မတ်မလီု ၊ ဒဳဇြမ်ပါ ၂
ပ္ဍဲတွဵုရးမန် ဗော်ပရေၚ်ဍုၚ်ကွာန် လုပ်ပြိုၚ်မာဲကဝ်မယှေန်ပၞာန်တံဂှ် ဒပ်ပၞာန်ကဵုလဝ်ပရေၚ်ဂီုကၠီုပေၚ်ၚ်တုဲ ပ္ဍဲတ္ၚဲအကြာတံဏံ စှ်ေကၠောန်မံၚ်ပရေၚ်စန်ဒက်မာဲရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
ပရေၚ်ဂီုကၠီု သွက်ဗော်စှ်ေမံၚ်ပရေၚ်စန်ဒက်တံၚ်ဂြဲမာဲတံဂှ် ဒပ်ကဝ်မယှေန်ပၞာန်၊ ဒပ်ဗၠာဲသၟိၚ်၊ ဒပ်မၚ်ကွာန် ညးဒေသကော်စ ပျူသဝ်ထဳတံလေဝ် ဗက်ဖန်ဇန်ရေၚ်တၠုၚ်ကဵုလဝ် မဒှ်ရ။
ဂကောံသၟဝ်တဲကဝ်မယှေန်ပၞာန်တံ ပ္ဍဲကဵုကေတ်လဝ်ကဵုပရေၚ်ဂီုကၠီု ဂှ်တှ်ေ သီုကဵုကယျိုၚ်ယူနဳဖံၚ်ကီု ကယျိုၚ်အရာပ်ကီု ဗက်အာဒၞာဲဗော်ပရေၚ်ဍုၚ်ကွာန်တံ စန်ဒက်မာဲဂှ်တုဲ ကဵုမံၚ်ပရေၚ်ဂီုကၠီုရောၚ် ဂွံတီကေတ်ရ။
ဗွဲကြဴဏံ ဗော်ပရေၚ်ဍုၚ်ကွာန်တံ စှ်ေလပါ်ကွာန်တံတုဲ ဗက်စန်ဒက်မံၚ်မာဲဂှ် ဂွံဆဵုမံၚ်တုဲ ဒပ်ဗၠာဲသၟိၚ်ကဵုဒပ်မၚ်ကွာန်တံ ကဵုလဝ်ပရေၚ်ဂီုကၠီုရဂှ် ညးဒေသတွဵုရးဍုၚ်မန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်မ်ရ။
“လပါ်ကရေက်ပိုဲဏံတှ်ေ ဗော်မန်နွံ၊ ဗော်ပျဳခိုၚ်ဖျိုဝ်နွံ၊ ဗော် PPP နွံ ဗော်ညးဍုၚ်ကွာန်နွံရောၚ်။ စှ်ေစန်ဒက်မာဲ လပါ်ကွာန်တံဂှ် ဂွံဆဵုလဝ်။ ဒပ်မၚ်ကွာန်တံ ဒပ်ဗၠာဲသၟိၚ်တံ ကေတ်လဝ်ဂီုကၠီုရ” သာ်ဝွံ သ္ဂးရ။
ဗော်ပရေၚ်ဍုၚ်ကွာန်လ္ၚဵု ဂွံလဝ်ဂီုကၠီုပေၚ်ၚ်တံဂှ် ကောံပ္ဍဲသ္ၚိ မွဲမတုဲ ကၠောန်ပရေၚ်ဟီုတွံစန်ဒက်မာဲလေဝ်နွံ တိုန်မွဲသ္ၚိစှ်ေမွဲသ္ၚိတုဲ ဗက်ပရအ်မံၚ်လိက်လၟေၚ်တံလေဝ်နွံမံၚ် ညးဆက်ဟီုရ။
