ၜဳလေၚ်၊ ဂျာန်နဝါရဳ ၁
တွဵုရးမန် ပွိုၚ်ဍုၚ်ၜဳလေၚ် ပ္ဍဲပေါဲဗတိုက်အကြာၜါလပါ်ဒှ်လဝ် လ္တူဂၠံၚ်ကွဳစက် လ္ဂုၚ်-မတ်မလီု ကရပ်ကွာန်အလူလေဝ်ဂှ် ကောန်ကွာန်ၜါတၠချိုတ်အာတုဲ ဒးလဝ်ဝပ်ပန်တၠနွံမံၚ် ညးဒေသတံဟီုကဵုဌာန်ပရိုၚ် သြၚ်လောန်တိုၚ်မ်ရ။
ဒဳဇြမ်ပါ ၃၁ ၜိုတ်အခိၚ်နူဂယး ၈ နာဍဳ ဒၞာဲဒပ်ပၞာန်ဗမာ ကၠုၚ်အောပ်ကၚ်ဒမၠုက်ကရပ်ကျာ် ဇာဒိသိုၚ်ၜါ ကွာန်အလူလေဝ်ဂှ် ဒပ်ပၞာန်ဗၠးၜးကောန်ဂကူကရေၚ် KNLA သ္ကိုပ်သ္ကတံကၠုၚ်ဗတိုက်တုဲ ပေါဲဗတိုက်ဒှ်အာရ။
ပ္ဍဲကဵုပေါဲဗတိုက်ဏံ ညးအာတရဴ ညးတြုံမွဲတၠကဵုညးဗြဴမွဲတၠ နူကဵုဍုၚ်ဝေါ ရးဗဂေါတံချိုတ်အာတုဲ ညးတြုံၜါကဵု ညးဗြဴၜါ ဒးလဝ်ဝပ်ရ။
ဟိုတ်နူပေါဲဗတိုက်ဒှ်တုဲ ကွဳစက်ဂမၠိုၚ် မာတ်ဆိုအ်မံၚ်လ္တူဂၠံၚ်ဂှ် စိုပ်အခိၚ်နူဂယးၜိုတ် ၁၀ နာဍဳတေံမှ ရဲအာတရဴတံ ဂွံကလေၚ်အာ လၟေၚ်ဗီုပြၚ်ဓမ္မတာမာန်ရဂှ် ဂွံတီနူကဵုညးဒေသတံရ။
လပါ်ရဲဒပ်ကဝ်မယှေန်ပၞာန်တံ ပ္ဍဲပေါဲဗတိုက်ဏံချိုတ်လဝ် ဟွံအောန်နူကဵုပိတၠနွံမံၚ်ရောၚ်ဂှ် နူကဵုရိုဟ်ကၞက်ပရိုၚ်ညးဒေသတံ ဟီုကဵုဌာန်ပရိုၚ်သြၚ်လောန်တိုၚ်မ်ရ။
နူကဵုတမ်ဒပ်ကဝ်မယှေန်ပၞာန် ဖျေံလဝ်သ္ဇိုၚ်ဍုၚ်ၜဳလေၚ်တံ ဗိုၚ်ပန်ပလံၚ်မံၚ်ကဵုလွဟ်ဇၞော် ပ္ဍဲအကြာပေါဲဗတိုက်ဏံကီုတုဲ ရဲကွာန်အလူလေဝ်ကဵုကွာန်ဝေၚ်ပျာန်တံ ဒးဂြိပ်ပါဲဒဴမံၚ် မဒှ်ရ။
ပ္ဍဲဒဳဇြမ်ပါ ၂၄ တေံလေဝ် ဟိုတ်နူမကမ်လွဟ်ဇၞော်ဒပ်ပၞာန်ဗမာ ပြဟ်စှ်ေခတိုဟ်လဝ်လ္တူဘာလကျာ်ခေတ္တာ ကွာန်အလူကျဳ ပွိုၚ်ဍုၚ်ၜဳလေၚ်ဂှ် ညးဗြဴပိတၠချိုတ်အာ၊ ဒးလဝ်ဝပ်ၜါတၠနွံ ဂွံတီရ။
ပရိုၚ်-သြၚ်လောန်တိုၚ်မ်
Photo – Social Media