ၜဳလေၚ်၊ ဒီဇြမ်ပါ ၂၈
တွဵုရးမန် ပွိုၚ်ဍုၚ်ၜဳလေၚ် ကရောၚ်ပၞာန်ဗမာထပက်ကၠုၚ် ပန်ဖျေံလွဟ်ဇၞော်ပ္ဍဲကွာန်အလူလေဝ်ဂှ်ရ ညးဒေသ ၃၀၀၀ ပြၚ် ဒးဂြိပ်ပါဲမံၚ်ရဂှ် ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ကဝ်မယှေန်ပၞာန် ဇြဟတ် ၂၀၀ ပြၚ် စနူဒဳဇြမ်ပါ ၂၇ အခိၚ်နူဂယးပြဟ်ဂှ် ပန်ဖျေံလွဟ်ဇၞော် ထပက်လုပ်ကရောၚ်ပၞာန် ပ္ဍဲကွာန်အလူလေဝ် မဒှ်ရ။
ဟိုတ်နူ ကရောၚ်ပၞာန်ကဝ်မယှေန်ပၞာန် ထပက်လုပ်ကၠုၚ်တုဲ ညးဒေသနူကဵုကွာန်အလူလေဝ်၊ အလူဂျဳကဵု ကွာန်ဖိုဝ်ဝါတိၚ် ၃၀၀၀ ပြၚ်တံ ဒးဂြိပ်ပါဲမံၚ်အာ ဒၞာဲဗၠးဘဲတံရ။
ပေါဲဗတိုက်ဟၟဲမွဲသာ် ပန်လွဟ်ဇၞော်လွဟ်ဍောတ် ကရောၚ်ပၞာန် ထပက်လုပ်ကၠုၚ်ကွာန်ဂှ်တုဲ ကောန်ကွာန်တံ ညံၚ်မံၚ်အပ္ဍဲကွာန် ဟွံဂွံမာန်ဂှ် ရဲလပါ်ကဝ်မယှေန်ပၞာန်တံ မွဲလပါ်ဓဝ်ဖန်မံၚ်ရောၚ် ညးဒေသတံသ္ဂးရ။
တုဲကၠုၚ်ဂိတုဒဳဇြမ်ပါ ၂၄ တေံဂှ်လေဝ် ပ္ဍဲဘာလကျာ် ခေတ္တာ ကွာန်အလူဂျဳဂှ် လွဟ်ဇၞော်ကဝ်မယှေန်ပၞာန်ပန်နၚ် ဒတုံခတိုဟ်အာဂှ်ရ ညးဗြဴ ၃ တၠချိုတ်အာတုဲ၊ ၂ တၠ ဒးအာဝပ်ရ။
အတိုၚ်ညးဒေသတံဟီုမ္ဂး နူကဵုတမ်ဒပ်ပၞာန်ဗမာဖျေံလဝ်သ္ဇိုၚ် ပ္ဍဲၜဳလေၚ်ဂှ်လေဝ် စနူဒဳဇြမ်ပါ ၂၄ ဂှ် ပန်မံၚ်လွဟ်ဇၞော် အရိုဟ်ဒဒှ်တ္ၚဲနွံမံၚ် မဒှ်ရ။
ပ္ဍဲပွိုၚ်ဍုၚ်ကျာ်ထဝ် အကြာၜါလပါ် ပေါဲဗတိုက်ဒှ်မံၚ်ဂှ်ရ ညးဒေသ ၂၀၀၀ ပြၚ် စနူဂိတုဒဳဇြမ်ပါ ၂၅ ဂှ် ထောံသ္ၚိဌာန် ဒးဂြိပ်ပါဲမံၚ်အိုတ်ရ။
ပရိုၚ်-သြၚ်လောန်တိုၚ်မ်
Photo – CJ