ဖာအၚ်၊ ဒီဇြမ်ပါ ၂၇
ဂကောံထပက်လဝ်စၟတ်တဲ NCA ဒပ်ပၞာန်ကရေၚ်ပတုဲဖဵု ဒဳမဝ်ကရေသဳ DKBA ခါန်ကၞက်ရုဲစှ်ကဵုတာလျိုၚ် နဒဒှ် သ္ကိုပ်က္ဍိုက်ပ်ပၞာန်တၟိကု သ္ကိုပ်ပၞာန်ဇၞော် သဝ်ယှိုဲဝရဂှ် နူကဵု DKBA လလောၚ်တြး ပ္ဍဲကဵုဒဳဇြမ်ပါ ၂၆ ရ။
ကုသ္ကိုပ်က္ဍိုက်ပ်ပၞာန်ကၠာတေံ သ္ကိုပ်ပၞာန်ဇၞော်သဝ်သတဳဂှ် ပတိုန်ကဵုတာလျိုၚ် နာယကဇၞော် ဂကောံကဵုကသပ် DKBA တုဲ သ္ကိုပ်ပၞာန်ဇၞော် သဝ်ယှိုဲဝဂှ် ရုဲစှ်ပတိုန်ဏာ ဒၞာဲတာလျိုၚ် သဝ်သတဳ သ္ဂးရ။
သ္ကိုပ်ကောပ်ကာဲပၞာန် စၟတ် ၂ DKBA ဒုသ္ကိုပ်ပၞာန် သဝ်ဗညိၚ်ဂှ် ပတိုန်ကဵုတာလျိုၚ် ဒုသ္ကိုပ်က္ဍိုက်ပ်ပၞာန် နဒဒှ်ဒုသ္ကိုပ်ဇၞော်ကီု၊ သ္ကိုပ်ကောပ်ကာဲပၞာန် စၟတ် ၁ DKBA ဒုသ္ကိုပ်ပၞာန် သိုင်ကျဝ်လှဂှ် ရုဲစှ်ခါန်ကၞက်ကဵုဒၞာဲ ဥက္ကဌ ကမ္မတဳပရေၚ်ပိုန်ဒြပ်ဗဟဵု DKBA ရောၚ် လလောၚ်တြးလဝ်ရ။
တုဲပၠန် သ္ကိုပ်ဗိုလ်ဇၞော်သဝ်အေဝါန်ဂှ်လေဝ် ရုဲစှ်ကဵုတာလျိုၚ် သ္ကိုပ်ကောပ်ကာဲပၞာန် စၟတ် ၂ DKBA အဆံၚ်ဒုသ္ကိုပ်ပၞာန်ကီုရဂှ် ပ္ဍဲကောံဓရီုသ္ကိုပ်ဒပ် အလန် ၁၉ ဝါ သ္ပဒတန်ကဵုတာလျိုၚ်ဂှ် DKBA လလောၚ်တြးရ။
ဂကောံရပ်လွဟ်ကရေၚ် DKBA ဂှ် ပ္ဍဲအခိၚ်လၟုဟ်ဏံ ယၟုဒယှ်မံၚ်ကဵုကမၠောန်လီသြန်အန်လိုၚ် (ကျဖျ)တုဲ ပ္ဍဲကဵု ဒၞာဲဒေသ ကျံက်ခက်၊ ဖလူ၊ ဝဝ်လေဝ်၊ ကျာ်ပိတံဂှ် ဆက်ကၠောန်မံၚ်ဖိုအ်ရ။
ညးမဆက်စပ်မံၚ်ကဵု ကမၠောန်လီသြန်အန်လိုၚ် (ကျဖျ) က္ဍိုပ်သ္ကိုပ် DKBA သဝ်သတဳ၊ သဝ်သာန်အံၚ်၊ သိုၚ်ကျဝ်လှ ကေုာံ သဝ်သိၚ်ဝေန်တံကီု အတိုၚ်မွဲဂကောံဏံဂှ် ကေတ်အရေဝ်ပရေၚ်မာတ်ဆိုအ် ရဂှ် နူကဵုအလဵုအသဳအမေရိကာန် လလောၚ်တြးလဝ် ပ္ဍဲနဝ်ဝမ်ပါ ၁၂ တေံ မဒှ်ရ။
ညးပါလဝ်ပရေၚ်မာတ်ဆိုအ်ကေတ်အရေဝ် အမေရိကာန် သဝ်သတဳဂှ် ကဵုဒေါအ်ဇူထောံ နူကဵုတာလျိုၚ် သ္ကိုပ်က္ဍိုက်ပ်ပၞာန်တုဲ ကဵုတာလျိုၚ် နာယကဇၞော် ဂကောံကဵုကသပ်ကီု၊ ကု သိုင်ကျဝ်လှ ဂှ်လေဝ် DKBA ပတိုန်ကဵုတာလျိုၚ်အဆံၚ် သ္ကိုပ်ပၞာန်မွဲတၠရ။
ဇၟာပ်ကဝ်မယှေန်ပၞာန် ကော်ဘိက်ဆဵုဂဗသဳကၠဳတံဂှ် နကဵုလၟေၚ် DKBA တိုန်စိုပ်မံၚ်တုဲ ထံက်ဂလာန်ကဵုဇြဟတ် ဘိုၚ်ကဵုအရီုဗၚ်သွက်ပေါဲရုဲမာဲရောၚ် လလောၚ်တြးလဝ်ရ။
ပရိုၚ်-သြၚ်လောန်တိုၚ်မ်
Photo – DKBA