မတ်မလီု၊ ဒဳဇြမ်ပါ ၂
ပေါဲရုဲမာဲကဝ်မယှေန်ပၞာန် ကၠောန်အာဏံ ပြဿနာပဋိပက္ခ ပရေၚ်ဍုၚ်ကွာန်ကၟိန်ဍုၚ်ဂှ် ညိလေဝ် သောၚ်ကလးအာမာန်ဟွံသေၚ်တုဲ ဆန္ဒညးဍုၚ်ကွာန်ဟွံပါမွဲသာ် ကရေပ်ဓရတ်ကၠောန်အာ ပေါဲရုဲအလီဂှ် ဒစဵုဒစးပျုတ်ဗဒေက်ရောၚ် ဂကောံမှာဇန်ကရေၚ်တံ ပတိတ်လိက်လစွံစိုတ်ရ။
လ္တူပေါဲရုဲမာဲအလီ ဒပ်ပၞာန်သီအဝဵု ကၠောန်အာ ဂိတုဒဳဇြမ်ပါ ၂၈ ဏံဂှ် နူကဵု ဂကောံမှာဇန်ကရေၚ် ဍုၚ်ဂၠးကဝ်၂၅ ဂကောံတံ ပတိတ်လိက် လလောၚ်တြး ပ္ဍဲကဵုစၟတ်တ္ၚဲ ဒဳဇြမ်ပါ ၁ ရ။
စွံပွန်ကဵုညးဍုၚ်ကွာန် ပ္ဍဲကဵုဒေသတိဍာ် ကဝ်တူလေဝ်တုဲ ဒပ်ပၞာန်ဗမာစကာၜၚ်ကျာကဆံၚ်သၠုၚ်၊ နဲကဲဒရုၚ်တံတုဲ ဟိုတ်နူကြဳဖျေံမံၚ်ဗုမ်တုဲ ညးဍုၚ်ကွာန်တံအရိုဟ်ဟ်တ္ၚဲ ဒးဝပ် လမျီုဒးဆောံလေၚ် ကေုာံ သ္ၚိဒၟံၚ်စမြိၚ်ဒၞာဲဗွဲမဂၠိုၚ် လီုလာ်အာလဝ်နွံ သ္ဂးရ။
ဗီုအကာဲအရာ ညးဍုၚ်ကွာန်ကရေၚ်တံ ဒးမံၚ်ဘဲဒဏ်ဏံ ၜိုန်ရဆဵုမံၚ်ကဵုနမတ်ကီုလေဝ် ဂကောံကရေၚ်ရပ်လွဟ်တံကီု ဗော်ပရေၚ်ဍုၚ်ကွာန်ကရေၚ်ကဵု ပူဂဵုတံဝွံ ထံက်မံၚ်ဂလာန်ကဵု ပေါဲရုဲမာဲကဝ်မယှေန်ပၞာန်တုဲ ပတိတ်လဝ်လိက် လလောၚ်တြး၊ ဂစာန်ကၠောန်ကဵုမံၚ် သွက်ဂကောံပကီုပရာတ်ဂစိုတ်မၞိဟ်တံဂှ် နကဵုဂကောံမှာဇန်ကရေၚ်တံ ဒှ်ပွမအောန်စိုတ်ကွေံကွေံရောၚ် ပတိတ်လဝ် လိက်လလောၚ်ဂှ်ရ။
ဟိုတ်ဂှ်ရ ပေါဲရုဲမာဲကဝ်မယှေန်ပၞာန် သ္ကိုပ်သ္ကကၠောန်အာဏံ ဗီုလဵုမှ ဒှ်ဗဗွဲဓရ်ဟွံမာန်တုဲ နကဵုမာဲဇကုမွဲတၞးဂှ် ကဵုဏာအခေါၚ် သွက်ဒပ်ပၞာန်သီအဝဵု ပဵုတုဲ လုပ်အာဗဗွဲသၞောဝ်မ္ဂး ပဋိပက္ခဍုၚ်ဗမာလေဝ် ပဵုလအ်ဂၠိၚ်ဒှ်အာမာန်ကီု လ္တူဂကောံပၞာန်သီအဝဵု သွက်ဂွံကေတ်အရေဝ် ပရေၚ်ရာဇဝတ်ပၞာန်ဂှ်လေဝ် လီုလာ်အာမာန်ရောၚ် ပ္ဍဲလိက်လလောၚ်တြး သ္ဂးလဝ်ရ။
ဟိုတ်နူအကာဲအရာတံဏံတုဲ ပေါဲရုဲမာဲအလီဏံဂှ် ကောန်ဂကူကရေၚ်ပိုဲကီု ကောန်ဍုၚ်အရၚ်ဂကူတၞဟ်ဟ်တံကီု မွဲစွံညဳညဳ သွက်ဂွံဒစဵုဒစးပျုတ်ဗဒေက်အာဂှ် ဒှ်ကိစ္စဇၞော်ကွေံရောၚ် ဂကောံမှာဇန်ကရေၚ်တံ ဗတိုက်ဖအောဝ်လဝ်ရ။
ပေါဲရုဲမာဲအလီ ကရေပ်ဓရတ်ကၠောန်အာ ဟၟဲကဵုဗဗွဲဓရ်ဏံဂှ် အမာတ်ကလုတ်ဍုၚ်ဂၠးကဝ်နာနာတံ ညံၚ်ဟွံသ္ပစၟတ်သမ္တီ ကေုာံသဘဴလစွံစိုတ်ဒစဵုဒစးတံ ညံၚ်ဂွံထ္ၜးကဵု ခိုၚ်ၚ်ဗိုန်န်ညိဂှ် ဂကောံမှာဇန် ကရေၚ် ၂၅ ဂကောံတံ အာတ်မိက်လဝ်ရ။
ပရိုၚ်-သြၚ်လောန်တိုၚ်မ်
Photo – Social Media