြာတ္ၚဲတံဏံ ဂှ်တှ်ေ သွက်ယိုက်ဝန်ပၞာန် မွဲဂိတုမ္ဂးအောန်အိုတ်ကောန်ပၞာန်တၟိ ၜါတၠ ညံၚ်ဂွံပကောံကဵုဗိုန်န်ညိဂးတုဲ သ္ကိုပ်အုပ်ဓုပ်ပကောံကဵု ကောန်ပၞာန်တၟိဟွံမာန်တံမ္ဂး ဒးဒုၚ်ကေတ်အရေဝ်ဏောၚ် ဒဒှ်ရဂွံတီလဝ်ဂှ် ကဵုထပက်စၟတ်တဲဒုၚ်ဝန်ရ။
တုဲပၠန် သွက်လၟိဟ်ကောန်ပၞာန်လၟေၚ်ဂိတုညံၚ်ဂွံပေၚ်အာ ဒစးဒုၚ်ပကောံလဝ်တုဲ ပရေၚ်ကံက်သြန်ပ္ဍဲအရာပ်တံဂှ်တှ်ေ ညိလေဝ်ရမျှာၚ်လ္ပကဵုတိတ်ညိဂှ် ဟီုလဝ်နွံဂွံတီရ။
သွက်ဂွံတိုန်ဘာယိုက်ဝန်ပၞာန် မွဲဂိတုမ္ဂး အောန်အိုတ်ဒးကဵုကောန်ပၞာန်တၟိၜါတၠဂှ် ယဝ်ရဂၠာဲကဵုဟွံဂွံမ္ဂး ဒးဒုၚ်ကေတ်အရေဝ်တုဲ ထပက်အဇာမၞိဟ်လိၚ်ကေတ်ဗီုကၠာကၠာတေံဟွံဂွံဂှ် ဒှ်အခက်အခုဲကွေံကွေံရောၚ် သ္ကိုပ်အုပ်ဓုပ်ဟွံမိက်ထမံက်ယၟုမွဲတၠ ဟီုကဵုဌာန်ပရိုၚ်သြန်လောန်တိုၚ်မ်ရ။
“လၟုဟ်ဗီုကၠာတေံ ဟွံသေၚ်ရ။ သွက်အရၚ်ယိုက်ဂၠေၚ်ဝန်ပၞာန် မွဲဂိတုတှ်ေၜါတၠ ညံၚ်ဂွံဂွံဒးဂၠာဲကဵု။ ဂၠာဲဟွံဂွံမ္ဂး ဒးထပက်စၟတ်တဲဒုၚ်ဝန်။ တီမံၚ်သေၚ်ဟာ ဗီုကၠာကၠာတေံ ဗက်လိၚ်ကဵုသြန်ဂှ်လေဝ် ဂၠာဲမၞိဟ်ဟွံလောဲသွာ။ မၞိဟ်တိုန်လဝ်ဘာပၞာန်ဂတဂတတေံလေဝ် ကေတ်အဆက်ဟွံဂွံတုဲ ဟွံမိက်တိုန်ဘာပၞာန်အိုတ်ပုဟ်။ လၟုဟ်သ္ကိုပ်အုပ်ဓုပ်ဗွဲမဂၠိုၚ် က္ဍဟ်စမံၚ်အိုတ်ယျ” သာ်ဝွံ သ္ဂးရ။
အတိုၚ်လၟုဟ်ဏံ ဟွံဂွံညံၚ်ဂွံဂွံ ဒးပကောံကေတ်မံၚ်ကောန်ပၞာန်တၟိတုဲ လိၚ်မၞိဟ်ထပက်အဇာဟွံဂွံမ္ဂး ပ္ဍဲအရာပ် ဒးကံက်ကေတ်မာဲသၟတ်တံမဒှ်တုဲ ရဲဟွံကၠုၚ်ဂၠံက်မာဲဂှ်တှ်ေ ဒးကော်ကေတ်ကဵုလိက်ရုၚ်ဏောၚ် ညးဆက်ဟီုရ။
မွဲလပါ်ပၠန် သ္ကိုပ်အုပ်ဓုပ်သၟဝ်တဲ ကဝ်မယှေန်ပၞာန်တံ သွက်ဂွံဂွံကောန်ပၞာန်တၟိတံမာန် စန်ဒက်သၟတ်တံ နကဵုသြန်ကီု၊ အခိၚ်ဗတမ်တိတ်မ္ၚးတှ်ေ ဗက်ရပ်ပကောံကေတ်မံၚ် ကောန်ပၞာန်တၟိသၟးဟွံက နဲလဵုဂွံဂွံ ပကောံကေတ်မံၚ်ဗွဲအဓ္ဓမအတေၚ်ရ။
သွက်ကောန်ပၞာန်တၟိ ကဝ်မယှေန်ပၞာန် ပကောံကေတ်မံၚ်ကောန်ပၟာန်တၟိ အတေၚ်အဓ္ဓမတုဲ သၟတ်တံဟွံဂံၚ်တိတ်မ္ၚး၊ သၟတ်လ္ၚဵုတံဂှ် ဂစာန်ဂြိပ်တိတ်အာဍုၚ်မ္ၚးနွံမံၚ်ရ။
အတိုၚ်တၚ်နၚ် ဌာန်ပရိုၚ်သြၚ်လောန်တိုၚ်မ်ပကောံဂွံလဝ်မ္ဂး အပ္ဍဲကဵုတွဵုရးမန် စနူတန်ဗတောန်ဘာပၞာန် လၟေၚ်၁ ဒဵုစိုပ်လၟေၚ် ၁၉ ဏံ သၟတ်ၜိုတ် ၃၅၀၀ တံ ဒးဒုၚ်ပကောံလဝ်ကောန်ပၞာန်တၟိတံရ။
ပရိုၚ်-သြန်လောန်တိုၚ်မ်
Photo – MOI