မတ်မလီု ၊ ဒီဇြမ်ပါ ၂၈
သွက်ပေါဲရုဲမာဲ ကဝ်မယှေန်ပၞာန်သီအဝဵုကၠောန်အာဏံ ပ္ဍဲမာဲဒစးဒုၚ်တွဵုရးမန်တံမ္ဂး ဗော်ပျဳခိုၚ်ဖျိုဝ် ဂွံလဝ်ဇၞးပိုတ်တ်ရောၚ် ဂွံတီလဝ် နူကဵုတၚ်နၚ်ကမ္မယှေန်ပေါဲရုဲမာဲရ။
အတိုၚ်တင်နၚ် ဌာန်ပရိုၚ်သြၚ်လောန်တိုၚ်မ်ပကောံဂွံလဝ်ဂှ်မ္ဂး သွက်ပေါဲရုဲမာဲသ္ကုတ် ၁ ဂိတုဒဳဇြမ်ပါ ၂၈ ကၠောန်အာ ပ္ဍဲပွိုၚ်ဍုၚ် ကျာ်မြဟ်ဂွံလဝ်မာဲဒစးဒုၚ် ၃၂၀၀ ပြၚ်ဂှ် အလံၚ်ညးစၞးဗော်ပျဳခိုၚ်ဖျဵုတံ ဂွံလဝ်မာဲ ၃၁၀၀ ပြၚ်ရ။
အပ္ဍဲကဵုမာဲဒစးဒုၚ် ၃၂၀၀ မ္ဂး ဗော်ညဳသၟဟ်မန်ကဵု ဗော် “ပြည်သူ့ပါတီက” တံဂှ် မွဲမွဲဗော် ကရပ် ၂၀ မာဲ၊ ဗော် “ပြည်သူ့ရှေ့ဆောင်ပါတီ” ကဵု ဗော်တစညတံ မွဲမွဲဗော် ကရပ် ၁၀ မာဲ၊ ဗော်ကၠဗုကဵု ဗော် “အမျိုးသားအကျိုးစီးပွား တိုးတက်ရေးပါတီ” တံ မွဲမွဲဗော် ၁၀ မာဲလေဝ်ဟွံပေၚ်ဍၚ် နွံမံၚ်အကာဲအရာ ဗီုတံဏံရ။
ဗီုဏံကီု ပ္ဍဲဒဳဇြမ်ပါ ၂၈ သွက်ပွိုၚ်ဍုၚ် ကၠောန်ပေါဲရုဲမာဲ ကျာ်ထဝ်၊ သဓီု၊ မတ်မလီုကဵု ၜါသွာၚ်တံမ္ဂး အလံၚ်အမာတ် ဗော်ပျဳခိုၚ်ဖျဵုတံဟေၚ် ဇၞးလဝ်မာဲပိုတ်တ် မဒှ်ရ။
မာဲဒစးဒုၚ်တံဂှ်ဖန်ဖက်လဝ် သွက်ဗော်ဗျဳခိုၚ်ဖျဵုဟေၚ်မဒှ်တုဲ ဗော်ဗျဳခိုၚ်ဖျဵု ဇၞးမာဲဗီုဏံဂှ် တၟေၚ်မံၚ်ဟွံသေၚ်ပုဟ် ညးလ္ၚတ်ပရေၚ်ဍုၚ်ကွာန် ဥူကျဳမျေအ် ဟီုရ။
“မာဲဒစးဒုၚ်ဟီုဂှ် ဖန်ဇန်လဝ် သွက်ဗော်ပျဳခိုၚ်ဖျိုဝ် ဂွံမာန်မာဲရဏောၚ်။ ဍေံဖန်လဝ် ဍေံတံမာန်အာဂှ် မုလေဝ်ဟွံတၟေၚ်ပုဟ်။ ပ္ဍဲ ၂၀၁၀ တေံ လက်ထက် ဥူတိၚ်သိၚ်တေံလဝ် စိုပ်မံၚ်ဗတမ် ၁၂ နာဍဳဂှ် အံၚ်တိၚ် ကျမံၚ် ဥူတုဝေဖိုအ်ဏီ။ အပ္ဍဲဂှ် ကေတ်နၚ်မာဲဒစးဒုၚ်မွဲဓုပ်တုဲမွဲဓုပ် ဟွံမာန်ညံၚ်ဂွံမာန်တုဲ လက်ကြဴအိုတ် ဥူတုဝေကျတုဲ အံၚ်တိၚ်မာန်အာ။ လၟုဟ် ပျဳခိုၚ်ဖျိုဝ်မာန်အာဂှ်လေဝ် မုလေဝ်ဟွံတၟေၚ်ပုဟ်” သာ်ဝွံ သ္ဂးရ။
မာဲဒစးဒုၚ် နူအပ္ဍဲဍုၚ်မ္ၚးဍုၚ်ကဵုလဝ်တံဂှ် ကဝ်မယှေန်ပေါဲရုဲမာဲ ကၟိန်ဍုၚ်ရိုဟ်လဝ်လၟိဟ်မာဲ ပ္ဍဲကဵုရုၚ်ပါ်ပွိုၚ်ဍုၚ် ကဝ်မယှေန်ပေါဲရုဲမာဲ ဆေၚ်စပ်တံမဒှ်ရ။
အတိုၚ်သွဟ်မာဲဒစးဒုၚ်တံမ္ဂး သွက်စၠတ်ဓဝ်ညးဍုၚ်ကွာန်၊ စၠတ်ဓဝ် ကောန်ဂကူ၊ စၠတ်ထဝ်တွဵုရး၊ ညးစၞးကောန်ဂကူကောန်ဍုၚ်အရၚ် တံဂှ် ဗော်ပျဳခိုၚ်ဖျဵု ဂွံလဝ်လၟိဟ်မာဲဂၠိုၚ်အိုတ် မဒှ်ရ။
ပေါဲရုဲမာဲသ္ကုတ် ၁ ပ္ဍဲကဵုတွဵုရးမန် ၅ ပွိုၚ်ဍုၚ်ဂှ် ပံက်လဝ်ရုၚ်မာဲ ၃၃၅ ရုၚ်၊ ညးအခေါၚ်ကဵုမာဲနွံမံၚ်ပွဳပွူ ၆ ကိုဋ်နွံရဂှ် ဂွံတီလဝ်နူကဵုတၚ်နၚ် ကဝ်မယှေန်ပေါဲရုဲမာဲတံရ။
ပ္ဍဲကဵုပေါဲရုဲမာဲတွဵုရးမန်ဂှ် ဗော်ပရေၚ်ဍုၚ်ကွာန် ၉ ဗော် အလံၚ်အမာတ် ၂၅၀ တၠပြၚ် လုပ်ပြိုၚ်မာဲဂှ်တှ်ေ အလံၚ်အမာတ်ပူကဵု ပုဂ္ဂလမွဲတၠပါလုပ်မံၚ် မဒှ်ရ။
ပရိုၚ်-သြၚ်လောန်တိုၚ်မ်
Photo – MOI