ဖာအၚ်၊ ဂျာန်နဝါရဳ ၁
ဒပ်မၚ်ပယျဵုကရေၚ် BGF ဂှ် ပ္ဍဲသၞာံတၟိ ဂိတုဂျာန်နဝါရဳဏံ အခိၚ်ပြံၚ်သၠာဲမံၚ် ဒပ်ပၞာန်ကောန်ဂကူကရေၚ် KNA ဏံဂှ် နကဵုကောန်ဒပ်တံ ညံၚ်ဂွံမံၚ်စံၚ် နကဵုသတိညိဂှ်တမ်ရိုဟ်ကၞက်ပရိုၚ် BGF လ္ၚဵုဟီုတုဲ ဂွံတီရ။
စနူကဵု ၂၀၂၆ သၞာံ ဂိတုဂျာန်နဝါရဳ ၁ ဏံဂှ် ပြံၚ်သၠာဲအာမဒှ်တုဲ ပြဟ်ဟ်ဏံမ္ဂး ဒပ် BGF တံ ပြံၚ်စုတ်လဝ်တဆိပ်ပၞး KNA ကီု သီုကဵုလွဟ်၊ ကယျိုၚ်ပၞာန် KNA ဂှ် တမ်ရိုဟ်ကၞက်ပရိုၚ် BGF လ္ၚဵုတံ သ္ဂးရ။
နူဒပ် BGF အခိၚ်ပြံၚ်သၠာဲမံၚ်ဒပ် KNA ဏံ ကောန်ဒပ်ဂမၠိုၚ် ဗွဲတၟေၚ် ညံၚ်ဂွံစွံလဝ်သတိ ပရေၚ်ဂီုကၠီုညိဂှ် ညးတာလျိုၚ် BGF တံ ဟီုကၠုၚ်ကဵုမံၚ်သတိ နူကဵုစက်စၠောံတံနွံမံၚ်ရဂှ် တမ်ရိုဟ်ကၞက်ပရိုၚ် BGF လ္ၚဵုတံ ဟီုရ။
အတိုၚ်လဝ်ဗဳဒပ်ပၞာန်တံဟီုမ္ဂး ပ္ဍဲကၞောတ်သၞာံဏံအိုတ် နူကဵုဒပ်မၚ်ပယျဵုကရေၚ် BGF ပါ်စ္ဍးပြံၚ်သၠာဲအာ KNA ဗွဲမလုပ်သၞောဝ်ဒှ်တုဲ ပြဟ်ဟ်ဏံ ဗွဲမလုပ်သၞောဝ်ဟွံလလောၚ်တြးဏီလေဝ် ကောန်ပၞာန် တံ ပြံၚ်သၠာဲဗိုက်လတက်လဝ် ကယျိုၚ်တဆိပ်ပၞး KNA ယျဂှ် သ္ဂးမံၚ်ရ။
စနူသၞာံ ၂၀၂၄ ဂိတုဂျာန်နဝါရဳဂှ် နူကဵုသၟဝ်ဒပ်ပၞာန်ဗမာ ဒပ်မၚ်ပယျဵု ကရေၚ် BGF နုတ်တိတ်လဝ်တုဲ စပ်ကဵုပရေၚ်ကိစ္စပၞာန်တံ ပံၚ်တောဲလဝ်ကဵု ဒပ်ပၞာန်ဗမာတံဟွံသေၚ်ကီု သြန်ဂိတု၊ ဇွောံမ နူကဵုဒပ်ပၞာန်ဗမာတံလေဝ် ဟွံဒးကေတ်ရဂှ် BGF ဟီုပတိတ်လဝ်နွံရ။
ပ္ဍဲကဵုပရေၚ်ပြံၚ်သၠာဲတၟိ ဒပ်ပၞာန်ကောန်ဂကူကရေၚ် KNA ဏံမ္ဂး ပါ်လဝ်ဒေသပၞာန် ၄ ၊ ၁၀ ဗျူဟာ၊ လၟိဟ်တမ်ဒပ် ၆၀ ပါလုပ်တုဲ သဝ်ချေတ်တူကီု ညးတာလျိုၚ် BGF ကဆံၚ်လ္တူ သ္ကိုပ်တမ်ဒပ်တံ ကဆံၚ်တာလျိုၚ်သၠုၚ်တိုန်အာ သ္ကိုပ်ပၞာန်၊ ဒုသ္ကိုပ်ပၞာန် မဒှ်ရ။
ကၠာတေံ အတိုၚ်ဒပ်ပၞာန်ဗမာဒက်ပ္တန်လဝ် ဒပ်မၚ်ပယျဵုကရေၚ် BGF မ္ဂး ဒေသဒပ် ၄ ဒၞာဲ၊ ၁၃ တမ်ဒပ်ရနွံတုဲ ၜိုတ်ပိုၚ်ခြာကဵုလဝ်ဂှ်ရ ဒးစွံလၟိဟ်ကောန်ပၞာန်နွံတုဲ ကဆံၚ်ပၞာန်ပၠန် သ္ကိုပ်ဗိုလ်ဇၞော်သၠုၚ်အိုတ် မဒှ်ရ။
ဒပ်မၚ်ပယျဵုကရေၚ် BGF နုက်တိတ် နူသၟဝ်တဲဒပ်ပၞာန်ဗမာတုဲ ပ္ဍဲကဵုတွဵုရးကရေၚ် ပကောံဟပၠုပ်လဝ်သၟတ်တံ သွက်ဂွံလုပ်ပၞာန်တုဲ ကဵုတိုန်ဘာကွတ်ပၞာန် ဟလိုၚ်ပတိုန်မံၚ်ဇြဟတ်ဒပ်ပၞာန် မဒှ်ရ။
ပရိုၚ်-သြၚ်လောန်တိုၚ်မ်
Photo – CJ