ၜဳလေၚ်၊ ဒီဇြမ်ပါ ၃
တွဵုရးမန် ပွိုၚ်ဍုၚ်ၜဳလေၚ် အခိၚ်ဗော်ပျဳခိုၚ်ဖျိုဝ် စှ်ေပရေၚ်စန်ဒက် ပ္ဍဲကဵုကွာန်ကအ်သတ်တဵု သစ်တိုကျွန်း ဂှ် ရဲဂကောံဂီုကၠီု ဒပ်မၚ်ကွာန်တံ စလဝ်ပ္ဍဲဆေင်စသုင်ဂှ်တှ်ေ ဟွံကဵုသြန်၊ ထ္ၜးသေနာတ် စသုၚ်လဝ်ဂှ်ရ ရဲတၠဆေၚ်ဖျာတံ ဒးဒုၚ်ဂိအာရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုနိုဝမ်ပါ ၃၀ ကဵုဒဳဇြမ်ပါ ၁ တေံ အလံၚ်အမာတ်ဗော်ပျဳခိုၚ်ဖျိုဝ် ပွိုၚ်ဍုၚ်ၜဳလေၚ်တံ အခိၚ်စှ်ေလဝ်ပရေၚ်စန်ဒက်မာဲ ကရပ်ကွာန်ကအ်သတ်တဵုကဵု ပွဳပွူတံဂှ် ဒပ်မၚ်ကွာန်ကေတ်လဝ် ပရေၚ်ဂီုကၠီုတံ ဟွံကဵုသြန်မွဲသာ် စလဝ်ပ္ဍဲဆေၚ်ဍာ်လက်ဖက်ကဵု ဆေင်စၞစသုၚ်တံ နွံမံၚ် သ္ဂးရ။
အတိုၚ်ညးဆဵုလဝ် နမတ်မွဲတၠဟီုလဴထ္ၜးလဝ်မ္ဂး ဂကောံဒပ်မၚ်ကွာန်တံ စသုၚ်လဝ်ဂှ် နူတၠဆေၚ်မွဲဆေၚ် ဟိုတ်နူအာတ်သြန်တုဲ ထ္ၜးလဝ်သေနာတ်ဘပဠ ဒှ်လဝ်ပရေၚ်ကယျာန်ဓဝါတ်နွံရဂှ် ဂွံတီကေတ်ရ။
ဂကောံဒပ်မၚ်ကွာန်တံ ထ္ၜးသေနာတ်ဘပဠ ဟွံကဵုသြန်စသုၚ်လဝ် နွံမံၚ်၅ ဆေၚ်တုဲ မွဲဆေၚ်မ္ဂး ဒးဒုၚ်ဂိအာလဝ်သြန် ၜိုတ်အကြာ ၃၀၀၀၀ ကဵု ၅၀၀၀၀ ဒကေဝ်နွံမံၚ် သ္ဂးရ။
ပ္ဍဲကဵုစသုၚ်လဝ်ဆေၚ်စၞစတံဂှ် ဂကောံဒပ်မၚ်ကွာန်တံသက်က်ရမဒှ်တုဲ အလံၚ်အမာတ်တံကဵု ကောန်ဗော်တံဟွံပါပုဟ် ဟီုရ။
လ္တူညးဍုၚ်ကွာန်တံ ဂကောံဒပ်မၚ်ကွာန်တံဏံ ထ္ၜးလဝ်သေနာတ်ဘပဠလဝ်ဂှ် ညံၚ်ဂွံကေတ်ကဵုအရေဝ် ညးဒေသတံကဵု တၠဆေၚ်တံ အာတ်မိက်လဝ် နွံရ။
ပ္ဍဲပွိုၚ်ဍုၚ်ၜဳလေၚ် ဇြဟတ်ဒပ်မၚ်ကွာန် ၃၀၀ ပြၚ်နွံမံၚ်ဂှ် ပံၚ်တောဲကဵုဒပ်ကဝ်မယှေန်ပၞာန်တံတုဲ ပ္ဍဲကဵုသၞေဟ်ကၚ်တံ မၚ်ကၚ်မွဲစွံ အာတ်မံၚ်သြန်ကီု ဂေတ်မံၚ်ကၚ် ပရေၚ်ဂီုကၠီုတံကီုကၠောန်သ္ပမံၚ် ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media