ကြပ်ကၠုၚ်မံၚ်ကဵုပေါဲရုဲမာဲဟဍၚ် ကေတ်လဝ်ပရေၚ်ဂီုကၠီုပေၚ်ၚ်တုဲ ဗော်ပရေၚ်ဍုၚ်ကွာန်တံ ကၠောန်မံၚ်ပရေၚ်ချဳဒရာၚ်နွံကၠုၚ်တုဲ ဗော်လ္ၚဵုတံသီုကဵုထ္ၜးမံၚ်အဝဵုကဵု ညးဍုၚ်ကွာန်တံလေဝ်နွံမံၚ် ညးဒေသမန်မွဲတၠပၠန်ဂှ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“ဗော်တံ ချဳဒရာၚ်ဂၠိုၚ်မံၚ်ကွေံကွေံ။ ဗော်ညးဍုၚ်ကွာန် PPP ပျဳခိုၚ်ဖျိုဝ် ဗော်မန်တံ ဂၠိုၚ်ကွေံကွေံ၊ တ္ၚဲဏံ ညးတံဗက်ပတိုန်မံၚ်ဂတဵုမုက် ၉ ဒၞာဲ၊ ကၟာတ်လဝ်ဂၠံၚ်။ မၞိဟ်တံဒးဂတဵုမၚ်မံၚ်ပ္ဍဲတ္ၚဲအတိုၚ်ဏံ လံကွေံ။ မာတ်လဝ်ကဵု ကွဳလိုန်ဓါတ်လဒေါဝ်ဂၠံၚ် ဗိုက်လတက်လဝ်ကယျိုၚ်တုပ်ပ်တုဲ ညံၚ်ကဵုမၞိဟ်ပရီုယံၚ်ၚ် ထ္ၜးမံၚ်အဝဵု။ ပျဳခိုၚ်ဖျိုဝ်တံ ပဵုပရေအ်ကွေံ” သာ်ဝွံ သ္ဂးရ။
ဗော်ပရေၚ်ဍုၚ်ကွာန်လ္ၚဵုတံ ကိုပ်ကၠာသ္ပဟိုတ်ကဵုပရေၚ်ဂီုကၠီု ဟွံဂွံဂံၚ်စှ်ေဗက်စန်ဒက်မာဲ အကြာဗလးတိတုဲ စန်ဒက်ကၠုၚ်မံၚ်နူကဵုအန်လိုၚ်သၟးကီုလေဝ် လၟုဟ်ဏံမ္ဂး ကေတ်လဝ်ပရေၚ်ဂီုကၠီုပေၚ်ၚ်တုဲ ဗက်စှ်ေစန်ဒက်မာဲ ပ္ဍဲကဵုဗလးတိတံရ။
ဗော်ပရေၚ်ဍုၚ်ကွာန်တံ ၜိုန်ရစှ်ေစန်ဒက်မာဲ ပ္ဍဲဗလးတိကီုလေဝ် ပ္ဍဲကဵုဒေသ ဒၞာဲဂကောံဇြဟတ်ပၠန်ဂတးတံ ဇြဟတ်ခိုဟ်မံၚ်မ္ဂး ဆၜိုတ်လ္တူဍုၚ်ဟေၚ် ဂံၚ်ကၠောန်ပရေၚ်စန်ဒက်မာဲကီုလေဝ် ဒၞာဲတၞဟ်ဟ်တံဂှ် ဟွံဂံၚ်အာစှ်ေစန်ဒက်ဏီပုဟ် ညးဒေသတံ သ္ဂးရ။
သွက်အလံၚ်ညးစၞးအမာတ် လုပ်ပြိုၚ်မာဲတံဂွံကၠောန်အာ ပရေၚ်စန်ဒက်မာဲဂှ်တှ်ေ စနူအံက်တဝ်ပါ ၂၈ ဒဵုကဵု ဒဳဇြမ်ပါ ၂၆ ကဝ်မယှေန်ပေါဲရုဲမာဲ ကဵုလဝ်အခေါၚ်ပွိုၚ် ၆၀ တ္ၚဲရ။
ပ္ဍဲတွဵုရးမန်မ္ဂး သွက်ဂွံလုပ်ပြိုၚ်မာဲကဝ်မယှေန်ပၞာန်ကၠောန်ဏံဂှ် အလံၚ်အမာတ်ပုဂ္ဂလိကမွဲတၠပါလုပ် အပံၚ်ဖအိုတ်အလံၚ်အမာတ် ၂၅၀ ပြၚ် နူကဵုဗော် ၉ ဗော်တံ သွက်ဂွံလုပ်ပြိုၚ်အာဂှ် ပတိုန်လဝ်စရၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – MUP